ونحن اين احتفالات العيد في تمير؟

[عبدالعزيز الهزاع]

السلام عليكم
لفت انتباهي وانا اتصفح ملتقى الاهالي موضوع الدعوه لحضور احتفالات اهالي حوطة سدير
بمناسبة عيد الفطر المبارك
وسئلت نفسي عن احتفالات مدينة تمير بالعيد وهل سوف تقام هذا العام ام لا
حيث لم نسمع اي خبر او اعلان بهذا الخصوص ولا نعلم كيف سوف يحتفل الاهالي بالعيد
وهل هناك برامج سوف يتم وضعها ام ان هذه المناسبه سوف تمر علينا مرور الكرام ونحن في سبات عميق
اتمنى ان نجد اجابه شافيه قبل ان نشد الرحال الى المدن المجاوره لنحتفل بالعيد معهم

[ẔṂŊ ĢǍṦě]

هلا اخي عبدالعزيز
ابداء كلامي . بعيدنا مع اهل سدير احلى.
مازالات البلدية تلتزم الصمت والا نعرف هل يوجد شي من الاحتفالات هذا العام او لا
الى متى ..
لكن انا من وجهت نظري هذا العام اسواء تنظيم واستقبال للعيد !!.
واختتم كلامي الله يهنيكم ياهل سدير عندكم ناس غيورة على ديارهم ويحبون الخير للمواطنين..
اخوك..

[كاسر الصمت]

السلام عليكم ورحمه الله وبركاته

احب ان افيد ان البلديه ليست هي التى تقوم باحتفالات العيد بال المواطنين من اهالي تمير هم الذين يقوم بذلك 0
اما البلديه هي التي تجهزالموقع والعمال التي تساعد على تنظيم الموقع من نظافه وغير ذلك 0

[سمو الأمير]

تكفي اللمبات اللي مولعينها تدل على أن العيد قادم

بالعربي الفصيح

تمير بلا قائد

كلٍ يجيب العلم من راسه...

اعطيكم نماذج من النقاشات

وشوله حفل ناقصين لجه
قُبل في الخالدية وش حيث العزيه
الحفل مايحضره إلا ال....
فيه ازعاج للبيوت اللي جنب الحفل
هالحفل يترززون فيه بعض الناس
وخذ من هالحسي .... واختلف الفقهاء!!

[المتحـ2007ـد]

كل هذا بسبب العنصريه هي التي ذهبت بفرحة العيد

وابرك من ساعه يوم ما يصير فيه حفل كل يحقر الثاني في تمير

وكلاً يبي يبرز نفسه خلوكم في سدير احسن وافضل والقلوب اطهر

[كلاش تمير]

وشولة احتفالات مالها سنع وربطه وغثاء كل يتعيد عند اهله ابرك وازين وإلي يبي احتفالات ترى سدير حذفة عصا

[غيور]

يآ رجآل مثل مآقآل المتحد عنصريه عندك في الديره ماذبحتنا إلا هي و زود على ذلك الحسد و لك في المناسبات السابقه خير دليل

وشولة احتفالات مالها سنع وربطه وغثاء كل يتعيد عند اهله ابرك وازين وإلي يبي احتفالات ترى سدير حذفة عصا

يآحياتي ربطه !!

طيب لآتجي يعني مو قايم حفل العيد إلا بك انت مرتبط خل غيرك يفرح دآفع شيء من جيبك انت

[الحقيقه]

انا اشوف عدم وجود احتفالات احسن ....... ليش ؟؟؟

علشان يكون هناك تجديد ترى ملينا من العرضات نبي شيء على مستوى

كل ثلاث سنوات افضل .......

... يا خوك ما لنا في قرقعت الطبول ....

[الوتر الحساس]

اضم صوتي معك يالمتحد على كل كلمه قلتها والعيد ينفع بدون حفل , والله اسأل ان يتقبل صيامنا وقيامنا وصالح اعمالنا انه سميع مجيب , ولاتنسوصيام سته من شوال فمن صام رمضان واتبعه سته من شوال فكأنما صام الدهر ...

[الحقيقه]

كل هذا بسبب العنصريه هي التي ذهبت بفرحة العيد

وابرك من ساعه يوم ما يصير فيه حفل كل يحقر الثاني في تمير

وكلاً يبي يبرز نفسه خلوكم في سدير احسن وافضل والقلوب اطهر

يا اخوك هذا في نظرك ومن تحليل بطنك ...

انت شايف احد محقور .... او كل لاقط سيفه !!!!!

الديره وحده واهل تمير اخوان ...

[النادر]

عيبنا في تمير اعتمدنا على البلديه في كل شي
وهي ليست ملزمه باقامة اي مناسبه
ولكن الخلل في ابناء تمير وفرقتهم
فلم يعد لدينا مرجع في تمير كباقي المدن المجاوره
وكل سنه اردى من الي قبلها .

[M J]

مدري أتذكر أني راد على موضوع يشبه هالموضوع !
يمكن أنه طار مع الباك أب الاخير ! , المهم ,
نرجع ونقول الديار اللي حولنا أغلب المتكفلين باحتفالاتهم
أهالي الديرة نفسهم وبمساعدة من البلدية ,
هنا الوضع يختلف .. فيه فئات من الناس ,
تطامر ليلها نهارها عشان مايكون فيه احتفالات !
و والاسباب مجهولة , يمكن مثل ماقال المتحد عنصريه !
أو مايبون ازعاج .. او عندهم نوع من " الغلو " بالدين ,
المهم .. ريح بالك ولا تحتري شيء .. و ضبط لك جدول
عشان تزور الاحتفالات بالديار اللي حولنا !

[ولد لندن]

عيبنا في تمير اعتمدنا على البلديه في كل شي
وهي ليست ملزمه باقامة اي مناسبه
ولكن الخلل في ابناء تمير وفرقتهم
فلم يعد لدينا مرجع في تمير كباقي المدن المجاوره
وكل سنه اردى من الي قبلها .
رد كافي ويختصر الكثير من التفكير لا املك الا ان اشكرك على صدقك مع نفسك قبل الاخرين لمصلحة بلدك

[أبو ريوف]

*** اخوي ( سمو الأمير ) / تمير لها قائد مخول من الأمير سلمان و لا أظنك تجهل أبو عبد العزيز

*** اخوي المتحد ( المتحد ) / نعم العنصرية هي التي ذبحتنا ، و كلماتك درر و رسالة لرجالات تمير


-------------------


*** بما أن أكثر العوائل بتمير مرتبطة بأعياد و احتفالات خاصة لها أول يوم فلا مانع أن يكون الاحتفال ثاني يوم ويكون بعيد عن إزعاج كبار السن و البيوت
ويكون بإشراف رئيس المركز وتجهيزات بلدية تمير و دعم رجالات تمير ، و مشكلتنا كل يغني على ليلاه و يبحث عن مصلحته

[المتحـ2007ـد]

يا اخوك هذا في نظرك ومن تحليل بطنك ...

انت شايف احد محقور .... او كل لاقط سيفه !!!!!

الديره وحده واهل تمير اخوان ...


هذي نظرة الجميع واللي على راسه بطحاء يحسس عليها

واللي يرفع خشمه لابد له من يوم ويندق مهما طال الزمن او قصر

الديره وحده وصغيره كلنا عيال قرية وكلأ يعرف أخية

والعيد ينفع بلا حنه

يعني لازم هياط وعرض عضلات وانا الاقوى والاحسن وانا دافع اكثر

اللي يبي حفلة عيد يحط صندوق ويكون في ايادي امينه ويتبرعون فيه اهل تمير

كلهم ليش نعتمد على كبار الشخصيات ونشحذهم

لو كل شخص دفع 100 ريال لكفت لأقامة حفلات عديده بدون اللجوء الى احد

فكروا بعقل وابن ادم ما راح يعمر في الارض مرده يموت ويدفن

[نبضك]

لو هذولاء الحسودين يسكتون كان تمير وبخير واحسن المدن


بس لما يتدخلون في شي مايخصهم في كل صغيره وكبير

تمير راح تضل زي ماهي ولا راح يتغير فيها شي

خلاص لمتى الحقد والحسد في قلوبهم

لانحس بطعم العيد ولا شي

[ط َـموح]

"


آلمُشكلِة إن النآآآس اللي يتسببون بآلاشيآء هذي كمآ سميتموهم بـآلحسودين . هُم منآ وفينآ . يعني مو غربآء

وإذآ مآقدم آلشي اللي ينفع ديرته وآهلهآ . وآلوجآهه آمآم المدن المجاوره . مآفيه خيرْ . ولآ يستحقْ آن يؤمن على شي .

آنآ قِلتْ بالمَوضوع آلسآبق . آنو السنه هذي رآحت بخيرهآ وشرهآ كـ إقامة احتفال لعيد الفطر .. ومما سبق إلغاء المهرجان السنوي .

خَلونا نوصل صوتنآ للمختص فيما فعله المتسبب . ويالله ينفذ العام المقبل ان كنا من الحيين ..

((( ربعن تعآونوآ مآذلوآ )))



//

[الاسير]

لو فيه مركز اماره قوي يجمع اهل الديره كان وصلت تمير الى مستوى احسن مماهي عليه الان
فلا احتفالات في العيد وهذي السنه لايوجد مهرجان صيفي
والبعض الاخر يقول تباهي وشوفه نفس سبحان الله لايزال تفكيرنا يرجع الى الورا والمدن والقراى المجاوره تفكيرها الى الامام

[ضحيه صمت]

والله صدقت يا النادر كل سنه اردى من الثانيه يشققون الطبول ولا فيه تنسيق ولا نضام وحوووووووووسه الله من واحد يردح وتكرفع في طرف الزوليه وكل واحد راز خشته عند الكمره كنهم اول مره يشوفون كيمره ههههههههههه والله من الفضايح نشوفها في الكمره الي كندرته طايحه والي شما غه مايل مع الحماس كن داخله سكني

[ضبيه]

حنا وش نقول يالحريم نتعيد في بيوتنا انا باكبر وسادتي وبنام استغفر الله كل الا ستراحات ماخذينها اهلها مافيه مكان نروح له الله لنا والرجال يتشرطون احمدوا ربكم بس وعن النعفقه

[أبشر]

الا فيه في تمير عيد وينك فيه انت ماتدري ؟؟؟؟

ماتشوف الشوارع مولعة فيها لمبات والدوار ما شاء الله لافينه بعقد لمبات الله يسامحك ياصاحب الموضوع البلدية تعمل على قدم وساق
وانت تقول مافيه عيد !!!؟؟؟؟

قالوا ايش قالوا بلدية تمير تستعد للعيد
اللمبات شارينها على حساب الحكومة
الكهرب موصل للمبات على حساب الحكومه
العامل اللي يركب اللمبات يستلم راتب من الحكومه

بالله وش سوت البلدية علموني واللي دافع ريال من جيبه يأخذ رياليين ^_^

خلوكم في سدير ربعنا ومنا وفينا وان شاء الله تصير حوطة سدير محافظة ونصير تابعين لهم ونمسك الصفوف كل عيد معهم سوااااا ^_^

[M A J E D]

. تمير انتهت
هذي كلمتي الووووووووحيد
قلوب مليئة
اونااااااااس غريبة
سبحان الله

[مجهول الهويه]

اقول بلا عرضه بلا خرابيط انا اول يوم العيد بمسك خط للكويت بحضر مسرحيات طارق العلي والمسلم رابع العيد او خامس انا في تمير ان شاء الله

[عبدالعزيز الهزاع]

الا فيه في تمير عيد وينك فيه انت ماتدري ؟؟؟؟

ماتشوف الشوارع مولعة فيها لمبات والدوار ما شاء الله لافينه بعقد لمبات الله يسامحك ياصاحب الموضوع البلدية تعمل على قدم وساق
وانت تقول مافيه عيد !!!؟؟؟؟

قالوا ايش قالوا بلدية تمير تستعد للعيد
اللمبات شارينها على حساب الحكومة
الكهرب موصل للمبات على حساب الحكومه
العامل اللي يركب اللمبات يستلم راتب من الحكومه

بالله وش سوت البلدية علموني واللي دافع ريال من جيبه يأخذ رياليين ^_^

خلوكم في سدير ربعنا ومنا وفينا وان شاء الله تصير حوطة سدير محافظة ونصير تابعين لهم ونمسك الصفوف كل عيد معهم سوااااا ^_^

سلامات يا الحبيب وش فيك مولع على البلديه وكنك ما صدقت احد يكتب عن حاجه يستفسر عنها عشان تجي تستخف دمك بردك هذا؟
البلديه على ما سمعت انها دائره حكوميه اي ان الحكومه هي من ترعاها وتدعمها وما ظن انك تبي الموظفين هم من يتكفل بالعيد ومتطلباته من رواتبهم هذا الي فهمته من ردك
بصراحه مدري وش يبي ردك احس انك ما تفرق بين دائره رسميه ودائره خيريه
هناك ردود يستفيد منها كاتب الموضوع ويتضح له بعض ما يخفى عليه
وهناك ردود تحاول ان ترمي حقدها وحسدها ضد اسماء واعلام كبرى من اهالي تمير فقط لامر في نفسه
لدرجة ان يهدد بدق خشومهم
اللهم لك الحمد على نعمة العقل وسلامة المنطق
لكن لو سئلت هذا الشخص هل كلامه عام على جميع المهرجانات في تمير ام فقط محدد باحتفالات العيد ماهو رده؟

اقول بلا عرضه بلا خرابيط انا اول يوم العيد بمسك خط للكويت بحضر مسرحيات طارق العلي والمسلم رابع العيد او خامس انا في تمير ان شاء الله

الله يهديك تفاخر بحضورك لمسرحيات فلان وعلان وانت لم تنهي بعد شهر رمضان؟

[سمو الأمير]

*** اخوي ( سمو الأمير ) / تمير لها قائد مخول من الأمير سلمان و لا أظنك تجهل أبو عبد العزيز




احترم رايك أخوي بلال
ولازلت مُصر تمير بلا قايد
عندنا بالمسجد فراش عينوه وإلى ساعك ماشفناه كل يوم مروح هندي ينظف !

[الموادع]

اقول بلا عرضه بلا خرابيط انا اول يوم العيد بمسك خط للكويت بحضر مسرحيات طارق العلي والمسلم رابع العيد او خامس انا في تمير ان شاء الله


كل امتي معافى الا المجاهرون ..
واذا بليتم فاستتروا
الله يتقبل منا الصيام والقيام ويعفو عنا وعن كل مسلم
اسئل الله لي ولك وللجميع المسلمين الهدآيه

[الناطق الرسمي]

تسمونها احتفالات ( طبول ورقص ) ؟ نبي احتفالات مثل العالم والناس فيها مشاركة اجتماعية ومسابقات وأشياء تنفع الناس .

جيبو لي فايدة للرقص والطبول ؟

[عالمي تمير]

لايحطون شي
العنصرية ذبحت أهل تمير
راس مالها الديار جنبنا
ربع ساعة وواصل

[قناة المجد]

العنصريه ليست بجديده على تمير
منذ ان تم تقسيم المدينه وانشاء مخطط الخالديه والعزيزيه وتقسيم الاراضي في كل حي بتلك الطريقه
التي الجميع يعرف خفاياها والعنصريه تطبق بكل قوتها على اي مشروع يأتي لتمير ولا ادل من ذلك مقر كلية التربيه
الذي كان موجها لتمير لكن بسبب العنصريه تم نقله لحوطة سدير

[عبدالعزيز الهزاع]

تسمونها احتفالات ( طبول ورقص ) ؟ نبي احتفالات مثل العالم والناس فيها مشاركة اجتماعية ومسابقات وأشياء تنفع الناس .

جيبو لي فايدة للرقص والطبول ؟


مثل العالم والناس كيف؟
كل الي حواليك من المدن عندهم احتفالات ورقص وطبول زي ما تسميها وش الجديد اللي تبيه؟
بعدين اذا جنابك مايبي الطبول منت مجبر تحضر فيه غيرك يحضر ويشارك خاصة من كبار السن ووجهاء البلد
وابشرك المسابقات والمشاركات الأجتماعيه ماقصرت لجنة التنميه بتسوي برنامج في العيد وفيه ما طلبته عساك تحضر وتشارك مو بس نتكلم ونطالب وحنا اخر من يدعم
لو بالمشاركه

[قالب ثلج]

وش رايكم هالسنه كل واحد يتعيد ويلبس ثوب أسود وشماغ زيتي ونسوي احتجاج عشان ثاني مره يسون حفله خخخخخخخخخخخخ
والا نطق لنا صيوان حق العزا ونقلبها مناحه خخخخخخخخ

[أبو ريوف]

فيه حفل معايدة ثالث أيام العيد في تمير

ورونا شطارتكم واحضورا يا أهالينا

[طير شلوى]

الحمد الله عيد تمير مازال يحافظ على عاداته وتقاليده بعيدهم في الحاره بجمعه الجيران والاقارب
وكلن جايب عيده والنفس مبسوطه وفرحانه بشوفتهم وجمعتهم يالله لك الحمد
وفي العيد الواحد يالله يروح يزور ويعايد اقاربهم وشيبانهم
وعقب العيد دورهم كاشتين في البر وموسعين الصدر
آمن وايمان ونعمه الله لايغيرها علينا

[مفك العجل]

بسم الله
بعد الدرسة اكتشفت هذا الخبر الغريب والعجيب ان المشكلة عدم احتفال تمير بالعيد التعصب الديني ويقولون الاختلاط الصغار با لكبار .. والبعض أتهم البلدية باتقصير ويتهمون بعض التجار اهل تمير وهذا الاتهام خاطئ
والله على ما أقول شهيد

[سمو الأمير]

بسم الله
بعد الدرسة اكتشفت هذا الخبر الغريب والعجيب ان المشكلة عدم احتفال تمير بالعيد التعصب الديني ويقولون الاختلاط الصغار با لكبار .. والبعض أتهم البلدية باتقصير ويتهمون بعض التجار اهل تمير وهذا الاتهام خاطئ
والله على ما أقول شهيد

أخي مفك العجل
مافيه شي اسمه التعصب الديني هذا شرع الله ماشرعه فلان وعلان
وبعدين حتى لو كان هذا أحد الأسباب وش مضيق صدرك مع أن كلامك لايمكن يدخل العقل
تتكلم وكأنك في مجتمع ملائكي وأنت لايخفيك ذلك وأجزم بذلك!
والحين التجار والبلدية اصبحوا على صواب وصار التعصب الديني هو الخطأ عجباً لك ياأخي

[¬»طيـوف آنثى●●❥]

الحمد الله عيد تمير مازال يحافظ على عاداته وتقاليده بعيدهم في الحاره بجمعه الجيران والاقارب
وكلن جايب عيده والنفس مبسوطه وفرحانه بشوفتهم وجمعتهم يالله لك الحمد
وفي العيد الواحد يالله يروح يزور ويعايد اقاربهم وشيبانهم
وعقب العيد دورهم كاشتين في البر وموسعين الصدر
آمن وايمان ونعمه الله لايغيرها علينا


كلامك عين العقل يااأخووي
هذاء الي نبي اهم شيء النفس تكون مبسوطه
واذا كان ع حفلات ومسابقات ياليت يكون هناك دعم بينكم ياشباب تمير
مانبي فئه تدعم بكل مالديها وفئه جالسه وماتسوي اي شيء
وبكذا كل واحد يعتمد ع الثاني فلان ماراح يسوي شيء انا بعد بصير مثله ماراح ادعم ولاشيء <<الاغلبيه حالهم مثل كذا
يعني ع ذا الحاله ماراح يكون هناك اي تكافل وترابط بين اهالي تميروماراح نطلع باي حفلات ومعايده
اتمنى ان ششاءالله الايام القادمه تطلع احسن من السنه هاذي
ونشوف الهمه والتعاون بينكم ياأهل تمير


ومضضه:
اخي ~(مجنونك)~
لها الدرجه فرحان انك بتروح تشوف مسرحيات فلان ومدري ايش
لو قدرالله وصار لك شيء بالطريق وش راح تكون الخاتمه لك
اسال الله لك الهدايه
ع الاقل ياليت تقول اروح لعمره ولازيارة اقارب وش له المسرحيات الي مالها نفع لا بالدنيا ولابالاخره

[قالب ثلج]

بسم الله
بعد الدرسة اكتشفت هذا الخبر الغريب والعجيب ان المشكلة عدم احتفال تمير بالعيد التعصب الديني ويقولون الاختلاط الصغار با لكبار .. والبعض أتهم البلدية باتقصير ويتهمون بعض التجار اهل تمير وهذا الاتهام خاطئ
والله على ما أقول شهيد

اربط صواميلك زين تراك بديت ترج واحتمال ينطلق عليك الكفر ثمن تنجعف على راسك :t20: خخخخخخخخخخخخخخخ

[طير شلوى]

ومن بغى زود افاده يروح يتعيد في الرياض يشوف عيدهم ،
عشان يدري انه في نعمه في هالقريه الجميله .

[الليث القادم]

الحمد الله على نعمة الاسلام
يعني لا زم طبول ورقص العيد رح سلم على أقاربك وعايهم
اللهم لك الحمد المسلم يرجو من الله القبول في عمله الصالح ويفرح بالعيد على ما شرعه الله

[غلا نجد]

حنا وش نقول يالحريم نتعيد في بيوتنا انا باكبر وسادتي وبنام استغفر الله كل الا ستراحات ماخذينها اهلها مافيه مكان نروح له الله لنا والرجال يتشرطون احمدوا ربكم بس وعن النعفقه




عااااااااد جاء دور هوااااااااش الحريم خخخخخخخخ

ياضبيه ليش تكبرين وسادتك..

موب لازم استراحه ماينفع العيد الا بحنا..

اجتمعو في بيت احد منكم .. والدعوه على اجتماع الاقارب ووناستهم مع بعض

يمكن الكل يتهرب ماحد يبيه عنده؟؟؟ اجل وشو له حاط هالقصور وهالمجالس للتراب والغبار..

اجمعو اقاربكم واستانسو والضيق في الانفس

موب كل سنه بنلحق على العيد وصلة الارحام

تسلميين...


واللي كاتب الموضوع... خخخخخخخخ



بعد هالهواش طلعت اللي في صدورهم وريحتهم

الف شكر

غلا نجد

[قابوس تمير]

تهاوشتو على عرضه.. اقول كل واحد ياخذ له دجاجه ويروح للدكات ابرك له يكبسها

[Prison break]

^^^^^

قل لحم .. اشوى ..

والااللحم غالي يا الغالي..

[الاسير]

الي يقول البلديه مالها دخل

يعلمني من الي قايم با حتفالات الرياض والمسرحيات لايكون رجال الاعمال ولا المواطنين دافعين شي من جيوبهم الامانه هي الي قايمه بكل شي

[ط َـموح]

"

يآ آخوآن آستهدوآ بآلله .. نحن آلآن في آخر يوم من هذآ الشهر الكريم ..

والعيد الليله إن شآء الله .. خلآص مآيدمي يصير اي شي . وهالسنه راحت ..

بس فيه حاجه مااعجبتني وحاب اعلق عليها .. ان كل واحد يرمي الخطأ على من أرااد ..

فيكم من يقول البلديه مسؤوله وهم مقصرين بحق الديره ووووو .. وفيكم من يقول لآ هذآ الشي من واجبات مركز تمير .. ولآ فيه اداره مضبوطه وووو

وفيكم من يقول الاهالي نفسهم وان فيهم من الحقد والحسد والعنصريه وووو ..

شي تمنيته يصير .. > إذا تكلم الوآحد يجب ان يعي مايقول . وبكل ثقه .. مو على أنها رد على موضوع وسواليف ..؟!!

آختم مشاركتي في هالموضوع بهذآ الرد ...

وكل عآم وانتم بخير ... ~

[راجح الاوزان]

والله يلدكات ولحمه الحاشي
انها اطلق من هالهواااش

اقول اخوي مجنوك مامعك مركب ولا اروح على موتري
خخخخخخخخخ

[قالب ثلج]

لاتجيبون طاري دكات ثمن نبلش مانلقى مكان خلوكم في احتفالات سدير تراهم يصرفون لكل واحد طبل وسيف ودرع بعد خخخخخخخخخخخخ

[قابوس تمير]

الي يقول البلديه مالها دخل

يعلمني من الي قايم با حتفالات الرياض والمسرحيات لايكون رجال الاعمال ولا المواطنين دافعين شي من جيوبهم الامانه هي الي قايمه بكل شي


معليش اخووووي الامانه مادفعت ولا ريال الامانه دورها في الحفريات وخراب الشوارع معك .. لكن احتفالات العيد كلها من الشركات الراعية وداخل موقعهم وشف حتى في الجرايد تشوف الاعلان وتحت الشركات الراعية

[قابوس تمير]

الي يقول البلديه مالها دخل

يعلمني من الي قايم با حتفالات الرياض والمسرحيات لايكون رجال الاعمال ولا المواطنين دافعين شي من جيوبهم الامانه هي الي قايمه بكل شي

لا ياخوووي الامانه دورها في الحفريات وخراب الشوارع .. ولا ددفعت ولا ريال جهزت المكان بالنظافه وعقود الانوار لكن الدعم كله من الشركات الراعية زي كل سنة >> للتوضيح

[المكتب الخاص]

اكسبو الراحه هالسنه ابرك لكم

[لجنة التنمية الاجتماعية]

احتفالات عيد تمير 31

http://www.tumaer.com/vb/showthread.php?t=74639

وكل عام وانتم بخير

[تميراوي قديم]

تقبل الله منا ومنكم الصيام والقيام
وكل عام وانتم بخير

[الهجين]

ياعبدالعزيز الهزاع لاتقول مثل الناس فهذا تقليد أعمى وابتعد عن مايغضب الله ولا تأمر بالمنكر فالطبول محرمة والرقص للنساء ولا تورط الناس معك في الحرام فسيتعلقون برقبتك يوم القيامة

[عبدالعزيز الهزاع]

ياعبدالعزيز الهزاع لاتقول مثل الناس فهذا تقليد أعمى وابتعد عن مايغضب الله ولا تأمر بالمنكر فالطبول محرمة والرقص للنساء ولا تورط الناس معك في الحرام فسيتعلقون برقبتك يوم القيامة
اعوذ بالله مابقي عليك الا تخرجني من الاسلام
هل تعتبر العرضه مشابهه لرقص النساء؟
هل بكلامك ان اجدادنا وابائنا من مارس هذا اللون الحماسي و الوطني قد ارتكبو احدى الكبائر؟
لا احد يمنعك من ابداء رايك لكن بحدود المعقول ولا تكن صاحب غلو في حكمك على الغير
ثم للمعلوميه هناك الكثير من المشائخ شاركو في العرضه السعوديه مع خادم الحرمين الشريفين

[الهجين]

ياعبدالعزيز الهزاع نحن لانخرج أحد من الإسلام بسبب المعصية بل الإيمان يزيد بالطاعة وينقص بالمعصية وأنا أهم مافي كلامي حكم الطبل ومعليش إن كاني جرحت مشاعرك وإليك فتوى ابن باز رحمه الله :
حكم العرضة النجدية( ) المصدر اسئلة الجامع الكبير من خلال موسوعة صوتية تحت الإعداد مؤسسة الشيخ عبد العزيز بن باز الخيرية
مداخلة : عن العرضة النجدية
[هذه إن كانت للتدرب على حمل السلاح كالسيوف والبنادق والرماح وأشباه ذلك مما يستعان به في الحرب كالدرق والحراب، كما فعل الحبشة في مسجد النبي صلى الله عليه وسلم في عهده عليه الصلاة والسلام، فهذا لا بأس به، وهذا من باب التدرب، ومن باب إعداد القوة؛ ولكن لا يكون فيها ما حرم الله من الموسيقى والطبول وآلات الملاهي، لا. بل تكون بالسيوف، بالرماح، بالدرق والحراب، وأشباه ذلك، والأشعار العربية التي فيها مدح الشجاعة، مدح الكرم، مدح القوة وما أشبه ذلك،

[العزي]

خخخ أوم الشعب الفاضي <<< جالس تحت المكيف ويطقطق عالكيبورد ويقول أراكم ما تسون وليش ما تحطون !!

ليته يوم حطو حضر !!

ألحين لجنة التنمية ما قصرت حطت لكم مهرجان مصغر وجايبين لكم ناس من أفضل الشعراء ولا شفنا أحد هناااك ؟؟

وش السبب ؟؟

والله فشلتونا ...
الله يحفظ ديرتنا من البلاء والجلاء ونحافظ على عاداتنا وتقاليدنا ..
تجمع الجيران في أول أيام العيد فقده الكثيير من الديار الأخرى ونحن ولله الحمد مازلنا محافظين عليه
الله يفكنا من العرضة وغثاااها


ما قصرتو يا لجنه التنمية على هالأحتفالات ,,

[mux300]

كل عام وانتم بخير وعسان وياكم من المقبولين
الاحتفالات والمناسبات من مسؤليات المجلس البلدي يحب علية الأهتمام والتنسيق مع رجال الاعمال وكلهم فيهم خير علشان كلن يفرح بلعيد وخاصة الاطفال .

[مؤدب الشباب]

اسمع جعجعة ولا أرى طحنا
تضرب مثلا للشخص كثير الكلام بدون فعل
كثر الكلام والكتابة من خلف الشاشة والمطالبة بحفل ولما أقيم لم نرى احد عجيب أمركم
قال الله تعالى : ] يَا أَيُّهَا الَذِينَ آمَنُوا لِمَ تَقُولُونَ مَا لا تَفْعَلُونَ * كَبُرَ مَقْتاً عِندَاللَّهِ أَن تَقُولُوا مَا لا تَفْعَلُونَ [ [سورة الصف : 2-3]
والله انتم مثل السراب تحسبه ماء وإذا وصلت له لم تجد شي
لكن أقول للجميع

وما من كــاتب إلا سيفنى … ويبقى الدهر ما كتبت يداه

فلا تكتب بكفك غير شيء … يسرك في القيامة أن تراه

[عنيدالحب]

ممم الموضوع صار له فتره بس لازم اثبت وجودي<<:t175:تلاين ياشيخ..

لان باقي شهرين ع عيد الاضحى فلازم ارد<<:79:بلوك...


والله من وجهة نظري ان مالها داعي الاحتفالات صجه ولجه وهوشه ودوسه..احنا الحمدلله ماعمرنا حضرنا احتفالاتكم ..احنا احتفالاتنا مع اقاربنا سبوع كامل واللي بيجي البيبان مفتوحه من مر وقف يعني ماعمرنا طبينا هل حفلات اللي تقولون عنها لااحنا ولا بزاريننا((الوراعين:t89:)) ,,احتفالاتنا مع اقاربنا احسن..انا حظرت مره وحده كان بااول الاجازه الطويله سنة من السنوات بس للاسف شفت اشاياء ماعجبتني ,,بعض الناس يحظرون لااجل هدف واحد ليس الاستطلاع ع المسابقات او العرضات...وانتم تعرفونه زين.....واللي يثبت هذا لما يحطو حفل بااول الاجازه كل سنه بتشوفون العالم والكل جالس على الثيل والمكان والكراسي اللي فيه العروض فاضيه مافيها الا الشياااب....هذا الواقع...فليش الخساير والله حرام...احسن شي كل واحد يجتمع مع اقاربه ايام العييد ويقدرون يسوون حفلات خاصه لهم بيكون احسن والله

[عبدالحميد بن ناصر]

مرحبًا بجميع من تداخل وزار وقرأ الموضوع ..
وكل عام وأنتم بخير ..

نقدر جميع الأراء التي طرحت ونحترم وجهات النظر ..

وليعذرنا كاتب الموضوع في إغلاقه لأنه قد أُشبع نقاشًا .. !!
ونأمل أن استفاد منه أهل الاختصاص بالمناسبات والاحتفالات في مدينتنا ..

شكرًا للكاتب ..
شكرًا لمن تداخل ..
شكرًا للجميع ..

[المحبة للخير]

السلام عليكم ورحمة الله وبركاته
حابه أسألكم وين أحتفالات أهل تمير بالعيد وين العرضة النجدية لأني ماشفتها لا في المنتدى ولا التلفزيون السعودي ومشكورين.

[ولد لندن]

السنه

[نبضك]

مافيه احتفالات ولا شي