لو اجتمعنا يوم، لي مطلب وحيد

14 / 02 / 2009, 02 : 11 AM

لو اجتمعنا يوم، لي مطلب وحيد = خذني لحضنك، ما أبيك تردّني
ودي أغمض حينها وأرجع وليد = وأقوم أباغم والحروف تصدّني

ازحزح بكلمه مثل ثقل الحديد = وأبكي قهر كيف الكلام يضدّني

وأبدا أناظر فيك بإصرار العنيد = وتعطف علي وبالحنان تشدّني

ابي يوقف هالزمن وإلا يعيد = وإلا يخربط بالحساب إن عدّني

وأفتح عيوني ثم أغمض من جديد = وتصير روحي للغمام تودّني

ويبدا هطولي عزف نايات ونشيد = وأبل ريق الحب كل ما لدّني

وأحس في صدري مثل قطعة جليد = تجمّد أنفاسي شعور يهدني

وأستل سيف الآآآآه من غمد القصيد = وأبتر كفوف ابليس كل ما حدّني

ودي أموت بساحة أحضانك شهيد = ألفين موته ما هقيت تسدّني

أبي يوقف هالزمن وإلا يعيد = وإلا يخربط بالحساب إن عدني

وأفتح عيوني طامعن منك المزيد = ونفس الشعور اللي ثناني مدّني

وأشوفني فعيونك الحلم الأكيد = وشعلة أمل مهما تظل تودّني

وإن جيت تسأل من بهالدنيا السعيد = أناااااااااا، إلى منك عليك تشدّني