كان ودك بالفراق ابشر عسـى عمـرك طويـل ...

[مخاوي الخير]

من بغى الفرقا .. لقى له عذر وأسبـاب ودليـل ...
خل عنك العـذر والأسبـاب دام الحـب ضـاع ...

كان ودك بالفراق ابشر عسـى عمـرك طويـل ...
لاتردد وأنـت لـك كلمـه ولـك أمـرٍ مطـاع ...

لـي عليـك انـك تبـت بكلمـه تشفـي الغليـل ...
ولك علي إني لأوقـف وقفـة الرجـل الشجـاع ...

لاتجاملنـي مخافـة قـال مـدري خـوف قيـل ...
عمر هرج النـاس مايسمـن ولا يغنـي جيـاع ...

كان قصدك سر حبـك اوعـدك لأصبـح بخيـل ..!
واحمل أسرارك معي للمـوت قـدر المستطـاع .."

بس قلها ..{قل ما احبك} وابشر بصبرٍ جميـل..!
لاتحسب إني مثـل مـن طبعهـم لـوي الـذراع ..

صاحبك ماهو كـذا ياصاحـب القـد النحيـل ."
صاحبك طبعه غريب وغربتـه غربـة اطبـاع .."

فالهـوى مايقبـل الحـل الوسـط ولا القلـيـل ؟!
مثل ماهو لا شرا يشـري اليامـن بـاع بـاااااع !.!

ثابتٍ لـو هـي تميـل الأرض حـدره مايميـل ...
يـدري إن الفقـر ماهـو عيـب والدنيـا متـاع ..

ماعشـق لـذة حياتـه كثـر {عشـق المستحيـل}
ولا كره حتـى مماتـه كثـر {كـره الانصيـاع}

كم تعلمت من{شديد البـدو} وش معنـى "الرحيـل"..
وكم تعلمت من {غروب الشمس} وش معنى "الـوداع"

وكم تعلمت من {سحاب الصيف} وش معنى" الحصيل"...
وكم تعلمت من {ليال البـرد} وش معنـى "الضيـاع"

إيه .. أنا هذا .. طريقي موحش وصعب وطويـل...
وانـت لامنـك تعبـت العالـم فجوجـه وسـاع ...

اعتبرنـي فـي بدايـة سكتـك "عابـر سبـيـل"
ورح وأنا قلبي معك من ويـن وجهـت الشـراع ..

يكفـي إنـي لاذكـرت بسالفـة عشـاق قـيـل ..
{عاشر احبابه شجـاع وفـارق احبابـه شجـاع }