الاستسقاء

[راعي الاولة]

قصيدة للشاعر ناصر بن عبدالله السعيد .


يا الله بغيث سحابه كل ماهل ارتوابه=وادي في نجد هلك جايع تقنب ذيابه
كل ما لاحت مزونه يجهر اللي يشوفونه=ما يحيل الليل دونه ينهب الظلما نهابه
في ظلام الليل كنه لا شعق برقه وسنه=تقل شمس في قوايل من لمح برقه يهابه
كل ما طنت رعوده والحيا نقض جعوده=زامي بالقاع زوده والفلا تجري شعابه
لانتهض مزنه وهلي تقل ضلع تقل تلي=كل ما خلب وزلي عمره نكسة ربابه
عشرة أيام تتالا كلها برق تلالا=لا شعق عز الجلالا زين مزنه وانتصابه
يسعد الروح العليلة لا همل وبله وسيلة=قرة عيون تخيله مرحباً والف هلابه
لا همل ماله وصيفي راكد وبله مريفي=يجعله غيث مغيثي ديمة يمطر سحابه
يرتوي من خير فيضه كل وادي وكل فيضه=يشفي الروح المريضة شوف سيله وانسيابه
كل عسر فيه يسرا وكل كسر فيه جبرا=الرخا عقب الشدايد والسهل عقب الصلابة
التجي لك يا إلهي انت عزي وانت جاهي=الرجا لك والتوكل ما حد غيرك نهابه
منزل ماؤ هنيا سائغ شربه عذيا=كل شي منه حيا سنة الله في كتابه
لا همل وبله طشاشا يسقي ديار عطاشا=الزهر والعشب طاشا ارتهش به وانتشابه
لا شمل غيثه وطنا وهتنا قلب المعنا=من نماه الطير غنا كاسي عشبه هضابه
تنبت فجوج وسيعه قلبه الله يا ربيعه=ما حلا شوف الطبيعة والزهر فاحت عذّبه
واهتنت كل البوادي بالمراعي والسدادي=الرخا والخير زادي ناقش عشبه خضابه
ينجلي همي وغمي يوم جم البير زمي=لاعتلا فوق المطاوي صافي حلو شرابه
ما حلا هاك الغرايس كنها زين العرايس=يوم جاها السيل مايس يا عجايب يا عجابه
وما حلا بل تحانت مع رياض العشب زانت=استهلت واستكانت وركدت عقب التعابه
لانتهض مزنه وجالي يمسح خشوم الجبالي=تقل جال على جالي في دنوه واقترابه
يسري طبوق (ن) طبوق لاحم من مابه فتوق (ن)=كنه الليل بظلامه لا سدل خمرة حجابه
يسقي ديار الجزيرة ما يخلي ولا ديرة=ما يخلي كل وادي وكل قفر ما وطابه
من حدود البحر الأحمر لين حد الشرق يظهر=ينهمل وبله ويمطر شابك فيه اقتضابه
اطلب الله كل ساعة والدعاء نعم البظاعة=علها سمع وطاعة ساعة فيها استجابة
الدعا مخ العبادة عدة المؤمن وزاده=الدعا للواحد اللي دايم نرجي ثوابه
اللهم انا عبادك يا عظيم في جنابك=نسألك غيث مبارك يسعد القلب انصبابه
في رجا رب كريم جل في شأنه عظيم=يا رؤوف يا رحيم ياعظيم في جنابه
اسألك باسمائك اللي نور قلبي يا متعلي=اسجد لوجهك وأصلي الدعا لك والأنابة
تسقي البيد وشجرها والقرايا مع حجرها=يا اله جابر جر ح تمكن به صوابه
والختام احلى ختاما للنبي خير الأناما=عد من صلى وصاما من جموع ومن صحابه
النبي الهاشميا مروي القلب الضميا=الحضيض اللي مشا من صوب دربه واقتدابه
جاهد الأمة وصابر ما رفع نفسه وكابر=لين عمت واستتمت دعوته بر وغابه
ما يضره هرج حاقد عابد لله ساجد=قدوة الخلق المبجل عزه الله في خطابه=

[سويد السويدي]

صح لسانك وارتفع شانك