مشاهدة النسخة كاملة : من عنده خبره في طبخ الكاتم ؟
ملك روما
21 / 02 / 2005, 41 : 02 PM
بعد التحية...
اشتريت قدر كاتم ...واحب اعرف طريقة الكبس فيه ..سواء كان دجاج او لحم ..
هل اقوم ((حلوة هل اقوم ...)) ...احمس البصل اول شي ؟ او كلش جميع وهو ينحمس في القدر
متى افتح القدر ...كم الوقت اللي اخليه يبخر ...واقصر ناره ...او اطفيها ؟؟؟
امور كثيرة احب اعرفها ...من اهل الخبرة ....للجميع تحياتي ...
http://www.mekshat.com/pix/upload/images6/mk7654_IMGP0222.JPG
مكشات
اتيكا
22 / 02 / 2005, 05 : 01 PM
أخوي ملك روما إليك كبسة بالكاتم حسب الطريقة المفضلة لدي الشيف اتيكا
مكونات الطبخة وطبعا ماهي اجباريه يعني ممكن تقلل وممكن تزيد
- لحم مقطع أودجاج على حسب الرغبه
- حبتين بصل مفرومه ( يعني مقطعه )
- حبتين طماطم كذلك مقطعه
- فصين ثوم مهروس ( حسب الرغبة وممكن الاستغناء عنه )
- كميه بسيطه من البزار واذا ماتيسر حط من المهران
- ملح حسب الذوق تقريبا ملعقتين ونصف
- ثلاث ملاعق صلصة طماطم
- حبتين لومي اسود
- أربع أعود قرفة ( الدارسين )
- أربع أعود قرنفل ( المسمار ، العويدي )
- حسب الرغبه ملعقتين متوسطه فلفل أسود مطحون
- حاب تضيف فلفل حار مقطع
- الرز حسب عدد الاشخاص والافضل تغسل الرز وتنقعه قبل تبداء الطبخ
وبعدها تجيب القدر الكاتم وتحط قليل من الزيت يعني ملعقتين وترفعه على النار وتحمر البصل فيه يعني تحمسه الين يبداء البصل يذوب ومن ثم تضيف له الملح والفلفل والومي والدارسين والمسمار وبعدها تضيف اللحم أو الدجاج وتحمره معه بالتقليب المستمر بعدها تخليه الى ان ينشف من السوائل تضيف عليه الطماطم والثوم ومن ثم الصلصه وتذوب الطماط بعد كذا تضيف الماء على المحتويات وتكتم عليه وتخليها إلى أن تغلي مع بعض وتتجانس وتحسب له من بعد دوران الصمام (الصفارة) تقريبا مابين عشر دقايق إذا كانت دجاجة و ربع ساعه إذا كان لحم بعد ذلك تقوم بشخل الرز من الماء المنقوع فيه وتضيفه إلى الكاتم وتحركه وهناك طريقه لمعرفة القدر المناسب لكمية الماء للرز وهي تغرس الملعقه بوسط الرز اذا ثبتت فالكمية مناسبه وبعدها تقوم تغطي القدر الضغط وتخلي على نار هادية مدة اقل من خمس عشر دقيقة طبعا بعد هذا كله اتمني الطبخه تعجبك وعطيتك بالتفصيل الممل علشان تستوعبها ولا تنسى الملح تذوقه يمكن تحب الطبخه مالحه زيادة فزيد حسب رغبتك
ملاحظه : لحمة الغنم تحتاج بالقدر الكاتم ربع ساعة بالضبط و لحمة الحاشي لو هو صغير 25 دقيقة و الدجاج عشر دقائق أما الرز ربع ساعة بالضبط على نار هاااااااادية
ملك روما
01 / 03 / 2005, 05 : 09 PM
بيض الله وجهك...
يعطيك الف عافية ...ما قصرت ..
بجربها ...وبشوف....وان شاءالله تظبط...
وابيك تواعدني ...تتعشى معي ...قل تم ...
تحياتي وتقديري..
هادي
02 / 03 / 2005, 09 : 10 PM
اخوي ليتك تحدد شكل القدر الكاتم
هل هو ربط او من الموديلات الجديده
سلام