الحـر يزكـى .. والدجاجـه.. دجاجـه

[البحر الهادئ]

الحـر يزكـى .. والدجاجـه.. دجاجـه = وماني علـى بعـض المقاريـد مجبـور

الضـرس قلـعـه لا تـألـم عـلاجـه= لا صار مـا ينفـع معـه طـب دكتـور

وحكي القفى في الناس عيـب وسماجـه= وإللي يتتبـع عـرض الأجـواد مثبـور

نـارد قـراح المـاء ونتـرك همـاجـه=هـذا لنـا مبـدأ.. ومنهـج.. ودستـور

واللي يطفـي فـي الغـداري إسراجـه=لايحتري قمـراء ..ولا يرجـي النـور!!

تـراه يضيـع صيدتـه فـي عجـاجـه= لا يسمـع الناصـح ولا يأخـذ الشـور

والكل يبخـص فـي الشدايـد خراجـه= لانشبت اللقمة من الغبـن فـي الـزور

والحـظ لابـان الـردى فـي حجاجـه= أصبـر مـدام الصبـر ياخـوي مقـدور

الله خلـق كـونٍ وسـيـعٍ.. فجـاجـه= والعبد لـو يطـرد ورا الـرزق معـذور

و(راع) الرفيـق ولا تعـكـر مـزاجـه= خلـه سعيـدٍ دايـم الـدوم مـسـرور

كسر الخواطـر مثـل كسـر الزجاجـه= نفس البشر دم.. وأحاسيـس.. وشعـور

وإللـي يتصـدد مالكـم فيـه حـاجـه=يالله عسى إللي يدور الستـر.. مستـور

وحذرا تصير لبعض الألسـن (علاجـه) = بعض البشر يحلف.. ويشهد ..على الزور

والتمـر يعـرف طيبـه مـن خمـاجـه= ماجور ياللـي تدهـل الطيـب ماجـور

الـواحـد القـهـار راعــه ونـاجـه=الله يكافينـا مـن الضـيـم والـجـور

يقولـه إللـي قاسـي الوقـت عـاجـه= صابر وهمـه داخـل الجـوف مقبـور!

عبدالرحـمـن عـبــدالله المـجـلـي

[أمير الحروف]

كسر الخواطـر مثـل كسـر الزجاجـه
نفس البشر دم.. وأحاسيـس.. وشعـور

وإللـي يتصـدد مالكـم فيـه حـاجـه
يالله عسى إللي يدور الستـر.. مستـور
****
تسلم أخوي البحر الهادئ

أختيارات عذبة وشاعرية كبيرة

وهالقصيدة لؤلؤة من بحرنا الهادي

لك كل الشكر

وتقبل تحياتي

[ولدعنبر]

والتمـر يعـرف طيبـه مـن خماجـه

ماجور ياللـي تدهـل الطيـب ماجـور

سلمت لنا

اخي البحر الهادئ

على اتحفنا بنقل هذه القصيده

وصح لسان قائلها

[المدرس]

الله خلـق كـونٍ وسـيـعٍ.. فجـاجـه
والعبد لو يطـرد ورا الـرزق معـذور

قصيدة اكثر من رائعة

بارك الله فيك

[نقا هشال]

اختيار متميز
تسلم
وصح لسان الشاعر..

[هبوب الشمال]

قصيدة جزلة


الف شكر لك اخوى على هالابداع