الفية ابن عمار كاملة لأول مرة

الف اولف من كـلام ِ نظيفـــــــي *** ودموع عيني فوق خدي ذريفــي
من لام في حب الحبيب الوليفـــي *** دقـاق رمش العين سيد الخونـدات
خوندات ياللي ما بعد عاشرنـه *** قله تراهن في الهوى يذبحنــــــه
قلبي وقلبك يالمشقا خذنـــــه *** عزي لمن مثلي تعرض للافـــات

البا بليت بحب خلي على ماش *** ولاحصل لي منه ما يبرد الجــــاش
غديت انا واياه طاســه ومنقاش *** بالوصف كني له معزي سلامــات
سلامات للذي هم يذكرونـــــه *** يبي السلامة منه وهي المعونــــه
يقول طيب مير غارت عيونـــه *** سبب ولدكم واحد صابه ومــــات


التاء تليت الزين والزين مقفـــي *** امشي وحتفي ناقله فوق كتفــي
لاشفت مجدول وكتف ورد في * ماقوى التفت لو طوحولي بالاصـوات
اصوات قالوا ياهبيل وسايــــح *** طرد المقفي يالمشقى فضايــــح
قلت ايه مير اشواركم والنصايح *** مثل المطر فوق السحال المكفـات

الثاء ثمانه حب رمان طايـــف *** او قحويان ٍ في رياض ٍ عطايــــــف
متنقلٍ بالزين سيد العفايــــــــف *** عمهوجة ٍ فيها من الحور شـارات
شارات فيها من ظبي الحمــادي *** هي لذة اللذات وغاية مــــــرادي
من يوم قفا صويحبي من بـلادي *** عليه جاوبت الحمامة بالاصـوات

الجيم جاني من عشيري كلامــي *** ولا لقينا من يرد الســــــــلام
عليه زرع القلب هايف وظامـــي *** مالي جدا كود البكاء والتنهـــات
انهت على ما فاتني من زماني *** يــوم الحـبـيّـب زارنــي فـي مكانـي
وراي ماخذت القضاء يوم جانــي *** توي دريت البيض فيهن غـرٌات

الحا حليه في الوطن ما لقيتـــه *** عذلت قلبي عنه ولا قويتـــــــه
لوه يذكــــر يم مسكه نصيتــه *** انصـا ه لو دونه بحـورو مسافـــات
مسافات لو هي في بحور الظــلامي *** او وسط بتيلٍ حداه الـــولامي
اذاحصل شف وبلوغ المــرامي *** صبرت لو طبيت بحر الظلامــات


الخاء خليلي صار عندي قـريبي *** جعلي نصيبٍ له وهو من نصيبـي
ودي نواجه نور عيني حبيبــــــي *** مار الوحيد لهيد ما فيه نوهــات
نوهات نوهات ٍ غـدت من غثا البال *** طول النهار مسِيم عمال بطـال
وانا اترجى كل حول ٍ إلى حــال *** دنياك هذي ياريش العين نشبـات


الدال دامي ما مسكت الذوايـب *** لـو قـيــل طيب قـلت ما نيب طايــب
دنو استاد القبر ودنو النصايـــب *** ودنو دواة الحبر نكتب سجـلات
سجلات اريد اكتب بها لي وصيه *** عمري قضى يا وجد اهيلي عليه
قولو لصافي اللون ياقف عليـــــه *** اغديه يرجع ويتحسف بما فــات

الذال ذالي عنه مدة ليـالي *** لـو قـيـل طـيب قـلت انا أبخـص بحالــي
والله مايطري علي شف بالـــى *** الا انت يا راعي الثمان الرهيفـات
رهيفات فـيـهـا للمشقى طرابـــه *** مجمول مدلول ٍ ولا به طنابــــه
هنـــي من يـدخـــل معه في ثيابه *** وأسـج انا وياه في العمر سجـات

الراء ردوف صويحبي ثقلنــــه *** ونهوده الثوب الحمـر شلعنــــه
ومثومنن ما احلى بياضه ودنه * من فوق جسم ٍ فيه من عرق الارطات
ارطات غرمولٍ ذرته الـذواري *** والله لولا اني علـــى الـترف اداري
لأضوي عليها مثل ذيب الغـداري *** جايع وبـالـغـابـه عياله مجيعـات

الزاء زماني شفت منه الهوايــل *** لاعاد حظي فـي الغنادير مــــايل
الزين لــــو نترك قصير ٍ وطايل *** لاشك وين العقل هيهات هيهـــات
هيهـات لو فـي العـقـل يــا ديـب لبـه *** ما كان يتبع واحد ما يحبــه
ليصار قـولـي لـــه خريطٍ بدبـــه *** وش لك بشوفه يالعيون المشقـات

السين ســقـنـامن الدراهم وعيـــا *** واللي نبي من صاحبي مــا تهيا
يقول والله لو تحب الثريــــا *** خذني على السنة تشوف الطرابـــــــات
طرابات ينسنك جميع الــــدروبي *** أغـد يك في باقي حياتك تتــوبي
اجعل مقرك بين جلدي وثوبـــي *** حتى تشوف البيض فيهن لــذات

الشين شاب الرأس ياعذب الانيــاب *** والـلي بطــارى توبة ٍ كــان قدتاب
لى حاجة يا زين بـس افتـــح الباب *** يرحمني اللي عـالـم ٍ بالخـفـيـات
يرحمني اني فيك يازين مفتـون *** من حبك اسهر والخلايق ينامــون
الهيتني عن مذهب اللي يصلــــون *** ما عاد اميز لو قـرآن التحيات

الصاد صيدي يوم الاوي غريمـي *** شفق ٍعلي الحبه ولمس البريـمي
مهوب صيدي قلة في الحريــمي *** لا شك كل ٍ له مع الناس مشهــات
مشهاتي انته ياظبي الفريــدي *** حب العرب ينقص وحبك يزيـــدي
لا شفت زولك ذاك هو يــوم عيــدي *** تصبح بساتين الضماير مريفـات

الضاد ضد ٍ حال بيني وبينــه *** يقول هذا واحد ٍ لاتبينـــــــــــــــه
جعل الوجع يشقيه في صبي عينــه *** يسهر ولايمرح من الليل ساعـات
ساعات فيها ما يشوف الجــدارا *** ولايعرف الليل هو والنهــــــــارا
وعساه يوم البعث يحشر حمــارا *** ويحملونه حمل الاسراف سيئــات

الطاء طويت اليأس والسد باحـي *** وما عاد لي شف ٍ بظبي الضواحـي
ياعلها هفت خفـــــوق الجناحي *** اللي سبوقه فوق رجله مطــوات
مطوات وليا طار في يوم هبــــــــه *** راعيه لو رز اللواء ما ينبـــــــــــه
طيرٍ قضيب او الحباري غدت بــه *** يبي العشاء من بين فخـذ ٍ وثندات

الظاء ظمانه لا تعـاشــر لك اثنيــن *** لازم تخلي عشرتــك يامسيكيـن
ما خبر يجمع فــي المرابط حصانين *** يجي لها هز ٍودزٍ وصقــلات
صقلات يصقلها الى ا دنوا طعامـه *** يجي لها مــع المعيشه بحامـه
اسمع كلامي يالهبيل الفدامــه ** إلي جمعت الحصن فالحصن خطـرات

العين عن من ينقل الهرج حــذراك *** تراك كنك ناقل ٍ داك بـــــــرداك
إلى سمع له كلمة مــن حكايـــــاك *** يحطها كبر القصــور المبنــــات
مبناة مبناة كبر خشم الغرابـــــه *** ويكدر المشروب عقب الطرابــــه
وهو يشابه بومة ٍ في خرابــــه ***لاناقل الهرجــــه ولا كفو هرجــات

الغين غاب العقل باول شبابـــي *** وادميت من تلعات الارقاب نابـــي
واليوم شاب الرأس والكيف طابي * ماني على الفايت كثير الحسوفات
حسوفات لاتحزن على اللي مضى منك*ايضا ولاتفرح على اللي يجي منك
مدراك وش موجب سبب صدتـه عنك*ناهيك والي العرش رب السموات

الفاء فؤادك لاتوليه حساد *** واحذر يجي لك مع اهل الشر مقعـــــاد
واهرج وكنك عن جميع العـرب صاد *** ثم اعتبر بالذيب يضـوي بغرات
يضوي بغرات وهم ما دروا بـــه *** واللي يوقف في المحاري هقوا بـــه
كم واحد وقف ولاقضى نوبــه *** يهـوي الى شاف اللحم كنه حــدات

القاف قل للي يريــــد النواميس *** اللي يبي طرق الهوى يرخـي الكيس
الا بذلت النفس والكيس وابليـس *** يطيح ناس ٍ يدعون الديانــات
طاحوا وصاروا للخلايق علاجــه *** يلقى بهم راعي الهوى قضي حاجـه
وإلانثرت الحب جتك الدجاجــه *** حاضت وباضت لو تبي عشر بيضــات

الكاف كن السد في كل الاحـوال *** واحفظ لسانك لايقولون ذا قـال
حتى تجي عند العرب خوش رجـال ** لا جيت مجلسهم نواظرك صقـرات
صقرات لا تجلس مـع اللي يشاكيك *** هو داء دواك وتحسب انـه يداويك
ياذيب كان الله على الرشد هاديـك *** اكتم كلامك بالضلوع المحنـــات

اللام ليت العمر ينكس لحلـــــه ***قيمة ثلاثين السنه هي محلـــــه
الرجل قبل الشيب يا حلو دلــــه *** ولا لاح فيه الشيب ما فيـــه لذات
مافيه لذات ٍولا يرغبونـــه *** لو حط له ردن ٍ وكحل عيونــــــــــــــه
اهل الهوى عقب الغلا ينكرونــه *** لوهو مصافيهم على فايتٍ فــات

الميم ما غيري من الناس جـــرب *** ولاهو بمثلي في حياته تطــرب
لاويت صافي اللون فوق المضـرب *** كن العدو عني عيونـه مـــداوات
مداوات جعله ما يجي لك عبــاره *** واللي بصد ٍعنك وش لك بكــاره
الحذر ما ياطى بوسط الخبــاره *** لازم يجي فيها عقارب وحيــــــات

النون نام الحظ ولا فيه حيلـــه *** عيا يباريني وانا ازريت اشيلــــه
من يوم فارقني عريض الجديلـــه*** قام يتكسر في حشا الصدر عبــرات
عبرات ضيقن حنايا ضلوعـي *** عليك يا خلي حسين الطبـــــــــوعِ
عليـك ما جفت محاجر دموعــي *** دايم عيوني في مهاواك سهـرات

الهاء هواي السابعه يالفطينــي *** والثامنة ياللي تعرف الرطينــي
مخفية ما ودي لضدي يبينـــــي *** والتاسعة تحصاه باعداد الاميــات
اميات مات القلب من كثر همـي *** واشكي عليك الحال يا ولد عمـي
انته عضيدي وانت لحمي ودمـي *** ترضاه يجفاني ولانيب مجفــــات

الواو ويل اهل الهوى من هواهـم *** ان كان هل اللي سم حالي وطاهـم
كم ليلة ٍيصبح ***بٍ عشاهـم ***الالقيمات ٍ مع الحلق مـــــــــرات
مرات لين اقضي من الترف شفـي *** واوسده عضدي وزندي وكفــي
واكشف عن اللي غابي ٍ وامتخفـي *** ثم ٍ يجي للزاد والشرب لـــذات

اليا يحبه صلف ومراقده كلــف *** لو هو يتمم مطلبي كان اقول الــف
حيثه صديق من قديم على عــرف *** والا فغيره لو يبي عشر بيـــزات
بيزات ما افلها لغيره بلاشي *** من جنس رأس الظبي ما ابي عراشي
الا لمن ما يه على ماه مــاشي *** هذاك من يمه فلوسي رخيـّـات

الشاعر محمد بن راشد بن عمار رحمه الله، قالها عام 1340هـ
.(منقوله) عن حفيده وسميه الشاعر محمد بن راشد بن عمار
.*( مسكه ) مسقط.*(خشم الغرابه ) جبل في ثادق .
*( بتيل ) سفينه*( خباره ) جحور الجرابيع

تسلم أخوي المدرس ويعطيك الف عافيه ماله لايم كاتبها الله يلوم اللي يلومه أبيات طالعه من قب الشاعر ....

ياناس خلوني معه وتركونــي &&& محداً معوضني غيابه أذا غـــاب
أغليه بس وشلون لا تسألوني &&& الحب من ربي يجي ماله أسباب

تحياتي لك ،،،،،

تسلم اخوى المدرس والله انك طيب وانا كنت افكر فيها بس انها طويلة وتبى جلد فى الكتابة وانا ملول هههه

الف شكر لك مرة اخر ى وعساك على القوة

الف الف شكر لك

ممداني اتمناه الا وجبتها

الف شكر وتسلم على ما قدمت




سلام

الواو ويل اهل الهوى من هواهـم *** ان كان هل اللي سم حالي وطاهـم
كم ليلة ٍيصبح ***بٍ عشاهـم ***الالقيمات ٍ مع الحلق مـــــــــرات
مرات لين اقضي من الترف شفـي *** واوسده عضدي وزندي وكفــي
واكشف عن اللي غابي ٍ وامتخفـي *** ثم ٍ يجي للزاد والشرب لـــذات


المدرس

صح لسانك ولسان شاعرها

ويعطيك العافيه على نقلها لنا

تحياتي