ياليتني عن مطلع الرجم عايف

[فـ تميم ـارس]

ياليتني عن مطلع الرجم عايف
مالي ومال الصوت في روس الاقذال
عزالله ان جالي براسه كلايف
وجاوبت ورقاً ..صوتها بالغناء طال
يلوفني مع بعض الافكار لايف
حاولت فيها احتال.. وزريت لاحتال
على زمانٍ فات دمعي ذرايف
ذكرني المرقاب بأيام ولليال
ومافات مات ولاتفيد الحسايف
حملي على متني.. يوزان له جبال
الله من دنياً غريبة وصايف
ايجي بها مالٍ ..ويقفي بها مال
ياكم فيها من صديق وولايف
حال القدر من دونهم والزمن حال
يلومني خبلٍ هروجه ضعايف
خبلٍ يحسب الطيب بجنيه وريال
الطيب كايد.. والمراجل عسايف
والمرجلة ماحازها.. كل رجال
الطيب يبني لي قصورٍ نوايف
اللقى بها عن هرج الانذال منزال
واللي بنى بيته على جال هايف
يبى يجي يومٍ به البيت ينهال
دنياك يابن آدم مثل ما انت شايف
تضرب بعاشقها من الجال للجال
تومي به اوماي الجمل للسفايف
يصبح على حالٍ.. ويمسي على حال
ومن ضاع دله واختلف فالخفايف
عليه لاتشكي من الوقت لامال
بالك تذرابه ولو كنت خايف
بعض الشجر ماتحتها برد.. وضلال
وكم من رديٍ في هروجه طرايف
تفتح لها مع طيب القلب مدخال
بحلو النباء.. والهرج ماهر وحايف
ورجولته في ثوب.. وشماغ ..وعقال
اظهرت ماخفن الضلوع النحايف
نصايحٍ تبقى من اجيال لجيال
والشعر قولٍ ورخته الصحايف
يفتل به احبالٍ.. وينقض به احبال
والقول يوزن قبل لفظ الشفايف
والصمت بعض احيان خير من الاقوال

[ذيب النشاما]

خبلٍ يحسب الطيب بجنيه وريال
الطيب كايد.. والمراجل عسايف

والمرجلة ماحازها.. كل رجال

الطيب يبني لي قصورٍ نوايف

اللقى بها عن هرج الانذال منزال

تسلم لنـــا أنــاملــكـ يا فـــارس فعــلاً أســم على مسمـــى
صــح لســـان الشـــاعر وصــح لســـانكـ يالمبـــدع
ولا هنـــــت ..........

دمــتـَ بخيــــر

[شموخ أنثى .ღ.}]

//
\\
*

والقول يوزن قبل لفظ الشفايف
والصمت بعض احيان خير من الاقوال
آبيات ومعانيـ رائعهـ
تسلم يدينكـ
على هذا الاختيار المميز
بـ تميز حضوركـ
لاهنت

..,