قصة وقصيدة راشد ابن الذيب( الولد وان طاب طيبه من خواله)

[طير شلوى]

الصبي وان طاب طيبه من خواله... وان تردى فـعلم انهم خايبينـي
أشرب الفنجـال واكـب البيالـة... طيـبٍ واحـب سلـم الطيبينـي
[[[السلام عليكم ورحمة الله وبركاته ]]]
من لا يعرف .. هذين البيتين .. بيتين اشهر من نار على علم ..
قد يجهل البعض قائلهما .. ولكن اكيد سمع بالبيتين من قبل ..
حتى اصبح مضرب مثل يتداوله كثير من الناس ..
قائل هذين البيتين ..
الشاعر / راشد بن حسن بن مانع بن رحيان الضاعني الملقب بــ ( ابن الذيب )

وهو والد الشاعر محمد ابن الذيب

..وقيل انه توفي عام 1986م وهو في نجران وكان شايل معه شخص موصله الى قرية في نجران وحصل عليهم حادث وتوفي رحمه الله ..
راشد بن حسن .. كان يشتغل في شركة ارامكوا السعوديه .. وكان يملك سيارة الشركه ( جمس ارامكوا ) ..
وكان كل ما شاف له رجلي والا طرقي على الخط يبي احد يوصله يقوم ابن الذيب ويوصله بدون مقابل .. على سيارة الشركه ..
حتى اشتهر عند البدوان .. لا جا احد يبي يروح مكان ولا عنده مطيه والا موتر .. يمشي في طريقه ويقول عسا يلقاني ( ابن الذيب ) على الطريق والا انا القاه ..
ويشيلني ويوديني للمكان اللي انا ابيه .. حتى قاموا الناس يطرونه ويحكون فيه وهم لا يعرفونه ولا قد شافوه ..
جاء يوم من الايام الا عجوز وعندها غنم شوي تعد على الاصابع .. و ( راشد بن حسن ) .. كان مشغول ومتأخر على الدوام شوي ..
وشاف العجوز وشاف معها غنم تعداها وهملها .. عقب حزت في خاطره واستحى وراعي الطيب ما يجوز عن طيبه وقف الموتر ورجع للعجوز
يوم جاها قالها يا مره انا ابشيلك وبوديك المحل اللي تبينه لكن بدون غنمك .. انا متأخر على الدوام واخاف غنمك تأخرني زياده ..
قالت له العجوز .. خلاص رح الله يستر عليك يا ولدي ..
انا جالسه هنا انتظر ( ابن الذيب ) ..
هو اللي بيجيب العلم وبيوصلني المكان اللي انا ابيه انا وغنمي .. وهي ما تعرفه .. ولا تدري انه ( ابن الذيب ) .. هو نفسه اللي هي تكلمه .
يوم انصدم ( راشد بن حسن ) بقولها .. وتعجب !!
قال اركبي يا خاله انا ( ابن الذيب ) وابشري بعزك ..
ابوصلك انتي وغنمك ..
وكانت انظمة ارامكو تمنع السائقين ان يشيلو الرجليه اللي يوقفون السواقين ويطلبونهم توصيلهم على طريقهم .. وشلون توصيل الغنم ؟؟؟؟؟
حتى وصل علم .. لشركه بفعل ( راشد بن حسن ) .. وهدد بالفصل من الشركه اكثر من مره .. وبعض رؤساءه يأسوا من المحاوله معه .. واعجبتهم شهامته ..
وصل العجوز إلى منصاها والمكان اللي تبيه ..
وقال هذى القصيده .



قالها ابن الذيب من هاجـوس بالـه
كلمـةٍ يلعـب بهـا والبـال زينـي
قالهـا يومـه طرالـه ماطـرالـه
من هواجيسٍ تشيـب المرضعينـي
حالفٍ ماخذ على الطرقـي ريالـه
وبالثـلاث محـرم أنـه مايجينـي
لالقيت اللي على ( السكه ) لحالـه
يلتفـت ويقـول ويـن المستحينـي
أوقف الموتر حيـا وأبـي الجمالـه
يوم ولـد الـلاش وجهـه مايلينـي
الطمع في كـروة الرجلـي رذالـة
.خص وان جابه مجـال الغانمينـي
والردي فـي حالـةٍ ماهـي بحالـه
واعوينـه مـن كـلام الطيبيـنـي
الردي لـو بـان مايذكـر عمالـه
مايعـد الـلاش مقصـور اليمينـي
أركبـه لعيـون مـن زيـنٍ دلالـه
ماتحاكـوا فـي قفـاه الرامسينـي
مابغى غيري وانـا مابغـى بدالـه
.قاعدٍ لـي بالرجـا مـدة سنينـي
الصبي وان طاب طيبه من خوالـه
بالخـوال يسـال قبـل الوالدينـي
أشـرب الفنجـال واكـب البيالـة
تابـعٍ سلمـي سـلـوم الأوليـنـي
ولاقعدنـا بالعمـل بنـا الـرزالـة
.ناخـذ العليـا طريـق الفايزينـي
غرني بعض الرجـال بكثـر مالـه
مادرى ان الموت في حبل الوتينـي
كيف ينفعني وابا(..........) خالـه
مايقوم البيـت دام السـاس طينـي
ماش وين اللـي عوايـده الجمالـة
مثل ابن ظافر حمـد ليتـه يجينـي
الثنـا والجـود دايـم فـي خيالـه
علمـه ظافـر سلـوم الطيبيـنـي
جـوّد العليـا ولزمّـهـا عيـالـه
وادركوا من علمتـه دنيـا ودينـي
واهني من باع حظه واشتـرى لـه
وسار في درب النبي وأخزى اللعيني
موقفـه ماكـل رجــال ينـالـه
من بغـى ممشـاه يقعـد مرتينـي
كم ذبح من حايلٍ مـن حـر مالـه
وعادتـه لطمـة خشـوم العايلينـي

[جار القمر]

شكرا طير شلوى استمتعت وانا اقرا هذه القصة والقصيده

[سُلاَفْ القَصِيدْ]

أبيــات جزله ..
صح لسآآآنه والله يرحمه ويغفرله.
وإختيار جميل وموفق وذوق راقي
احترآمي

[ابن المملكة]

فعلا القصيدة جميله ومن شاعر كبير رحمه الله

[» اِلـَوَفْآءْ بـِنْـتْ]

آختيآر جميلْ
آبيآتْ آشهرْ منْ نارْ على علمْ
عوآفي أخي الطيرْ

[قصام]

صح لسان الشاعر
وموفق في الاختيار وهذا يدل على ذائقتك الشعريه
تقبل مروري

[طير شلوى]

اسعدني تواجدكم الطيب هنا .

[حـلآي مـعـذب غـيـري]

مشكور طير على روعه نقلك