(الحلقة الجديدة من خلف الكواليس مع لميس هذه المرة// صادوه )

السلام عليكم ورحمة الله وبركاته مسساء الورد والجوري لجميع آعضاء منتديات تمير راح اطرح اليوم الحلقه خلف الكواليس من برنامج مقالب (صادووه ) وراح انزل المقلب بعد المغرب إن شاء الله وإن شاء الله تعجبكم وبالتوفيق يآآرب (آخليكم مع المقتطفات ) ** كل الي سحبتهم ماقالو شيء بالعكس والله ماقصرو جو وردوو وتفاعلو بمواضيعهم ... ** العفوو انا ماغلطت معه علشان يزعل ... ** واذا كل سنه يتمقلب بيموت مثلا ** قول له تقول ..... شكرا يالزعول ** مشكله والله هالاعضاء الله يصبرني بس **اعتذر طل ذابحه ابوه انا وانا مادري واعتذر ع ايش !! ** انت ماقصرت واسطه خيير بيينا الله يعطيك العافية .. ** مستحيل اعتذر .. ممنوع الرد نهائيا تمنياتي لكم بقزقزة ممتعه ولاتنسونها من تقيماتكم الحلوة المهند

السلام عليكم ورحمة الله وبركاته مسساء الورد والجوري لجميع آعضاء منتديات تمير راح اطرح اليوم الحلقه من برنامج مقالب (صادووه ) واليوم معانا مقدمة هذه الحلقات لميس

البداية كانت بعد اتفاق مسبق مع أخوي معانق هم ورد الثأر له فكانت هذه الرسائل ,, طبعاً الاقتباس كان من كتابتي وتعديلي على رسالة قديمة من معانق هم .. اقتباس:المشاركة الأصلية كتبت بواسطة معانق هم هلا اخوي ابو مهند , اعتذر منك لعدم دخولي في حلقتي في موضوع صادوه , والله اني اتابع تعليقاتكم انت والكاريبي وما كنت متوقع منك انت بالذات الكلام اللي كتبته بصراحة الموضوع مضيق صدري وما كان لي اي رغبة في اني انزله وما كنت راضي لكن انا قلبي طيب وسمحت مع اني رافض الفكرة من اولها اتمنى انك تقدر ظروفي وانك تحذف الموضوع كله . وإلا تراي أعتذر من المشاركة في المنتدى حتى إغلاق الساحة الرمضانية . وانت اخو وعزيز ولو ما امون عليك ما راسلتك بعد كتابتي وتحريفي للرسالة أعلاه .. تمت مراسلة لميس :: هذا ما كنت أتوقعه ... أختي لميس .. هذي الرسالة أرسلها لي معانق هم .. والحقيقة أنا مستغرب من سكوته على الموضوع .. لكن الواضح أنه شايل في خاطره وأنا عارفه رجال حبوب وطيب وما يرد أحد .. وياليتك هالشخص بالذات معد تسوين عليه مقالب .. ووالله أني مقدر تعبك وفكرة هالمقلب وتسجيلك في منتدى ثاني عشان تسحبينه في الصور لكن شوفة عينك .. الرجال يطالب بالحذف .. وحاولت أهديه ووعدته أني ما أدخل الموضوع مرة ثانية لكن ما فيه فايدة .. فكان الرد من لميس : ليه !!! المووضوع كله مزح وسعه صدر وانا طلبت منه وهو ووافق طيب كان طلب مني مانزله وانا مراح انزله انا قلت بقنعه مره اذا وافق ولابراحته واهووافق واشوفه مايرد مستغربته والله ؟؟؟ وبعدين و ش فيه اذا سحبته مافيها شيء يزعل لوالدعو جد يحق له بس كلها مقلب ومزح وشوف كل الي سحبتهم ماقالو شيء بالعكس والله ماقصرو جو وردوو وتفاعلو بمواضيعهم خلاص انا غلطانه يوم اسحبه لاحول ولاقوة الابالله وشكلي خلاص ماراح اصيد احد دام الدعووة فيها زعل وشيله خاطر وان شالله احذفه موضوعه واشكرك ع توصيل الرساله وهنا ردي عليها بعد أن تكفلت بحذف الموضوع : الله يعطيك العافية على تفهمك وحذف الموضوع والله اني عارف الجهد اللي بذلتيه في هالحلقة خاصة بداية من التسجيل في منتدى اخر وربط المقلب به ونهاية بمحاولة اقناعه بطرح الحلقة والرجال انا عارفه لو أطلب اللي في مخباته ما ردني من طيبته واكبر دليل انه ما راسل الا انا يوضح لي المشكلة الحاصلة والحلقات اتمنى انها ما تقف وان كان التنويع والتغيير مطلوب لانها بها الشكل بتصير ممله لا سيما ان اغلب الحلقات ماطولت وعرفوك اصحابها اشكر لك تجاوبك وان شاء الله يرضى ابو عبدالعزيز لميس وليه مارسل لي انا وطلب احذفه ليه يرسلك انت !!!؟؟؟؟؟ حتى مارفض بالاخير عطاني صوره من رساله المدير لومايبي كان قال لي لاتنزلينه وش الي يمنعه يعني !! والله هذا الي عندي وهذي مقالبي وانا مقالبي متنوعه من قال انها مثل بعضض !! والعفوو وانا ماغلطت معه علشان يزعل شكرا لك المهند وطبعاً الرسالة المقتبسة تم التعديل عليها من عندي وبالتفاهم مع معانق هم بالواتس أب .. هلا بك مثل ما قلت لك طيبة قلبه هي اللي أجبرته يرضخ للواقع وهو شكى لي عشان أحل مشكلته وشكل الدعوة ماش أرسل لي رسالة قبل شوي اقتباس:المشاركة الأصلية كتبت بواسطة معانق هم هلا ابو مهند مساء الخير اشوف موضوع صادوه انحذف من لميس غريبة ليه هي اللي حذفته عسى ما راسلت احد تراي واثق فيك وما شكيت الا لك وترى أمانتك ان كان لك سبب فيه لاني مستغرب انه انحذف ولاجاني اي رسالة او خبر او اقل حاجة اعتذار تكفى رجع الموضوع واحذف الحوار اللي جاء بعد المقلب اللي استلمتني فيه انت والكاريبي لاني شايف الجهد اللي سوته لميس معي وماودي يروح بالطريقة هذي والظاهر بغينا نكحلها وأعميناها موضوعه جاب لي وجع الرأس وأنا مالي حاجة فيه حتى ردودي أحذفيها ورجعي موضوعه وتفاهمي معه اعتذري منه أو خلصي أنت وإياه لميس .. وقد بدأ التعب والضجر .. ووين ارجعه موهو الي يقول احذفووه ليه يغير كلامه الحين مراح ارجع شيء ولاراح احذف شيء انا قصصرت والله كل واحد وعنده قدره ع التحمل ومراح اعتذر لااحد ماغلطت بحقه وانا واثقه من نفسي وبعدين السؤال هننا ليه مايجي يواجهني !!!! ليه يطلب منك انت بالذات ؟؟ تبي الجد والله صدعتو فيني هنا جاء الرد .. وما كان قصدي بالحلقة الواحدة أنها حلقتها .. والله إنك صادقه .. أنها تجيب الصداع .. أنا صدعت وهي حلقة وحدة .. ومالي لا ناقة ولا جمل فيها .. مدري وش لون صبرتي على المواجهات والتنظيمات مع منتديات أخرى .. وهذا اللي خلاني أتحسف أن موضوعه يروح كذا بلاش .. حتى إني حاولت إنعاش موضوعه بالتعليقات والفرفشة لعله يدخل معنا أو يرد .. لكن صارت عكسية .. لكن يومه أشتكى لي والله ما بغيت أرد طلبه .. على العموم أقنعته برضى تام منه أن موضوعه يرجع بعد حذف الحوار اللي خارج المقلب وردودي أنا والكاريبي وأن يبقى الموضوع كمقلب فقط .. وسأتكفل بذلك إن سمحتي .. والذي بدا واضحاً أنه شايل في خاطره زوداً على المقلب الحوار اللي دار والحلوف أنك ما تطرحين الموضوع .. لكن طلبك له وتقديراً لجهدك رضخ للأمر واستجاب بدون نفس .. لأنه على كلامه كل سنة يتمقلب .. بالرغم أنه ما كان راضي حتى في السنوات الماضية ..هنا كلامه في الحوار الأساسي : معانق هم لا الله يرحم والديك والله ماحب هالسوالف الرمضان اللي طاف واللي قبله سويتي فيني مقلب وما قلت شي مع اني ماكنت راضي ينزل الموضوع لكن عشان تعبك ومجهودك رضيت الموضوع ينزل الحين امانه امنتك لا ينزل الموضوع قلت والله ماحب المقالب لميس تخرج عن طورها بوصفه الزعول .. واذا كل سنه يتمقلب بيموت مثلا والله وبصراحه ماشوف أي شيء يخليه يزعل ويكبر السالفه كان من البدايه قال لي وفكنا من وجع الرااس وخلاص سوي الي تبغى انا مالي دخل رجع الموضوع وحذف الردود انا مقصره ومالي خلق احذف وكذا والله مليت وقوله تقول لميس شكرا يالزعول محاولة اقناعها بخطأها .. وأن تعيد بنفسها المقلب بعد حذف المطلوب .. والتصريف بعدم قدريتي .. صحيح ان مافيه شي يزعل عندي وعندك لكن البشر مهوب سوى وفيه ناس تتحمل وناس ماتتحمل وكلا وطبيعته على العموم أنا نقلت الموضوع وحذفت بعض مشاركاتي أنا والكاريبي لكن يوم بغيت أعدل في المقلب الرئيسي طلع لي خرابيط بالانجليزي لان شغلي على الايباد وخفت احوس الدعوة عشان كذا مالي الا يوم الاحد اضبط الدعوة لان اللاب توب بالمكتب والله يعين حرام حلقة ممتعة وجهد خرافي وتعليقات أثرت المقلب وزادت من جماله يبقى مغلق عن الاعضاء لكن تجري الرياح بما لاتشتهي السفن لكن لم تنفع المحاولة فجاء ردها : و ش تبي اسوي فيه اذا هو راكب راسه احذفوه بعدين يغير رايه رجعووه تراهالشيء والله يتعب احذفي رجعي ومدري ايشش لذلك انا الي يبي احذف مووضوعه يقولي من البايه موبعد ماردو العالم يجي يتكلم لا واحذفي ردود فلان وفلان يحسبه رد واحد ترا الردود كثيره ويبي لها جههد ووجع راس يانحذف الموضوع من الاساس ولانرجعه كله وانتهينا ولا رجعه انت ووعدل فيه ومشكله والله هالاعضاء الله يصبرني بس بعد ذلك قمت بحذف المطلوب وكتابة اعتذار والايعاز للكاريبي بتقديم اعتذار .. ثم أرسلت لها بعد تحريفي لرسالة من معانق : اقتباس:المشاركة الأصلية كتبت بواسطة معانق هم هلا بك أخوي أبو مهند وما يحتاج إعتذارك على رأسي أنت وأخوي الكاريبي وأنا عارف والله بمزوحكم وسوالفكم والمعذرة على اشغالك بالتعديل والحذف والخطأ ما كان منكم لأن أساسه كان من اللي مقدمه الموضوع الأخت لميس الله يهديها وما ودي والله أدعي عليها وودي أدخل وأشارك لكن مالي خلق حتى بالمنتدى موليه ] مساء الخير اختي لميس هذه نص الرسالة اللي أرسلها لي اخوي معانق هم بعد أن طلبت منه انه يرجع للموضوع ويتفاعل لأن حرام موضوع احتل مراتب متقدمة من المشاهدة والمتابعة ودخول الزوار ويروح كذا مع أنه حذف كم ليلة ارجو أن تتقبلي طلبي بتقديم الاعتذار وان لم تكن اخطأتي في نظرك وألا تخيبي اعتذاري واعتذار الكاريبي ويروح هباء شاكر منك سلفا تجاوبك وجهودك المقدمة لميس الحين صار الغلط مني سبحان الله عالم عجيبه !! وش غلطت فيه بالله انا علموني وين الغلط والله انقلب راسي !!! وانا ماستاذنت منه وقال عادي وارسلت له انزل كل شيء قال نزلي كل شيء ليه يتغير الحين ويقول عني كذاا ماقال احذفي وشيلي ومدري ايش الشرهه علي الي يسحبه من الاساس والله ماتوقعته كذا معانق هم ؟؟؟؟ وانت ماقصرت واسطه خيير بيينا الله يعطيك العافيه وماقصرت المهند كلامك صح وأنا قايل لك أنك ما اخطأتي لكن احتمال جاء أحد وقلب رأسه أو أن تعليقاتي أنا والكاريبي ضيقت صدره عشان كذا تشجعت وقدمت اعتذار أمام الزوار والحمدلله حتى الكاريبي تشجع مثلي وأعتذر لميس يقلبون راسه انا وش دخلني دامني ماغلطت ماعلي منه وخلي الي قلبو راسه ينفعونه المهند وما باقي الا انتي كونك مقدمة الحلقة فليتك تكونين عاقلة وفاهمة وتعتذرين له بما أنه يرى أنك على خطأ لميس اعتذر طل ذابحه ابوه انا وانا مادري واعتذر ع ايش !! انا ماغلطت بحقه واذا هو وده يزعل يزعل مايهمني الزم ماعلي امي وابوي والباقين يزعلون بكيفهم ويرضون بكيفهم مراح اعتذر من احد ولاراح اراضي احد لاني ماغلطت وواثقه من نفسي المهند بصراحة تراي دخت من استقبال رسايله ثم مراسلتك والسعي في الصلح وإعادة المياه الى مجاريها بينكم عشان كذا ليتكم تخلصون لأنه وعدني بالمشاركة والتفاعل ان قدمتي اعتذارك لميس وليه تستقبل طنشه وبعدين هو ليه مايرسل لي ويقولي على ايش غلطانه انا!! لايرد بكيفه ماجبر احد يرد بالغصب والمواضيع ماتوقف ع عضو لانه مارد المهند وليتكم تصيرون أكبر من هالمواضيع لأني عارف أن عندك تقديم حلقات ومشغوله بتقديم أكثر من فعاليه بالتوفيق لكم لميس قول هالكلام لمعاانق انا ماجيت اتشكي عند الناس ولازعلت ع لاشيء مثله والى هنا ويكفي والله كرهتوني بصادوة والمقالب تووبه المهند على فكرة ترى أبوه ميت الله يغفر له ويرحمه .. عشان كذا لا تتعرضين للموتى .. المهم أنا دوري انتهاء .. حاولت معه .. وحاولت معك .. أقرب وجهات النظر .. ولافيه فايده .. كل واحد راسه أيبس من الثاني .. رجاء انسي هالموضوع كله .. وفي الطقاق كلهم .. وجعلكم ما تصلحون أبد .. وليتك تعرفين أننا في العشر الأواخر والصلح خير .. فمان الله .. لميس الله يرحمه ويغفرله ويرحم موتى المسلمين والله استفزني الله يهديه اووك خلاص انت ماقصرت ومششكور وهو لايرضى الناس ودهم يزعلون من ظلالهم وانا عارفه اننا بالعشر الاواخر والصلح خير للي بينهم خلاف وغلطانين لكن انا ماغلطت لذلك مستحيل اعتذر وشكرا لك المهند بما إنك ما عندك نية تعتذرين ولا تملكي الشجاعة لتقديم الاعتذار فمتى تريدين طرح موضوعك في برنامج صادوه مع المهند الجزء الثاني لميس لاوالله ولافكرت اعتذرت حتى لوتطردوني من المنتدى ماعتذرت والله متوقعه انه مقلب بالبدايه ماشكيت بس يوم صممت اني اعتذر شكيت بس والله قهرتوني ورفعتو ضغطي بس حللتكم عند مخاوي تمير مسوي مقلب قووي فيني الله يهديه كمل رفعة الضغط والله تمنياتي لكم بقزقزة ممتعه ولاتنسوها من تقيماتكم الحلوة المهند

هههههههههههههه
والله ونآسه هـ المقلب ضحكت من قلب
ماتوقعت والله لميس تنصآد ع طووول
رحمتها يوم قالت التوووبه ان سويت مقالب مرره ثآنيه
حوآر وسيناريوآ متكتك
تسلمون يالطيبين على الصيده الحلوووه ..

والله مقلب عنيف من الطراز الثقيل
بصراحه كنت متوقع هالمقلب يكون ضدي
بس الحمد لله جت على لميس عكسيه اخخخخخخخخخ
سألت المهند قلت لايكون مسوين فيني مقلب انت ولميس
ترى ياويلكم قالي لا والله نبي نمقلب لميس هنا ارتحت نفسياً
وفرصه بالنسبة لي عشان ناخذ الثار من لميس
المهند وقتها كان نازل علي من السما .. لان
كنا مخططين نسوي مقلب انا والموادع ونحتاج الفكره
وجاني المهند بالفكره جاهزه ومقشره
شرايك في المقلب يالميس
شكراً المهند على المقلب الاكثر من رائع

اقتباس: المشاركة الأصلية كتبت بواسطة الراقيه    هههههههههههههه والله ونآسه هـ المقلب ضحكت من قلب ماتوقعت والله لميس تنصآد ع طووول رحمتها يوم قالت التوووبه ان سويت مقالب مرره ثآنيه حوآر وسيناريوآ متكتك تسلمون يالطيبين على الصيده الحلوووه ..

ان شاء الله السنة الجايه راح يكون المقلب عليك
والمقلب راح يكون على ايدي

هههههههه

اقتباس: كنا مخططين نسوي مقلب انا والموادع ونحتاج الفكره

كانت الفكره في بآلك اجل شكلك مصمم تأخذ الثأر من لميس
وجاكم ابو الآفكار وريحكم من التفكيير

اقتباس: المشاركة الأصلية كتبت بواسطة معانق هم    ان شاء الله السنة الجايه راح يكون المقلب عليك والمقلب راح يكون على ايدي

مافيه احد يقدر علي خلآص صآر صآدوووه مكشوووف الحييين بعد ابو مسآعد

اقتباس: المشاركة الأصلية كتبت بواسطة الراقيه    هههههههه كانت الفكره في بآلك اجل شكلك مصمم تأخذ الثأر من لميس وجاكم ابو الآفكار وريحكم من التفكيير

ايه ناوي لها نيه قشره
وجانا سندباد تمير وما قصر وياها

اقتباس: المشاركة الأصلية كتبت بواسطة الراقيه    مافيه احد يقدر علي خلآص صآر صآدوووه مكشوووف الحييين بعد ابو مسآعد

اخخخخخخ راح تشوفين طولي بالك

ياحليلك يالمهند !!!!
لميس دارية عن مقلبك وتبي تعطيك جوك ولاتبي تخرب مقلبك !
ومعلمها من مبطي وقالت خله يعيد وهو مبسوط !
ومعانق هم زعلان صدق لاتقعد ترقع يالمهند