المساعد الشخصي الرقمي

مشاهدة النسخة كاملة : (عله يعل تمير)


اتيكا
17 / 04 / 2004, 23 : 12 AM
(عله يعل تمير)

عل السحاب اللي تنهض مراويح = له حلكةٍٍٍٍ مثل الليالي المخيفه
فيه الطها يشبه خيام مطافيح = وطحان يطحن فيه تسمع رجيفه
صب المطر صبة دلي منازيح = مايحدها الشواف يسمع وحيفه
شهرين ينشي بهظلة للسواريح = حزة غياب الشمس يبدا رفيفه
وشهرين ينشي والهوا له مناطيح = ويحير بالوديان يصفي غريفه
ويعله الوسمي بسحب ٍملاقيح = العشب عقب الصيف طايل عطيفه
عله يعل اتمير وذيك الصحاصيح = رجع ٍ ذكر في اتمير بقدوم صيفه
حيثه مقر للرجال الطحاطيح = أهل اليدين الطايلات النظيفه
من جالهم يبشر له ابهة الريح = طبع لهم يوم السنين الكسيفه
فنجال بن لاشربته تصاحيح = والعود الازرق والنفوس الخفيفه
عدو على حاتم بحط المفاطيح = وعدو على الخيال عنتر وسيفه
اجزل مجزل بالوجيه المفاليح = يشهد على ماقلت في اتمير ضيفه
من شافهم نفسه تشوف التشاريح = يشوف فيهم مايناسب الكيفه
العرق طيب والمناجب زحازيح = يرسون ماترسى الجبال المنيفه
لاانصك بابٍ التمارا مفاتيح = يسعد بهم راع العيون الكفيفة
ياما وياما قيل فيهم تماديح = وياما وياما طوعو للعسيفه
أقول قول الحق مارجي مصاليح = وللقول برهان يبدد لزيفه
يلومني فيهم إهبال مطاليح = اللي تقفوا كل نفس عفيفه
إحثال ناس فالمجالس مكاليح = قوم تحب الهرج لأجل اتحريفه
الهم سلامي مثل طعم التفافيح = واجل من شوف الوليف الوليفه
الشوق يم تمير وربع مماليح = أقنب قنيب الذيب واهرف هريفه
وأختامها عزه يخز المشافيع = يارب يالمعبود يبتل إبريقه

شعر / عبدالله بن محمد الخضيري
بتاريخ 5 / 2 / 1425هـ

أمير الحروف
17 / 04 / 2004, 15 : 01 AM
اتيكا يعطيك العافيه على القصيدة فعلاً قصيدة جميله بقافية تعسر الكثير من الشعراء لكن الشاعر الخضيري يعرف من أين تؤكل الكتف زي مايقولون...
شكراً لأضافة الروعه...
وشكراً لنقلك الجميل والواضح وكلمة أخيرة بالمصري (( حطها حلقه بودنك )) لاتحرمنا من ذووووووقك...

نقا هشال
17 / 04 / 2004, 38 : 03 AM
اتيكا

يعطيك الف عافية

على نقل القصيدة الرائعه لنا

وصح لسان الشاعر

عبدالله بن محمد الخضيري

المدرس
18 / 04 / 2004, 23 : 12 AM
سلام يا هل الجود والطيب والعز -- يالي لكم بالصدر قدر ومعزه
القلب من فرقا الاجاويد يهتز -- مثل الشجر يوم العواصف تهزه
في قربكم كل المخاليق تعتز -- وعيني لكم تشتاق كل حزه

ابوريان
18 / 04 / 2004, 05 : 02 AM
تسلم يا اتيكا على نقل قصيدة الشاعر عبدالله الخضيري ولا اقدر اقول اكثر مما ذكرت في وقت سابق وقي قصيدة سابقه ويعطيك الف عافية وتسلم على جهودك 0 اخوك ابو ريان



سر يا قلم واكـتب من الشعـر أبيات &&& أبــيــات فـــيها مــن قصيد يسلي

واكـتب على صفحات بيض مطوات &&& مــطــويه فــــيها الشعـر ما يملي

قـصـايـد تـقــرا عــلى كــل حـــزات &&& محـفــوظة في دفــتري وبسـجلي

فـيـهـا مـن آبــيات شــعـر مـنـقــات &&& مكـتـوبة مـن نـفـح وردي وفــلي

وموجـهة عـبـر الفـلـك والـمدارات &&& بـيـن الغـيـوم وبـين مزن مـتعـلي

لناس لـهـم بالـقـلـب قـدر ومعـزات &&& وافـعـالهـم تـذكـر عـلـى كـل حلي

في مـنـتدى لتـمير شـفت المسرات &&& وشفـت الكرم من بـين ربع تهـلي

الطـيـب بأهـل تمـير ما فــيه شكات &&& وهم أساس الطيب من وقـت زلي

والضيف لا جاهم تعالته الاصـوات &&& كـلن يقـول الضـيف يدخــل محلي

مقـدارهم للـضـيف في كـل الأوقات &&& ولا قــد خــبر مـن قال خـله يولي

أصـل الشجاعة والـكرم والمروات &&& وقـت الـشـدايـد دخـيـلـهم يستظلي

متوارثين الطـيـب راعـين فـزعات &&& صغـيـرهـم لا اقـبـل يـرحب ويهلي

وان جاهم الغازي يشوف المنيات &&& ويـشـوف قــدامه سـيـوف تــسـلي

يـا لا بـتي يا تمـير من فـايت فـات &&& وقـت مـضى ورصاصـهم مسـتقلي

وان جيتهم عاني لقـيت الوجاهات &&& ونار الغـضـى بـوجارهم تـــشتعلي

وان قلت آنا لي حاجه بين حاجات &&& قالوا لي ابشر والعـشاء جاهـز لي

ومدو صوانيهم من جميع الملذات &&& وفـيها من القـعــدان عــشـر تـشلي

وقضيت ملزومي وقلت السلامات &&& وسريت في ليل وانا ادعي واصلي

واقــول يـا الله يا عـالم بالخفـيات &&& تكــفيــهم شـــرور الحـسد والـتبلي

ما قـلـت قــولا فــيه شـك وريبات &&& ولا نـيب اجـامـل قـاصـدا حـاجة لي

حــبيـت آبـين بالقصيدة والآبـيات &&& واذكــر خــصال مــدونه في سـجلي

تمت وصلى الله على خيرالاموات &&& عــلــى نـــبـي في سمــاه مــتـعــلي




شـــعـــــر ابـــو ريـــــان

المدرس
18 / 04 / 2004, 42 : 10 PM
تسلم يااتيكا


ويكفي عودة أبو ريان

ومشاركته



مرحبا ابو ريان

و غيابك أتعبنا

صادق المشاعر
23 / 04 / 2004, 36 : 06 PM
مشكور يا أتيكا على القصيدة الرئعة والجميلة جداً حقيقة


وتسلم وزودنا بما عندك وشكرررراً

عبدالله الخضيري
23 / 04 / 2004, 20 : 10 PM
إلى أمير الحروف الاحساس صادق والنيه خالصه وجنبنا الله واياك الظن..


ياليت أبــــو ريــــان يعرف شعوري ** قصيدتي في تمير عين الحقيقه
شاعر مع الشعار غاص البحوري ** يفتح برايه للأمـــــــور الفليقــــــه
يومٍ أمير الحرف سجل سطوري **مدري من اللي شايفه في طريقه
وصل له التعبير وكامل سروري ** واحلى التحايا فالعروق العميقــــه


***************************

إلى الاخ نقا هشّال- الوابل اشكركم على اطرائكم الجميل وامدكم الله بالصحه والعافيه..



أخوكم/ الشاعر:عبدالله الخضيري

هادي
24 / 04 / 2004, 34 : 02 PM
ما ابدع من القصيده الا تواجد صاحبها

وكم كانت فرحتي برؤيته بيننا

فاهلا بك اخوي ابو فهد وحياك الله بيننا اخ عزيز وصديق مخلص

نورت ساحات تمير بقدومك

هلا باللي وصل صوته قبل تاصل ريحته الطيبه

نورت ياغالي

اخوك ومحبك هادي


سلام