قصــــــــائـــد خــــــــــالـــدة ........

[المدرس]

شي بقلبي ياملا حاير فيه ===شي تحير ابه العقول الفهامي

مخفيه بفوادي ولا ودي ابديه == وادو الخيرات شرق وشامي

احترت به ماشفت شي يحاليه == واليوم ابنشر عنه مانيب كامي

{سيل حدر مع وادي غير واديه == مدري حلال ماه والا حرامي}

كأنه حلال وجايز شرب صافيه === وش حرمه يا مفسرين الحلامي

هاتو تفاصيله وهاتو معانيه === نبي الدليل اللي عليه الكلامي

نبي دليل يفهم الدرب ماشيه == يمشي به التايه بليل ظلامي

يمشي به التايه ويقدي مواطيه == ويشرب قراح الماء ليا صار ظامي

لاشك هجسي يوم خلا مماشيه == انه حرام ومنه زود الاثامي

احرم من الزقوم مره وحاليه == وشربه على الضامي يزيد الهيامي

الله من قلب همومه تقزيه == تدك به مثل الجراد التهامي

من ماجرىقامت تتله مشاحيه == تل الرشا من فوق هدف المقامي

روابع قامت تصيبه وتخطيه === شاف الهوايل واختلاف الاسامي

مايسمع الداعي ليا قام يدعيه == يعوم في بحر من الهم طامي

ماينتبه للي بصوته يناديه == يزيدهمه يوم كل ينامي

يشوف وقت ماعرفنا تواليه == وقت يشيب من بسن الفطامي

هذا زمان كاثرات بلاويه == الغيم يقلب فيه عج وكتامي

يابعد شرب الماء على كبد راجيه == ماسيل الغبرا زعوج الجهامي

أنبيك يامن كلمة الحق ترضيه == اعطيك ماينفعك وافهم مرامي

قصر يذلك لا تقبل مبانيه === خله عسى شامخ طويله هدامي

خله عسى ماصاب اغادير يفنيه == يودع منازله الطويله رجامي

لوزان مدخاله وطالت حواميه == شيد على الخيبه قليل الرحامي

وحي يوريك المذله وتغليه == أنا اشهد انك ميت القلب عامي

من لا يودك لا توده وترجيه== ارفع مقامك يا عزيز المقامي

من قارب الاجرب بالامراض يعديه== عداه تسطي باللحم والعظامي

درب السلامه بينات مماشيه == ودرب العطب يرث عليك الكلامي

ابعد وقلبك نازح البعد يشفيه == وتلقى عن الدار البغيضه مقامي

دار بدار وداعي الذل عاصيه == ولا تقبل الذله نفوس الكرامي

والعبد له رب عن الناس يغنيه == ولولاه ماصاب الهدف كل رامي

الشاعر: محمد السديري

[أمير الحروف]

الله على الروعة وعلى الشعر فعلاً هذا الكلام...
أشكرك استاذنا ومشرفنا الغالي على هالأضافة اللي لو قلت رووووووعه بظلمها بس ماني قايل عنها شي
بقولك أنت أخوي المدرس أقتراح وأتمنى يتسع له صدرك...
ليش ماتضيف موضوع عنوانه قصائد خالده أو قصائد غير أو أي معنى من هالقبيل وتضيف به أنت وأنا وكل من يملك قصيده مثل هالقصايد اللي خلدت أصحابها في قلوب أهل الشعر... أتوقع راح يكون شبه مرجع تاريخي لمثل هؤلاء الشعراء سواء من تمير أو خارجها من بلادنا الغالية...
بس هذا اللي عندي وألف شكر لك ولكل من يذل الصعاب في طريق نجاح منتدانا الغالي...

[المدرس]

أبشر


وشف الموضوع


يا أمير الحروف

[المدرس]

بن لعبون
كل شـيء غيـر ربـك والعمـل
لـو تزخـرف لك مـرده للـزوال
مـا يـدوم العـز عـز الله وجـل
فـي عـدال ما بـدا فيـه امتيـال
والـذي ينقـاد بـزمـام الأمــل
لا تغبطـه فـي زغتـري الهبـال
استغفـر الله عـن كثـر الـزلـل
واستعيـن اعنايتـه في كـل حـال
زاح دهـرك يـا محمـد بالغـزل
والغـزال اللـي تهـزا بالغــزال
والخدود اللي كما وصـف السجـل
نكستـك بالسقـم نكـس الهــلال
والجبيـن اللـي بروقـه تشتعــل
مـع جعـود كنـها داج الليــال
والنهـود اللـي غـذتـك بالمهـل
والمرض منها ومن قبـل الحمـال
رنـة الخلخـال تحـدث لك وجـل
مع كمالك ما استحيت امن الرجـال
واهـل ذاك البيـت من هذا النـزل
داستـك خفـراتهـم دوس النعـال
كم طرقـت لبابهـم عجـل خجـل
للطوافـة وانت ما تبغـي السـؤال
ما طرق فوق الـورق أو من أجـل
قال من لولا الهـوا ما كـان قـال
عن سفاهك فـي هواهـم لا تسـل
يا محمـد ما بقـى فيـك احتمـال
عاشـروك فليـت من يلقـى بـدل
عشرتـه ويـاك يا بيـس البـدال
تـوبـة لله عـن ذيــك النجــل
والـردوف اللي كما نفـد الرمـال
والشفايـا اللي كمـا ذوب العسـل
من جنى جناتهـا السلسـال سـال
عاطـلات الريـم وادمـي الرمـل
مع نباتـه ظلـهم عنـدي ظـلال
توبـة المغتـر حـاط بـه الأجـل
بالعجل يـا أيهـا الراجـى محـال
بـادره مـادام لـك فيـها مهــل
فالمنـايـا رايحـات بـك عجـال
واسأل اللي يستجيـب لمـن سـأل
هو يجيبه محتفـى بك حيـث قـال
واسأله باسـرار ما جـاب الرسـل
واسمه المخزون في علمـه تعـال
والملائكـة الكـرام أهـل المحـل
وأوليـاه الموصليـن بـه الحبـال
يسمح اللي فات في وقـت الجهـل
واسع الغفران وان ضـاق المجـال
غافـر الـزلات حـي لـم يـزل
لـو ذنـوبـك راجحـات بالجبـال
العفو والصفـح هو للصفـح أهـل
والكـرم والجـود جـوده والنـوال
ياهل التقـوى ويا ضافـي الفضـل
طلبـةٍ لي مـن عطايـاك الجـزال
من روايـح رحمتـك عـل ونهـل
لهل حسن الظـن بك يا ذا الجـلال
والسموحـه منك يـوم لـم تـزل
جملة الأجسـام فـي قبـري يهـال
فإن ذا الدنيـا كما ضـرب المثـل
والحياة ابهـا كمـا طيـف الخيـال
والعـزيـز ابهـا يـذل وينخـذل
ويبتلـي فيـها ومـا فيـها وبـال
كم رأينـا مـن نعيـم واضمحـل
مـع حبيـب نـازل فيـها وشـال
يا عديـم الـرأي لو هـي بالعقـل
ما سوت عندك على بختـك عقـال



يتبع

[المدرس]

محمد بن مسلم

هذا زمان أظهـر حـلالك يعاديـك

وتكـون له من بعـد هـذا تسـوّل

لا قمت تذكر ما مضى من حسانيـك

في الحال الاوّل قـال الاوّل تحـوّل

حنا عيـال اليـوم عطنـا ونعطيـك

نقـدٍ بنقـد وخـل مـا فـات الاوّل

ذا آخر زمان ما تشـوف المماليـك

قامـت ترفّـع و الظـواري تحـوّل

يالله يـا فكـاك حبـل الشـرابيـك

تفكنـي مـن هالـزمـان المهـوّل

اكذب وتلقى لك مع النـاس تسليـك

واصدق وتترك لو تكـون السّمـوّل

إستنعج السرحان واستفـرس الديـك

وصارت على راعي العوايد منـوّل

أهل الغنى والجود صاروا صعاليـك

وأهل الفقر و البخـل قامـت تمـوّل

ياما تشـوف من العجـب ما يعنيـك

إن متـع الله فـي حياتـك و طـوّل

فالحر ما ضاقـت عليـه المساليـك

لولا الضـروره و الحـرام المعـوّل

فـلا يغـرك كـل زولٍ يحـاكيـك

حلـوٍ لسانـه وهـو قطـو يغـوّل

يضحك بوجهٍ لك و بالنصح يوريـك

وهو علـى العثـره يـرز المظـوّل

إحذر صديقـك قبل تحذر معاديـك

إن كنـت عاقـل فالليـالـي تـدوّل

حسّب لدربٍ ما مشـوا فيه أهاليـك

فالمـرجلـه بالقمبـزه مـا تظـوّل

اقنع برزق الله و ما كـان معطيـك

والماقـف اللـي يتعبـك لا تطـوّل

ولا تطيـر فـالتطيـر تهـاليــك

لكـن باقـوال المـواخـي تـفوّل

وترى صديقك من بنفسـه يواسيـك

ويواصـلك في مرزقـه والمخـوّل

ويسر وجهـك إن سمع كلمـةٍ فيـك

ويلا ضربتـو جـادةٍ صـار الاوّل

وأصدق صديقك ما حصل في تمانيك

فـلا تخيـل لـك جهـامٍ تــزوّل

تحسبه ماء في واهج القيـظ يسقيـك

وهـو سـرابٍ مـن هجيـرٍ تبـوّل

خف الإله وعامل الصـدق ينجيـك

في ساعـةٍ يخـزى بهـا من تقـوّل

كم صادقٍ ينجي في ضيق المساليـك

وكـم كـاذبٍ أوما كراعـه وشـوّل

وإسمع نصيحة واحـدٍ هاقـيٍ فيـك

وإعبر على مركب زمانـك ونـوّل

وإحذار على نعمتك من فعل أياديـك

ترى النعم عنـد المعاصـي تـزوّل

ثم اطلب الله مثل ما قيـل في ذيـك

يفـرج لنـا في ذا الزمـان المهـوّل

وازكا السلام التـام من غير تشكيـك

عليك يا تالـي الرسـل وهـو الاوّل

[أمير الحروف]

تسلم أخوي المدرس ... وهذي أول المشاركات والجاي أكثر....
[line]

هذه مساجلة شعرية جميله لشعراء الزمن الجميل أضيفها وأتمنى أن تنال أعجاب كل من يهوى الشعر الأصيل

الشاعر حماد بن هندي الكثيري من سكان مدينة الحائط بمنطقة حائل وهو أساساً من أهل القصيم وعاش بالحائط بقية عمره إلى أن توفي سنة 1367 هـ وكان بين الحين والآخر يتواجد بمجلس الأمير جابر الجابر أمير الحائط يستأنس الأمير بقصائده ، وذات يوم عندما دخل إلى مجلس القهوة قال له الأمير لقد أتحفتنا بالكثير من قصائدك الجدية والحين نريد منك أن تسمعنا قصيدة غزلية تنعش بها قلوبنا فأعتذر الشاعر بأن ليس لديه قصيدة غزلية وليس هناك من يتغزل به.. فقال الأمير لن تخرج من هنا قبل أن تسمعنا قصيدة فقال أمهلوني إلى الغد، فرفض الأمير وقال لن تخرج حتي تلبي ماطلبته منك ،فقال إذاً أسمحوا لي أن أخرج من هذه الغرفة علني أرى مايدفعني إلى تحقيق ماترغبون.. فسمح له الأمير وخرج ورأى نساء قد حملن حزماً من حصيد الزرع بقصبه وسنابله فوق رؤوسهن فعاد أليهم وهو يترنم بقوله...

واحش قلبي حش زرعٍ بدوا به=بارضٍ حشاك وحورفوا بالنجازي
وياونتي ونة مريضٍ عنوا به=عضيض غلث وشم دم البرازي
على الذي ياخليف ماني بصوبه=لاهو ولد عمي ولا هو مجازي
العين عين موحّش شبكوا به=طيرة بحر ماتنزل إلا النوازي
والخد قرطاس الشريف أكتبوا به=أصفى من الكاغد على الشمع لازي
ومبيسمٍ سلك الحرير أنضموا به=أصفر حمر وعلو كهرب ومازي
وريقٍ يشادي للعسل حين ذوبه=يصفى من اللولو بصافي القزازي

فكان للقصيدة وقع طيب بالنفوس وأنتشرت في كل مكان لرقتها وعذوبة ألفاظها وأعجب بها الكثير من الناس ويعد ذلك قدم حماد إلى المستجده وأجتمع بمجموعة من الشعراء وكان معجباً بقصيدته مما جعله يقول لرفاقه أنكم لاتستطيعون أن تجاروني بهذه القصيدة التي قلتها وأنشدهم أياها فقال الشاعر رشيد بن دخيل الله الفوزان أمير المستجده ..


واقلبي اللي بايهات دروبه=ونقسٍ تكسر مثل وصف القزازي
ياشوق عطني حبهٍ بس نوبه والله فلاني عن مراعاك عازي
الردف شطٍ مرملٍ جمدوا به=مرباعها بين العلم والنفازي

ثم تلاه الشاعر عبدالرحمن بن ناصر الحيدان وقال...


واقلبي اللي بايهات دروبه=ونفسٍ تكسر مثل وصف القزازي
على هنوفٍ مادري وين صوبه=ضاف الجعد راع الثمان اللوازي
علمي بها يوم البلاد معروبه=دنوا لها حر سريع امتيازي
الردف شط اللي هله ماسطوا به=بس العساف ورملت للمغازي
مدري مع اللي للحجر فيضوا به=وإلا مع اللي سندوا للحجازي

ثم تلاه الشاعر ابراهيم بن راشد الشعيفان


واونتي ونة شريفٍ حكوا به=عقب الختوم اليوم ماله مجازي
على هنوفٍ شفتها بس نوبه=عين العنود اللي تقود الجوازي
الخشم سلة نافعيٍ سطوا به=وثمان مجليات بيضٍ لوازي
والله عذلت القلب ماقال توبه=عيا يطاوعني ولا هو بعازي

ثم تلاه الشاعر ناصر بن حمود الهياف وقال ...


واتل قلبي تلتينٍ بنوبه=تليتني يالشوق تلة حجازي
أبو نهودٍ مزعن جيب ثوبه=شبت على وسط الضماير بقازي
والنفس ماهي عن المراد محجوبه=مير الهوى يذل رجالٍ عزازي

وتلاه الشاعر عبدالمحسن بن حمود الهذيلي وقال...


قلبي على خلي توارد طنوبه=ولاني على فرقاك يالخل عازي
العين عين اللي ورد جو جوبه=متذيرٍ من ناقلين الجهازي
أبو نهودٍ شولعن نقش ثوبه=بيض الحمام وبالتراقي لوازي
ريقه كما شكلن هنيٍ شروبه=ياعود ريحانٍ شمخ باللزازي
والراس ذيل مهيرةٍ صفقوا به=دلت تشوح بالرجال الدرازي

وهكذا تولد من هذه القصيدة عدد من القصائد الشعرية بوقت واحد... وسلم لي على شعراء المجلات اللي ينتظرون الألهام؟؟!! وهم على بلاطه بس مايبون يقولون ينتظرون من يبيع وسلامتكم وأتمنى تكون عجبتكم..

[المدرس]

تسلم


أمير الحروف


ونبي الجميع يساهم


بما لديه


لإثراء الساحة

وسلامتكم

[أمير الحروف]

برقٍ شعق نوره سرى يجهر الخلق=أسفر.. وضاح.. ولاح من بين الآفاق
وانجاب جلباب الدجى عنه واشرق=نور غشى البلور من نور الاشعاق
لا شمعة الدهليز لا موضي البرق=لا شمس.. لا بدرٍ طغى حسنه أنساق
لا حص.. لا ياقوت.. لا جوهرٍ طلق=لا در.. لا فيروز من علّقه ماق
يخجل بخدٍ فيه عمل الدق دق=زاهٍ على الاوجان به شئ ارناق
أضفى خداره عقبما لي مشى دلق=كالبدر له نورٍ ولو حال شبراق
له قلت يا مدمي الالحاظ ما حق=قتلي وأنا لك يا اتلع الجيد مشتاق
إن كان هو حق فابي تمشي الحق=لأمرٍ تعرض لك وجالك بتيفاق
وإن كان حكمك جنب الحق للعق=فارحم ورف بامرؤ من الخمر مافاق
يا من طغى بينه وبين القمر فرق=والشمس من نور أشرف الزين تشتاق
غروٍ بزينه ما حوى القاف له رنق=لا واللطيف أنه على حسنهن فاق
إلى اقبل يجر الدل بمجمل العنق=بين الزمرد والجواهر له الحاق
يغدون طلاب الهوى عنه تبرنق=راعي الهوى ما يرتجي منه الاعتاق
يحرق قلوب أهل الهوى خده الغرق=مثل الغرنقى بالمناظر له علاق
بشفاه شهدٍ شافيٍ يشفي الحرق=لا خمر.. لا سلسال.. لا الريق ترياق
وبالطرف صرفٍ فيه سحر الى حق=يفتن ويغري به هوى كل عشاق
سل العزا والروح في سهمه الغمق=والساق ساقته الموازين وانساق
وسكرت ما ميز شمالي من الشرق=قل ول قلبٍ بالهوى ساقه الساق
دشيت في بحرٍ طغى بالهوى غرق=وعبرت به ما شوف مايٍ له سواق
ولا بلي بلواي من جملة الخلق=أو عبق قلبٍ مثلما قلبي انعاق

محمد العبدالله القاضي

دلق : انصلات السيف من غمده
الشبراق : قطع الغيم الخفيف ويقصد به غشاء الحجاب ( الشيله)

[أمير الحروف]

من أجمل قصائد الأمير محمد السديري ... سبك... وحكمة... ومعاني قوية أثيرت حولها الكثير من التفسيرات ويظل البيت الذي يقول فيه:
لعل قصرٍ ما يجيله ظلالي..... ينهد من عالي مبانيه للساس
أكثر أبيات الشعر الذي دارت حوله الشكوك... فمن المقصود في هذا البيت؟؟؟
وقد غنى الفنان الكبير محمد عبده هذه القصيدة ولكنه لم يغنيها كاملة؟؟ وأضيفها هنا كاملة كما جاءت في ديوانه...



يقول من عدّا على راس عالي=رجمٍ طويل يدهله كل قرناس
في راس مرجومٍ عسير المنالي=تلعب به الارياح مع كل نساس
في مهمهٍ قفرٍ من الناس خالي=يشتاق له من حس بالقلب هوجاس
قعدت في راسه وحيد لحالي=برأس الطويل ملابقه تقل حراس
متذكّرٍ في مرقبي وش غدالي=وصفقت بالكفّين ياسٍ على ياس
أخذت أعد أيامها والليالي=دنياً تقلّب ما عرفنا لها قياس
كم فرقت ما بين غالي وغالي=لو شفت منها ربح ترجع للافلاس
ياما هفابه من رجالٍ مدالي=ما كنّهم ركبوا على قب الافراس
ولا قلطوهن للكمين الموالي=ولا صار فوق ظهورهن قطف الانفاس
ولا رددوا صم الرمك للتوالي=كلٍ يبي من زايد الفعل نوماس
من بينهم سمر القنا والسلالي=مثل البروق برايحٍ ليله ادماس
يقطعك دنيا ما لها أوّل وتالي=لو اضحكت للغبن تقرع بالاجراس
المستريح اللي من العقل خالي=ما هو بلجّات الهواجيس غطّاس
ما هوب مثلي مشكلاته جلالي=أزريت أسجّلهن بحرٍ وقرطاس
حملي ثقيل وشايله باحتمالي=وأصبر على مر الليالي والايام
وأرسي كما ترسي رواس الجبالي=ولا يشتكي ضلعٍ عليه القدم داس
يا بجاد شب النّار وادن الدلالي=واحمس لنا يا بجاد ما يقعد الراس
ودقه بنجرٍ يا ظريف العيالي=يجذب لنا ربعٍ على اكوار جلاّس
وزلّه إلى منّه رقد كل سالي=وخله يفوح وقنّن الهيل بقياس
فنجال يغدي ما تصور ببالي=وروابعٍ تضرب بها اخماس واسداس
لا خاب ظني بالرفيق الموالي=مالي مشاريه على نايد الناس
لعل قصرٍ ما يجيله ظلالي=ينهد من عالي مبانيه للسّاس
لا صار ما هو مدهلٍ للرجالي=وملجا لمن هو يشكي الضيم والباس
بحسناك يا منشي حقوق الخيالي=يا خالق اجناسٍ ويا مفني اجناس
تجعل مقره دارس العهد بالي=صحصاح دوٍ دارسٍ ما به اوناس
البوم في تالي هدامه يلالي=جزاك يا قصر الخنا وكر الادناس
متى تربع دارنا والمفالي=وتخضر فياض عقب ما هيب يبّاس
نشوف فيها الديدحان متوالي=مثل الرعاف بخصر مدقوق الالعاس
وينثر على البيدا سوات الزوالي=يشرق حماره شرقة الصبغ بالكاس
وتكبر دفوف معبّسات الشمالي=ويبني عليهنّ الشحم مثل الاطعاس

[المدرس]

أشكرك أمير الحروف

ولكن أين البقية

[الغلا]

بسم الله الرحمن الرحيم

مرحبابكم ............

قصيدة سليمان بن شريم ينصح فيه ابنه ( عزيز ) و يقول فيه :

يا مـل عيـنٍ كن فـي محاجيرهـا شـوك
والقلـب بـه عـن لـذة النـوم تكـاك

لا دك فـي قلبـي مـن الهـم داكـوك
جاوبت طربات الحمايـم علـى الـراك

عزي لحالـك يـا عزيـز وأنـا ابـوك
كان الزمـان اللـي توطانـي توطـاك

إفهم وصاتـي يـا عزيـز وأنـا ابـوك
دامـك صغيـر وغايـة العلـم يقـراك

تـراه مـا ينفعـك خالـك ولا أخـوك
لا صار مـا تقضـي لزومـك بيمنـاك

وربعك ليا بـان الخلـل فيـك عافـوك
أقرب قريب ٍ لك مـن النـاس يشنـاك

إن كثر مالك صدقـواّ لـك وطاعـوك
وإن قـل مـا بيديـك شانـت حلايـاك

لو تطلب الماء عندهم كـان مـا أسقـوك
إبعد مـزارك عـن وطنهـم ومربـاك

وإن طاب حظك صدقوّا لـك وحبـوك
وإن بار كلـن مـا يبـي غيـر فرقـاك

وإلا إعترض لك من صروف النيا صوك
كلـن تبـرا منـك مـاهـوب ويــاك

هراجـة المجلـس إلـى جيـت وروك"
منـازل ٍ تطـرب نظـيـرك بدنـيـاك

وإللا قضـى منـك اللـوازم وخلـوك
تفرقوا وأنت إحتمـل كـل مـا جـاك

كنـك سـراج البيـت للنـور شـبـوّك
وإلى إنقضى اللازم حدا الأدنين طفـاك

وألا كمـا ليمونـة الحمـض مصـوك
وإلا قضـى منهـا الطعـم فرغـوا ذاك

واللي يجي من رفقتـه ريـب وشكـوك
إحـذر عنـه ليـاك تصـدف بمسـراك

وإلا جفوك أهـل الوطـن وإستخفـوك
قلّـع غريسـك منـه وإهـدم ركايـاك

تراك لو ترجع علـى الربـع صعلـوك
أحسن من اللـي تلتجـي بـه وياطـاك

عطهـم وضيفهـم إلا منـهـم جــوك
وإغلـق ضميـرك لا تعلـم بقصيـاك

إن طبت ما حبوّك وإن عبـت زالـوك
تمضـي حياتـك ناقـل ٍ داك بــرداك

وإلى نفـوك إمـن الوظيفـه وعافـوك
خفـتّ موازينـك وكـلـن تهـقـواك

وإصحى لخـلان الرخـا لـو تغالـوك
إعرف ترى أطيبهم إلى إحتجت يجفـاك

كنك خوي مقيـط دهـووك وأغـووك
وحقك عطاك رشاك وأقفـى وخـلاك

وإحذر عن العاله ترى الحـق مـدروك
مثل العمـل يدركـك مـا منـه فكـاك

وإن كان عدوانك على الضيـق حـدوك
فإخصـم طلابتهـم بعجفـاك وقــداك

وإن كانهـم لمشـرّف الحـق ماشـوك
ناظـر مطاليـع الفـرج قبـل مبـداك

وإن طاوعوا شيطان الأنفـس وهانـوك
فإصبر على البلـوى ودفنـك رزايـاك

زرهـم تـراك إليـا تونـيـت زاروك
إن ما بديـت لصاحـب السـو يبـداك

ما دامهم مـا طاوعـوا لـك وعرفـوك
إضرب على الكايد إلى عمسـت ريـاك

لو هذبوك إمـن المصـاوب وضـدوك
مـا يذبحونـك قبـل تدنـي منـايـاك

وإحلم على الجاهل ترى الحلم مبـروك
وقم للضعيف اللي من الظيـم ينخـاك

وإدمح خطأ جيـران بيتـك إلـيا أوذوك
ترى القصير وحرمـة الجـار بحمـاك

عطهـم لـوازم حقهـم لـو تنـاسـوك
في كـل مـا يصلـح لدينـك ودنيـاك

وقم للضيوف اللي لفوا لـك وضافـوك
أغلـى كرامتهـم حجاجـك وبـشـراك

وإعرف ترا مالك للأضيـاف مشـروك
لولاه يطلب حاجتـه منـك مـا جـاك

وقم للرجال إن رايعـوا لـك وحبـوك
وإحشم خويـك وأكرمـه عنـد ملفـاك

وإلى إعتبـرت بسيـرة النـاس كفـوك
ما كثر مـن شـي أتعبـك ثـم عنـاّك

ولا تبات بي همّ دنيـاك مظـنـوك
ما طاب لـك مـا دام لـك وإفتهـم ذاك

لو يطلبون إخفايك النـاس مـا أخفـوك
الرجل مثل النجـم فـي كـل الأفـلاك

وصلاة ربـي عـدّ الأوراق والشـوك
أو نـاض بـراق ٍ ومـا هـل سـفـاك

على الذي ما فيـه ريـب ٍ ولا شكـوك
امحمـد ٍ مــا دك بالقـلـب دكــاك

و سلامتكم ..................................

[المدرس]

وإلى إعتبـرت بسيـرة النـاس كفـوك
ما كثر مـن شـي أتعبـك ثـم عنـاّك



الغلا


اسم رائع


ومشاركة أروع


لك مني مليون تحية

[أمير الحروف]

الشاعر بدر الحويفي من المولعين بالقنص بالصقور وكثيراً ما ينصحه بعض الناس بترك هذه الهواية معللين ذلك بأنه لا يستفيد منها وأنها تشغله عن أمور الدنيا وينصوحه بأن يتجه إلى التجارة ويترك القنص فقال هذه القصيدة :

والله يلولا غايتي ما نقل الطير=ما نقل على كفي خفوق الجناحي
أبي ليا فزت تقل شعف معصير=وأقفت تعقد مع سهالٍ فياحي
ليا تلني واقفى يخطرف له السير=جايع وحاديه الزعل من صياحي
لا طقها بالصايدين المواخير=طاحت تدوس ونجّم الطير صاحي
وليا حصل جولٍ رتوع ومخامير=في ماقعٍ عن نشر الادباش زاحي
وتركزن له تقل شولٍ معاشير=وغزن غلبهن عقب ما هن ضواحي
منهن علق باللي مثل بكرة الظير=ونكّد عليهن عقب ما هن ضواحي
وجيته يمزّرها على القاع تمزير=يشلق معلق ثديها بالجناحي
هذيك والله منوتي يالمناعير=إن كان أنا مجنون وإن كنت صاحي
وكلٍ برايه له تصرف وتدبير=ولا حدٍ على الدنيا جلس واستراحي
وأرزاق خلق الله وهايب وتقدير=ورزقي على مجري هبوب الرياحي
ولا ينقص الرجال كثر المخاسير=لصار دون الوجه ما هو سفاحي
والقل ما عذرب رجالٍ بهم خير=والمال ما عز الرجال الشحاحي
مار أتركوني يالوجيه المسافير=هذا اللذي وافق عليه اقتراحي

[أمير الحروف]

محمد بن جاسم بن عبد الوهاب الفيحاني من قبيلة سبيع .
أحد الشعراء الذين ماتوا بالعشق العذري . ولد في قطر عام 1325 هـ وقيل في دارين درس في الكويت والهند وعاش في قطر وأحب قريبة له إلا أن أقاربها حالوا دون زواجه منها ، أعتل وساءت حالته وعولج في مستشفى الإرسالية الأمريكية في البحرين .
هذه أبيات مروية كتبها الشاعر بالفحم على جدار غرفته بالمستشفى عندما كان يخضع للعلاج في البحرين من مرضه الذي أودى بحياته....


يا قلب بالله وش علامك عليه=ما هوب ذا زين
كلما بغيت اتهون زدت الجنيه=ويلي من الشين
أهلكت نفسي وهي هزلا رديه=من بين همين
هم الحبيب وهم دنيا دنيه=متعوب ما بين
وانت جروحك في ضميري طريه=زادت بتمكين
يا هون هالدنيا ولو هي قويه=دون المحبين
آهِ على قلبي غدا واعليه=بين المسيحين
كنه من الفرقا على ناب حيه=أو بين ظفرين
وإلى طرى المحبوب شبت اضويه=من بين جنبين
يا هيه يا احمد يا مخلي خويه=ما بين نابين
كله من أسبابك لقيت البليه=يا فارج البين
خليتني يا خوي مثل الخليه=من عقب ولدين
وأركبتني كل الدروب الشجيه=التعب واللين
لولاك ما ناوحت أنا الراعبيه=نوح الحزينين
ولا سريت أمشي بليا مطيه=من فوق رجلين
لو كانت عظامي ضعاف ورديه=بالتعب واللين
تصحا وتقوى لا ذكرتك سليه=من غير تهوين
حتى الحسود يحن قلبه حنيه= ويّا المعادين
وأنت ضميرك قاسيٍ في مسيه=كطالب الدين
إن كان ذا فعلك بحكم القضيه=فاذبح بسكين
ولا تعذبني بشر وأذيه=هذا زمانين
وأنا مطيع وصابرٍ للجنيه=دون المعيين
والختم مني لك سلام وتحيه=لوحن بقبرين

[المدرس]

قصيدة القهوه
دنـيـت لي من غـالــي البن مـالاق
بالكـف ناقـيها عن العـذف منســوق
احـمـس ثـلاث يانديـمـي على ســاق
ريحه على جـمر الغضا يفضح السـوق
وايـاك والنـيه وبالـك والاحــراق
واصـحـى تصير بحمسة البن مطـفـوق
الى اصفرّ لونها ثم بشّـت بالاعــراق
صفراً كما الياقوت يطرب لها الموق
وعـطـت بريـحٍ فاخـر فاضـح فــاق
ريحه كما العنبر بالانفاس منشــوق
دقـه بنجـرٍ يسـمعـه كل مشـــتـاق
راعـي الهوى يطرب الى دق بخـفــوق
لقّـم بدلـةٍ مولّــع كـنها ســــاق
مصـبوبةٍ مربـوبـةٍ تـقـل غـرنــوق
خـله تفوح وراعي الكـيف يشـــتاق
هـيلٍ ومـسـمارٍ بالاسـباب مسـحــوق
مع زعـفرانٍ والشـمطـري الا انسـاق
والعنبر العالي على الطاق مطـبوق
فيلا اجـتمـع هـذا وهـذا بتيفــاق
صـبه كـفيت العـوق عن كل مخـلوق
بفنجـال صـينٍ زاهـيٍ عـند الارمـاق

[المدرس]

قصيدة جميلة وصية من بركات الشريف لابنه
وصية الشريف لابنه

بركات الشريف


يامرقب بالصبح نطيت راقيـك
ما واحد قبلى خبرته تعــلاك
وليت ياذا الدهر ما أكثر بلاويك
الله يزودنــا السلامه من اتلاك
ياللى على العربان عمت شكاويك
وليت يا دهر الشقا ول مقواك
ولا يوم ها الكانون غاد شبـابيك
تلعب به الأرياح من كل شبـاك
يا مالك اسمع جابتى يوم أوصيك
واعرف ترى يابوك بآمرك وانهاك
وصية من والد طــــامع فيك
تسبق على الساقه لسانه لعلياك
أوصيك بالتقوى عسى الله يهديك
لهـــا وتدركها بتوفيق مولاك
الله بحق أجــدادك الغر يعطيك
مرضاته مع ما تمنيته أمنــاك
احفظ دبشك اللى عن الناس مغنيك
اللى إليا بأن الخلل فيك يرفـاك
واعرف ترى مكه ولاها بناخيـك
لو تشحذه خمسة ملاليم معطاك
اجعل دروب المرجلة من معانيك
وا حذر تميل عن درجها بمرقاك
لاتنسدح عنها وتبغينى أعطيك
جميع ما يكفيك ما حاصل ذاك
أدب ولدك إن كان تبغيه يشفيك
واستسعفه من بعد مرباه بالاك
اما سمج واستسمجك عند شانيك
ويفر من فعله صديقك وشرواك
وإلا بعد جهله ترى هو بياذيــك
لو زعلت أمه لا تخليه يــالاك
واحذر تضيع كل من هو ذخر فيك
معروفه لاتنساه وأوفه بعـرفاك
ترى الصنايع بين الأجواد تشريك
اليا طمعت بغرسهــا لا تعداك
واحذر سرور بغبة البحر يرميك
ولاعنده أفلس من تشكيك وأبكاك
واوف الرجال احقوقها قبل تاتيك
لا توفيه بالقول فالحق يقفــاك
وهرج النميمة والقفا لا يجى فيك
وإياك عرض الغافل إياى وإياك
تبدى حديث للمــلا فيه تشكيك
وتهيم عند الناس بالكذب واشراك
واليا نويت احذر تعلم بطــاريك
كم واحد تبغى به العرف وأغواك
واحذر شماتت صاحب لك مصافيك
واليا جرى لك جارى قال لـولاك
ولا تحسبن الله قطـــوع يخليك
ولاتفرح أن الله على الخلق بداك
الضيف قدم له من حين يلفيــك
مما تطوله يا فتى الجود يمنــاك
أكرم اقباله فإنها من شواديـــك
وابذل له المجهود مــادام يعناك
احذر تلقى الضيف مرخن علابيك
خله محب لك صديق إذا جــاك
وأوصيك زلات الصديق إن عثا فيك
مازال يغطاهـا الشعر فاحتمل ذاك
راعه ولو ما شفت انه يراعيــك
عساك تكسر نيته عن معـــاداك
واحذر عدوك لو ظهر يب يصافيك
خلك نبيه وراقبه وين ما جـــاك
لاتأمنه واطلب من الله ينجيـــك
ويكفيك ربك شـــر ذولا وذولاك
شفنى أنا يــا أبوك بآمرك وانهيك
عن التعرض بين الاثنين حــذراك
إذا حضرت مطالبه مع شرابيك
اسع لهم بالصلح واللاش يفداك
ابذل لهم بالـطيب ربك ينجيك
ولاتجضع الميزان مع ذا ولاذاك
أما الشهادة فأدها إن دعوا فيـك
بين عمود الدين لاعميت أريـاك
بالك تماشى واحد لك يرديــك
طالع بنى جنسك وفكر بممشاك
رابع أصيل فى زمانك يشـاكيك
لا شاف خملاتك عن الناس غطاك
وأحذرك عن طرد المقفى حذاريك
عليك بالمقبــل وترك إللى تعداك
ثم العن الشيطان لياَّه يغويـــك
ترى إن تبعته للشرابيــك وداك
ووصيك لاتشكى علينا بلاويــك
أنت السبب طرفك عيونك بيمناك
واعرف ترى إلى واطي الفهر واطيك
ولا أنت أعز من الجماعة هذولاك
المسك يا راسى عن الذل واخطيك
واحذر تكلم يا لســـانى حذراك
والطف بجارك وقم من دون عانيك
وافطن لما يعنيك عن ربعة أحواك
يا ذيب وإن جتك الغنم فى مفاليك
فاكمن الين إن الرعـــايا تعداك
من أول يا ذيب تفرس بيــاديك
واليوم جـا ذيب عن الفرس عداك
يا ذيب عـاهدنى وأعاهدك مرميك
مرميك أنا يا ذيب لو زان مرماك
والنفس خالف رأيها قبل ترميــك
ترى لها الشيطان يرمى بالإهلاك
ومن بعد ذا لا تصحب النذل يعديك
و عن صبحة الأنذال حاشاك حاشاك
ترى العشير النذل يخلف طواريك
وأنا أرجى أنك ما تجى دون أباك
والهفوة إنك ما تجى دون أهاليك
ولاظن عود الورد يثمر بتبنـاك
والحر مثلك يستحي يصحب الديك
وأن صاحبه عاعا معاعات الأدياك
لا تستمع قول الطرف يوم يلفيك
بالكذب يقضى حاجته كل ما جاك
من نم لك نم بـك ولا فيه تشكيك
وأيلاه قد أزرا رفيقــك وأزراك
عندك حكا فينا وعندي حكى فيك
وأصبحت كارهنا وحنا كرهناك
ما اخطاك ما صابك ولو كان راميك
وإلي يصيبك لو تتقيت ما أخطاك
مير استمع منى عسى الله يهديك
النصح يـا مالك لك الله لمولاك
عندى مظنة مـا تمثلها فيك
واطلب لك التوفيق من عند مولاك

[المدرس]

يادمـــوعي علمــيـني وش بــــــلاك؟
كــــل مــــامــرّيـــت داره تــــذرفــين
ليــه... تسـترجين حـــــيّ ٍ مارجـــاك
ليــه... دايم من فــــراقـــه تشتكــين
ليــه... طـــول الليل نــومك ماهنـاك
ليــه... طـــول الليل فيه تْفــــكـــرين
ليــه... دايـــم مستمره في خطـــــاك
وانتي الـــلي بالخــــطـا ماتقــبـلـيـن
لاتقـــولي كـــــل شــــيٍّ ماخـــفــــاك
أدْري انــــه مالـــــه بقلــــبك وِزِين
وادري انه زين في حسنه مـــــلاك
يفتنِ ابـْ بَسْمَه ورمش وحــــاجبـين
وادْري انه هو مرضك.. وهو دواك
وادْري انــــك غير حبــه مـــاتـبـين
ادْري بهــــذا وانــــا داري بـهــذاك
بس ماودي لمثـــــله تخـضــعـــــين
دامْ هُو مِنْ صَـــد عنك ومن جفـاك
ليه وراه تــــدوِّرِين وتــــرتجــــين
ارفــعي هامتك وانسي من نســاك
والله الوالي على جرحـــــك يعــين
ويادمـــوعي علمــيـني وش بـــلاك
ارجوج... كفي الدمع ولا لا تذرفين

[المدرس]

البارحه ماذاقت النوم عيني
همٍ بتنجيم ٍبفكرٍ بهوجاس
وأصبحت من غب السهر والونيني
جسمٍ برمة مجرمٍ عند حباس
صبرت لين الصبر بيح كنيني
و لا شفت لي من جملة الصبر نوماس
شابت عوارض لحيتي قبل حيني
وقنعت من عقب الفوايد بالإفلاس
من شوف دنيا تجهر الغافليني
ترفع ذنب وتطمن المتن و الراس
تبدلت هرج العرب بالرطيني
و قامت تجنس لي على سبعة أجناس
رخص الحصان ورخصو الطيبيني
وغلي الحمار و ما أشتبه له من الناس
وقام الردي يدحم بجنب متيني
وولد الحموله قام يمشي مع الساس
و قل الرفيق و قلو الغانميني
وكثر الحسد و أهل النمايم و الأنجاس
شان الزمان وشان وجه الضميني
و تغيرت كل الطبايع والألباس
والمال صار مع المره والدويني
و الطيب راح و قطّعت عنه الأرماس
و خليت كفوف مدلّهين الحزيني
واللي تورثهم شعر ساق وجساس
و الذيب جاع وكل ثور بديني
و الحر برقع وأبرق الريش فراس
و ذل الجسور و كل حد السنيني
و تكشيف عرض الناس هو سهمة الناس
والمرجله نسخت مع المارتيني
و تعوضو عنها بخوصه و مكناس
و قام الردي يحشم مع الحاضريني
و الراس ديس و خدّم الحر أبا الحاس
وصار الصديق إهو العدو البطيني
يشرف عليك و يصبح الصبح بلاس
و طرد الهوى بختوا به المفلسيني
شرّابة المصفاة طباخة الفاس
و ختام قيلي يها السا معيني
صلوا على المختار ماهل رجاس
والآل و الأصحاب و التابعيني
عد النبات و عد حصحاص الأطعاس

[المدرس]

من بلاد الشام جينا بالمكينة ... فوق فرتٍ ما تخثع بالطماني
يحتدي مثل الجمل تسمع رطينه ... مع طمان القاع مثل الثعلباني
والشـُفير من المدارس مطلعينه..عن ظلام الليل شب الكهرباني
كل ما جاه تل يلعن والدينه... باليمين اللي على كل اليماني
ما تجيه يسار رجله شوف عينه..غير يسرى الطار شيٍّ بالاماني
يوم قال له الخوي عاشت يدينه..شد رجله للكمك واحد و ثاني
يالله انك تنصره من نصر دينه ... إن عطى له مع غبا ولا بياني
قلت يالمطنوخ أنا عيني حزينه..من شراب اللف أبيه وعنك كاني
قد رمى بالكيس قدمي قال وينه..دوك ما بالجيب عن شيٍ لهاني
قلت ثالث قال يالله لا تهينه..قلت خامس قال يطلب نقل ثاني
قال واحد و الكمك واسمع حنينه..كيف ما ترضى عليّه بالهواني
قلت واحد و الكمك ضام المكينة..قال لي من يرحم القاسي لياني

[المدرس]

قصيدة أخرى للمبدع بندر بن سرور

ألا يا وجودي وجد من صك دونه باب
بقفل أعجمي مغلقات مساميره!!

عَدَو به على اللي كنه النسر بالمرقاب
على الجمس الأصفر كاملات شراشيره

معه فرت خمسة طن ياخذ مية ركاب
من المال عيّن ينقلنّه تغاييره

دخل هو و حِمله للحكومة بغير حساب
و راعيه عشر سنين و يعاد تقريره

على اللي كواني كيّة العظم بالمشهاب
على أقصى عراوِ القلب محمي مناشيره

عشيري ورا الكوده وانا من ورا مشعاب
بعيد قريب تعيب يا هون تيسيره

ولا يوصله كود " فرت " عليه اسطاب
ليا حاسب السوّاق تقدح مواخيره

صنايع بياطير الكفر لابسين الكاب
عصاة اليهود اللي مشاريبها البيرة

ألا واهني اللي عن الحب ما قد تاب
وأنا تبت عنه وعدت له يا الله الخيرة!!

[المدرس]

قصيدة أخرى
ــــــــــــــــــــ

أنا الذي ما ابدي على الناس سرّي ... من خوف سودان الوجيه تحكي به

أصبر على ظيم الدهر و التعرّي ... من شان من يرضى عليّ الغليبة

و ابعد مجالي عن عيال التزرّي ... من لا هوى قلبي دواه المغيبة

واخاف لي من مجلسٍ ما يذرّي ... في جانبه بومٍ حساسه صليبه

و سوالفٍ مابين بحث و تحرّي ... يجرح فؤادي عيّه و ابتلي به

يرضيني المقسوم خيري و شري ... سبحان من لا تعلم الناس غيبه

أحدٍ على ربعه يحب التحري ... للشر بلاس و خيره بجيبه

هذاك يالربع انا منه متبرّي ... لو عضّني ناب الدهر ما انتخي به

من خوف يضحك لي و هو يستغرّي ... يفتل حبال السّوْ ما يندري به

يفرح عليّ بكل شيٍّ يمرّي ... و ان شاف يمّي خير عنّي نهيبه

[المدرس]

قصيدة لمحمد النجدي وقد لقبت قديما بشيخة القصيد :




من البارحة بالقلب هجس ٍ وتعبــار
،،،،،،،،،،،،،،،،،،،،،،،،،،،،هجس ٍ وهاجوس ٍ تعاقب نكيفــــه

الصبر مفتاح الفرج هو والافكـــــــــار
،،،،،،،،،،،،،،،،،،،،،،،،،،،،من لاصبر تصبح حواله كسيفـــــــه

يالله يالمطلوب ياوال الاقـــــــــــــدار
،،،،،،،،،،،،،،،،،،،،،،،،،،،،انت الذي مدات جودك لطيفـــــــــه

يالله بالمعبود عاون هل الكـــــــــار
،،،،،،،،،،،،،،،،،،،،،،،،،،،،تحل شدات عليهم كليفـــــــــــــــه

اللي مجالسهم بها بن وبهــــــــــار
،،،،،،،،،،،،،،،،،،،،،،،،،،،،ونجر ٍ يصوت للمسير رجيفــــــــــــه

ومكارم ٍ للضيف عجلات وبكـــــــــــار
،،،،،،،،،،،،،،،،،،،،،،،،،،،،ومفطحات في صحون نظيفـــــــــــه

اكرام ضيف البيت حق وتعبـــــــــــار
،،،،،،،،،،،،،،،،،،،،،،،،،،،،والكل منا يفتخر فيه ضيفـــــــــــــــه

يا مزنةٍ غرى من الوسم مبـــــــــدار
،،،،،،،،،،،،،،،،،،،،،،،،،،،،اللي جذبني من بعيدٍ رفيفــــــــــــه

تمطر من الهدرى اليا خشم سنـــار
،،،،،،،،،،،،،،،،،،،،،،،،،،،،وتسقي ديار محقبه والحتيفــــــــــه

وتضفي على كل المفالي والاقطــار
،،،،،،،،،،،،،،،،،،،،،،،،،،،،وتصبح بها خدان ربعي مريفــــــــــه

عقب الحيا فاحت بها ريح الازهـــــار
،،،،،،،،،،،،،،،،،،،،،،،،،،،،وتعاقب النوار مثل القطيفـــــــــــــــه

وترعا بها الغرا وتبني لها طـــــــــــار
،،،،،،،،،،،،،،،،،،،،،،،،،،،،عقب الضعف راحت ردوم منيفــــــــه

اذوادنا مايرتعن دمنة الـــــــــــــــــدار
،،،،،،،،،،،،،،،،،،،،،،،،،،،،ولا يرعن الا بالفياض النظيفــــــــــــه

يرعن بعبدالله وجبر ٍ وجبــــــــــــــــار
،،،،،،،،،،،،،،،،،،،،،،،،،،،،خيالة يوم الملاقا عنيفـــــــــــــــــــه

اذوادنا يرعن بنا سر وجهـــــــــــــــار
،،،،،،،،،،،،،،،،،،،،،،،،،،،،من دونهن نروي الغلب والرديفـــــــه

ما هي سوالف مسرد ٍ عقب ما نـار
،،،،،،،،،،،،،،،،،،،،،،،،،،،،اللي هرب واطراف رمحه نظيفــــــه

خطو الولد مثل البليهي اليا ثــــــــــار
،،،،،،،،،،،،،،،،،،،،،،،،،،،،زود ٍ على حمله نقل حمل أليفــــــه

يشدا هديب الشام شيّال الاقطــــار
،،،،،،،،،،،،،،،،،،،،،،،،،،،،واليا كبر حمله تزاود زفيفــــــــــــــــه

وخو الولد مثل النداوي اليا طــــــــــار
،،،،،،،،،،،،،،،،،،،،،،،،،،،،صيده من الجزلات ماهي ضعيفــــــه

ترجي العشا من مخلبه وقع وطيــــار
،،،،،،،،،،،،،،،،،،،،،،،،،،،،حسه على صيد الخلا له وحيفـــــــه

وخطو الولد يصبر على موتة النــــــــار
،،،،،،،،،،،،،،،،،،،،،،،،،،،،صفر على عود تضبه كتيفــــــــــــــــه

وخطو الولد يامال قصاف الاعمـــــــــار
،،،،،،،،،،،،،،،،،،،،،،،،،،،،لانافع ٍ نفسه ولا منه خيفـــــــــــــــه

واليا بخصته ماسوى ربع دينـــــــــــــار
،،،،،،،،،،،،،،،،،،،،،،،،،،،،مع العرب يشبه خطاة الهديفــــــــــه

حنا فريق ولا نغبي سنا النــــــــــــــار
،،،،،،،،،،،،،،،،،،،،،،،،،،،،ما ننزل الا بالديار المخيفــــــــــــــــــه

ودار ٍ به الحقران ماهي لنــــــــــــا دار
،،،،،،،،،،،،،،،،،،،،،،،،،،،،حتيش لو صارت خصاب مريفــــــــــــه

حنا كما المشخص عن الصرف ما بــار
،،،،،،،،،،،،،،،،،،،،،،،،،،،،بالوزن يرجح والمصاري خفيفـــــــــــــه

وتلقى منازلنا رفيعات واخيـــــــــــــــار
،،،،،،،،،،،،،،،،،،،،،،،،،،،،والرجل عن دوس القصاير حفيفــــــــه

لازم نسجلها تواريخ واذكــــــــــــــــــار
،،،،،،،،،،،،،،،،،،،،،،،،،،،،وتبقى لدسمين الشوارب وظيفــــــــه

الا ومع ذلك لك الله لنا كــــــــــــــــــار
،،،،،،،،،،،،،،،،،،،،،،،،،،،،عن جارن ماقط نخفي العلوم الطريفه

نرفا خمال الجار لو هو بنا بـــــــــــــــار
،،،،،،،،،،،،،،،،،،،،،،،،،،،،ونفرح حجاجه بالعلوم اللطيفــــــــــــه

ولا نبدي الخافي لو صار ما صــــــــــار
،،،،،،،،،،،،،،،،،،،،،،،،،،،،وندمح خمال الجار لو بان حيفــــــــــه

ونرفا خماله رفيه العش بالغــــــــــــار
،،،،،،،،،،،،،،،،،،،،،،،،،،،،ونودع له النفس القويه ضعيفـــــــــــه

نبيه إليا بدل الدار بديــــــــــــــــــــــار
،،،،،،،،،،،،،،،،،،،،،،،،،،،،وكل بجيرانه يعد الوصيفـــــــــــــــــــه

احد ٍ على جاره بختري ونـــــــــــــوار
،،،،،،،،،،،،،،،،،،،،،،،،،،،،و احدٍ على جاره صفاته محيفـــــــــه

وصلاة ربي عد ماخضر الاشجــــــــار
،،،،،،،،،،،،،،،،،،،،،،،،،،،،على النبي مدي الحقوق الشريفــــه

[المدرس]

الخليوى يبتهل إلى الله

يا لله يا لمطلوب منشي غمــامه
…………………...……يا رازق القاع المحيـلة بـهـــراف

مزنن من المنشاء تــوالي ركـامه
……………………...…روايحٍ تـاتي من الكـاف لـلـكــاف

يا ميدس السيل زامـي حزامــه
…………………….منخشم اجاءلرعون سلمي للاشراف

وعرض علىاللبه مشاكي جهامـه
……………………...….غديه تواسى كل نجدٍ بلاريـاف

يـمـقسم ارزاق البهايـم بفامــه
………………...........ياخالقٍ خلقك علي عدة اصنـاف

الكل تعرف فطرهـا من صيامــه
…………………..……الطايـرة والي مع الـقـاع زحـــــاف

يطلبك عبدك وانت تفـهم مرامـه
……………………...يالــواحد اللي لـلخـفـيات كشــاف

تجعل لنا يوم المـجازى كرامــه
…………………….وتقسم لنامن خشيتك عندك اسلاف

ابرك من الدنيا ولذت طعامــه
……………………....لو هي تفرّشـلك على زل والحـاف

لو زخرفتلك كود تاخذ مرامــه
…………...…………نــوبٍ تـــردك لــلمــهونة والضـــعـاف

ونوبٍ تخير من فواكه طعامــه
………………..……. ونـوبٍ رغـيـفٍ يا حصل تاكله حـــاف

لا شفت كثر اتقلبه وابترامــه
…………………....…لولا كثافك عن حلا الناس تــنعــاف

حطت بنا سود الليالي علامــه
…………………...….من كـثر تحسيـب الأ هـله ولانصـاف

واعرف انا يا ناس مانـي بعامـه
…………………….....وصـل الحـصاد وياتـي الـزرع قطـاف

يامـل عينٍ ساهـرة عن منامـه
………………...……ولا لــوم دمـع العـين من كـثر الاذراف

بس اتشدا عن دروب الملامـه
………………...……ودربـي تبـين عن اهل البـيت بـخلاف

عفنا دورت الفود نبي السلامه
………………...…..والمنـهزم يسرى مـع الـليـل لا خــاف

يطلب نـجاة النفس قبل الندامه
…………………....قـبل يحـط بحفـرةٍ طـول مـا يــشـــــاف

يردم عليه من الوطا له اردامـه
…………………...…مـــع شارتـيـن دب الأيـــام وقــــــــاف

ونده من الدنيا طرف خب خامه
……………………....والـمـال لـلــوريــث لـو كثر الاطـــــراف

[المدرس]

وهذه قصيد ه اخــــــــــــــــــــــــــــــرى :

لاتشتكى من ضيقة ايامك لاحد

................................... ادفن همومك كلها تحت الثرى

احفر لسرك داخل انفاسك لحد

................................. لاصار هراج الملا بك مادرى

اللى لمس جرح بجوفك مابرد

................................ يفرح اليا ابطى الجرح والا مابرى

تبقى بوجدانى لو الحاسد حسد

.............................. واقول احبك واعلن الحب جهرى

حبك بقلبى عاش واثمر وانفرد

............................. ولا غيرك او مثلك على بالى طرى

ان زانت الدنيا قضيناها رغد

............................ والا صبرنا لين يجرى ماجــــــــرى

[المدرس]

وهذه من القصائد الرائعه:

قلت اضحكى قالت 00 لأجل خاطرك سم

........................................اضحك وانا اللى ماعرفت السعاده

قلت اضحكيلى واحرقى داخلى هم

...................................... خليه يدفن جرح قلبى رمــــــــــاده

خلينى انسى كايد الحـــــــزن والغم

..................................... فى ضحكتك لهموم قلبى اباده

لحظة قراق ولا بقى شى مبهــــــم

.................................... فرقا وباقى العمر كله نكاده

ونظرت لافاق السماء وقلت ياكـــــم

................................... وسعك ولكن ضاق عندى مداده

انا الذى حلمى بقلبى تيتــــــــــــم

.................................. وباقى ربيع العمر ملبس حداده

لعيون غرقا بالمدامع تألم

................................. اقتل جنون الياس قتل الاراده

للى عيونه حور سحر تبـــــــــلم

................................ سود هدبهن حاش وجدى وصاده

بعيونها ابلغ صمت ليه تكلم

............................... بعيون محروم هواه ومراده

لها احترق ودموعها كونت يم

.............................. وسط المحاجر واحترق له زياده

[المدرس]

وين الناس

يعني القصايد ما أعجبكم