ديوان الشاعر :فهد المفرج التميمي حفظه الله [الأرشيف]

شامخة

21 / 08 / 2007, 16 : 08 PM

::
ياريوف
كتبها الشاعر في ابنته ريوف بعد غيبتها عنه
::

يا ريوف ياعلـّك بحالي تروفين =لاقلّ شوفي وانحنت بي عصـــايه
يميـــن من نـزّل تبارك وياسين =انك قمر عمري وكوكب فضايه
أدراك بالخاطر واعاملك باللين=وارجي عسى الله مايخيّب رجايه
احب من حبك واعادي المعادين=وادعي لك الله بالســـتر والهدايه
فقدتك البارح وجريت صوتين =هذي وهي ليله وعـــند انسبايه
كله غلا ياويلي اثر الغلا شين=الله واســــاله لايبيــّن غــــــلايـه
من حبها حبيت كل الصغيرين =صـــارت محبتهم بقلبي هوايــــه
عودتك الممشى على شان تمشين=اشد بالثنتين واقصـــــــر خطايه
وليا بكيتي قمت اهلل وتصغين =واحيان اغني لك واردد غنــــايه
يضيق صدري لاسمعتك تونين=واجـــر صوتي من خـلاي بـخلايه
وان جيت ابقفي عنك لدّيت بالعين=الــدرب قدامي واطــالع ورايــه
رد الوفا ياريوف ماابيه ذالحين=ابيــه لي دارت عليــه رحــــايه
ابيه لا منه غدا الليل ليلين=لا اشتدّت الايام واظلم سمـايه
وابيه لامن صارت العشر ثنتين=اليا اتركوني عزوتي واقربايه
وابيه لا عزّوك فيّ المعزين=تدعيــن رب البيت يغـفر خطــايه
اليا كتب ربي افراق المحبين=ثم ادفنوني لابتــي واصدقايه
توك صغيرة سنّ مانتيب تدرين=والعــالم الله وش تكــون النهايه
اما التفتي لي وزين على زين=والا رميتينــي بــدار الرعـــــايه

::

شامخة

21 / 08 / 2007, 17 : 08 PM

::
وجودي على الطيب وجودي على الأجواد
::

وجودي على الطيِّب .. وجودي على الأجواد = وجودي على اللي ضيفهم مايملونه
وجودي على شوف السواني وهن رداد = وجودي على شوف البعل يوم يطوونه
وجودي على الشيلات ومشاهد الحصاد = وجودي على طرق الهجيني يشيلونه
وجودي على شوف الحيا والمطر منقاد = وجودي على شوف البدو يوم يتلونه
وجودي على شوف المروبع رفيع عماد = وجودي على شوف المغاتير من دونه
وجود السجين اللي تقيد عليه قياد = فقير ولا له لابةٍ تقضي ديونه
وانا وأحمد الله ماعليَه من الحساد = ولاهمني هرج الردي عميت عيونه
وانا لي مع أهل الطيب مصدر ولي ميراد = وأحب النشاما وأبخص الطيب وشلونه
وأحب الرفيق اللي يسير بلاميعاد = وأحب الشجاع اللي خصومه يهابونه
وأحب الأصيل اللي تقيد بسلم أجداد = يهب الهواء ويزل ماحرك غصونه
ولي منهج ماغيره دام لي مقعاد = يشيب الغراب وطيب الساس ماخونه
ولا أخاوي الا طيبٍ يفتخر بأمجاد = اليا ضاقت الدنيا بالأجواد ينصونه
ولانيب للمقفين تابع ولاطراد = ترى طارد المقفين تسري به جنونه
ولانيب للي صد عني ترى نشاد = ولاأخيل برق لاح في عالي مزونه
ومن زعل مني قلت له منت ابن شداد = ولا انته ذياب اللي بشلفاه يطرونه
وأنا ماأرجي محمد ولاخفت من حماد = ولا قلت وين حمود ياللي تعرفونه
ولاأخلي الدلة على ذمة البراد = وأنا أنقد على اللي طبع الأجداد
وأنا ماأذكر اني كنت شاعر ولاقصاد = لكن الزمن خلاني أقصد مع لحونه
تصبرت لي مدة وأشوف الصبر مافاد = وعزي لمن بيح شقى الوقت مكنونه
ياليت الزمان اللي مضى مرة ينعاد = ياليت الليالي تحفظ العهد وتصونه
أهل العباير لاطرى مامضى وش عاد = زمان السعد لافارق الناس يبكونه
عسى الوقت يصفي والليالي تعود أعياد = يطيب الصويب ويسعف القلب مضنونه

::

شامخة

21 / 08 / 2007, 17 : 08 PM

::
في رثاء والده الشيخ ابراهيم بن عبد الله
::

ياقبـــر سلم لي على اللي نــزل فيــــك = مـــع النبي الهاشــــمي والصــــــــــحابه
ياابوي ياللي طيـــــــبات ممـاشــــــيك = اسمع ولدك اليوم يكتب جوابـــــــــــــــــه
بجيـــرة الرحمـــــن ياابوي اهــــنــيك = الواحـــــد اللــــــي مايخـــيب الرجــا بـه
ياابوي جعل الغيث يمطــر ويســقـيـك = يرش قبــرك ليـــن يربــــــع جنـــــــــابه
ماعنك خافي كل ما حـــــل طــاريــك = يهــــــل دمعـــي مــثــل وبـل الســـــحابه
وتبكي الحنون وتنتخي بك وترجـــيـك = من لامــــها جعــــــله يضيــــع صــــوابه
وذي بندقك تبــــكي وبشــتك ينـــاديـك = وعلـــيك راعي الطيـــب شــــقـــق ثـيابه
ويبكي عليك العود الازرق ويرثــــيـك = المجـــــلـــس اللي مابـــعـد صـــــــك بــــابــه
وتبكي عصاك اللي وزانك تبـــــاريـك = والدلـــه الصــــفرا وباقــــي زهــــــابـــه
ياابوي ليتك تســــمع اللي يشــــــاكيـك= وتشـــــوف عقبك ماجــرى له وصـــــابه
على النــــعش سجت عيــوني تراعيـك = واشـــــوف قبـــــرك يــــوم هلــــوا ترابه
وشفت النصــــايب فوق قبرك تحجيـك = ياشين هـــــاك اليوم واللـــــي جـــرى به
اقـــفــــوا وانا قلبي من الشوق قافــيـك = اقنــب مـــن الفـــــرقا قــــنيب الذيــــــابه
ياابوي انا لك برفع الصوت وابكيــــك = وقت مضـــى وايــــــــاك لاواسفــــــــابه
لوطالت الايـــــــــــام مانــيب ناســيـك = وشــــــلون ابنسى مـن عــــــطاني شبابه
وياتمير انا عقب احمر العيـــن ماابيـك = تميـــــر عقب العـــــــــود وش ينبــــغابه
لولا رجـــال فيك ماجيت ناصـــــــيـك = اللي لهم عــــــــز وجــــــــلال ومهــــابه
كل يغيـــــــــب ورجـــــعته لك تسليـك = الا طـــــــــريح المــــــــوت يبطي غيـابه
مرحــــــوم يااللي كل الاجـــواد تغليـك = فيك الكـــــــــــرم والجـــــود كل درى به
سبــــــــع سنوات مالقيــــيـــنا مداويـك = عســــــــى لك الجـــــــنه من الـله وهابه
في جنــــــــــة منـــــــزالها عند واليـك = مع النبـــــــــــي الهاشــــــمي والصحابه

::

شامخة

21 / 08 / 2007, 18 : 08 PM

::
الله على الدنيا
::

البارحه لين اذّن الفجر ياذيب=وانا سهير العين متكدّر البال
في مرقدي واودّي افكار واجيب=ماغير انا والهم رجلي وخيال
اونس بقلبي مثل شلفا تريحيب=اللي مع الشجعان يضرب به امثال
اسري مع الهوجاس وارسل مناديب=والدمع من عيني على الخد همال
ذكرت ابوي اللي غزى عارضه شيب=وجريت في صدري من الضيق موال
وذكرت ربعي كاسبين المواجيب=اهل الوفا والطيب ذربين الافعال
وذكرت سجات القدم والتعاجيب= وسوالف ٍ معهم عريضات وطوال
وطرى علي علوم رد ّ ومكاتيب=وماكل مايطري على البال ينقال
الله على الدنيا تكدّر مشاريب=يوم ٍ على حال ٍ ويوم ٍ على حال
ياليت لي جنحان واطير واغيب= اغيب عن عين المعادي والانذال
نظم ٍ على بالي وقلته بترتيب=والا فانا مالي على الناس مدخال
وياعل قلب ٍ مايقدّر هل الطيب=تومي معاليقه من الجال للجال
ياعل يحتارون فيه الاطابيب=وراعيه يصبح داخل القبر نزال
::

شامخة

21 / 08 / 2007, 19 : 08 PM

::
ربعي تميم أهل الكرم والحمية
::

يابنت كان انك عن الحب تدرين=الحب شر وعلة ٍ باطنيه
وانا بحبك مت ياقرّة العين=مير الله اقوى مالنا قابليه
اصبر على جور الهوى والصبر زين=والحمد للوالي عزومي قويه
عزيز نفس ومن رجال ٍ مسمين=ربعي تميم اهل الكرم والحميه
غيرك بنات ٍ يذبحن المهاوين=يبن وصلي ماتغلن عليه
لكن على الله ياعذاب المحبين=ياعل رب البيت يبلاك فيه
اموت ماقد قلت يابنت تكفين=وعندي على ظلم الغلا مقدريه
وترى الهواويه ضعوف ومساكين=علاجهم ماهوب فـ الصيدليه
علاجهم عند البني المزايين=كم واحد ٍ منهن وطته المنيه
::

شامخة

21 / 08 / 2007, 19 : 08 PM

::
عباس يبكي على شارون
::

عباس يبكي على شارون=وشارون مجرم ومحتالي
ملعون يبكي على ملعون=الاول العن من التالي
قولوا له ان العرب يدرون=والناس ماهم بجهالي
وش ذا البكا جعلك الطاعون=يامال قصاف الاجالي
تبكي على شرذمة صهيون=ياعنك ماانتاب رجالي
اهل فلسطين مايرضون=تبكي على شين الافعالي
اهل فلسطين ينتظرون=تطهير من رجس الانذالي
واهل فلسطين عز وعون=شجعان ورجال وابطالي
والا انت اظنك مثل فرعون=ياالله فزعتك ياالوالي
وياالله عسى من بكا شارون=يموت حسره وغربالي

::

شامخة

21 / 08 / 2007, 20 : 08 PM

::
أنا مولع من صغر سني بنجم سهيل
::

أنا مولع ٍ من صغر سني بنجـم سهيـل=احبه واحـب اللـي كذلـك يحبونـه
الى اقفى لهيب القيظ واقبل نسيـم الليـل=وراع القنص والطير جـوّد دركسونـه
علـى واردٍ ماحـل عقبـه ولا موديـل=جديد الجيوب اللي من الشرق مضمونـه
الى ريّح الفكس آر وانحى سـواة السيـل=وبسم الله الرحمـن لا عـدّ طبلونـه
مجهّز ومعهم صنعة الروس والدربيـل=وفردٍ الى جـا لازمـه مـا يخلونـه
ومعهم دلال ٍ صفـر فيهـنّ بـنّ وهيـل=وكيفـ ٍ مهيّـل للنشـامـا يصبـونـه
سواليف وعلوم ونشامـا ودبكة خيـل=ونجر ٍ الى جا الضيف قامـوا يدنونـه
شبابٍ على يمنـاه طيـر ٍ يهدّ الحيـل=الى شالوا البرقـع وبالصـوت يدعونـه
ياويل الحبارى منه ويل ٍ رديفه ويـل=الى ذيّرت ثـم شافهـا الطيـر بعيونـه
الا يا معصبة الغتـر ياشبـاب الجيـل=هو اللي يبـي الخـّوه معاكـم تردونـه
ويالايمي مالك على اهل الولـع توكيـل=ومالك ومال اللي شكا الوقـت وطعونـه
عسى لايمي يشكي المرض ويتمنى الشيل=يعجـزون اطبّا المملكـه مـا يداوونـه
على شان يدري ليه انااحب نجـم سهيـل=الاواعـذاب اللـي سـواتـي يحبـونـه

http://www.5ymah.net/rm/ngmshyl.ra
للحفظ يمين الماوس حفظ الهدف باسم (http://www.5ymah.net/rm/ngmshyl.ra)
::

شامخة

21 / 08 / 2007, 21 : 08 PM

::
أخيل برق ينوض وشاقني نوضه
::

اخيل برق ٍ ينوض وشاقني نوضه=شمال عن ديرة ٍ مانيب راعيها
جعله على تمير ومبايض واهل بوضه=والشعب وام الرجوم يسيل واديها
وسد الشحمه يمتلي وتفيّض فيوضه=لين الزبيدي يذكّر في مفاليها
حتى الارطاوي يسيل وتمتلي الروضه=ويزين مرباعنا ياابوفهد فيها
أمر ٍ من اللي علينا فارض فروضه=احب ذيك الحزوم الشهب واغليها
ياعلّ من لامني يشيل معروضه=يستعطي الناس قاصيها ودانيها
ياعلّ تبلاه يااهل الخير بعوضه=تحتار فيها الاطبا ماتداويها
::

شامخة

21 / 08 / 2007, 22 : 08 PM

::
تكفى يا ابو متعب نبيها طلابة ..انتصاراً لرسول الله صلى الله عليه وسلم
::

ياعل من سب النبي والصحابه= يشوف ماشافوه تبّاعة الفيل
باكر يصب الله عليهم عذابه= ويظلّهم طيرِ مثل طير ابابيل
وتصبح منازلهم هدام وخرابه=ويشفي صدور اهل الصدور المغاليل
اهبوا مربية البقر والكلابه=اهبوا هبيتوا كان ماانتم رجاجيل
شرّابة الوسكي ذبحهم شرابه= حنا دواهم والليالي مقابيل
نبينا دونه اسود الحرابه= مير الخلا يااهل القلوب المهابيل
خان الدنمركي وقرّب ذهابه=ياويله من اهل السيوف المصاقيل
امه تبي تبكي وتنعي شبابه=وعليه عين اخته تبي تسهر الليل
وحياة من نزل علينا كتابه= انّا لها ياقاطعين المواصيل
بقيادة اللي كل مجرم يهابه= العاهل الحلحيل من راس حلحيل
شيخ الشيوخ اللي عزيز جنابه= ابن سعود الوايلي مسرج الخيل
تكفى ياابومتعب نبيها طلابه= نردّها في نحورهم ياملا السيل
نبي نخليهم عشاًَ للذيابه= وحنا هل العادات ذبّاحة الحيل
شعبك يبيها منك ياشيخ ثابه= نقمع بها روس الفتن والاباطيل
الليل والله يحمده من سرى به=وترى الندامه في السهر والتعاليل
وهذا الوطن نبينا في ترابه= وهذا فخرنا ياالقروم المشاكيل
اطهر جسد فـ اطهر ثرى لاغرابه= اليا فزعنا نرهب الجدي وسهيل
فـ قلوبنا محمد وشرعٍ مشى به= حبّه توارثناه جيل بعد جيل
من دونه السيف المذّهب نصابه= ومن دونه ارقاب الرجال المفاتيل

::

شامخة

21 / 08 / 2007, 22 : 08 PM

::
الشيخة
::

سلام يااللي على بالي وتطري لي = سلام يافتنة العــــــشاق ياالشيخه
سلام سلام ياالســـــــود المظاليلي = ياشمعة الكـــــون ياقبلة مطانيخه
ياويل الاجـــواد منك ومنك ياويلي = وياويح قلبي على جرحه وتوبيخه
يابري حالي ويامااكثر غرابيلي = والقلب يكفخ عليه وزاد تكفيخه
اترك جملنا يدرهم ياقمر ليلي= ماانتاب ملزوم في لطمه وتنويخه
احترت في وصفك وضاعت محاصيلي = ماادري زحل عالمي والا انت مريخه
حيل الله اقوى تراني طحت من حيلي = والله لجازيه قبل يفوت تاريخه
احمد نجادي مايهدا يارجاجيلي = الين يطلق على امريكا صواريخه

::

شامخة

21 / 08 / 2007, 23 : 08 PM

::

سرى بي هاجس

::

سرى بي هاجـــس ٍ شيّب عيوني ياملا النسيان =الا واعزتيل العيـــن مــن كثرة طــــواريهـا
متى يطري لنا الطـــاري نوجه يمّة الصـــمان=نجي ريضـــــانها ثم نتقــــــهوى في مفاليها
متــــى بنجــــتمع لو مرة في حــــومة النقـــيان= نشب النار وان جـا الليـــــل بتنا في مذاريها
متى بنصبح الفيضه ونجلس في حدى الريضان=متى الايــــــام ترجع واللــيالي مثل ماضيها
متى بنشرّف الابرق ونجلــــــس حـزة مســـيان=متى عيني عقب طـول البطا بتشوف غاليها
متى يذكر لنا الشـوكي ربيع وصـافي الغـــدران=اخيم في ترابيعه واوســــــع خاطــــري فيها
انا وربـــع ٍ مشـــاكيل ٍ نشـامى كلـهـــم شجــــعان =على اليمنى على اليمنى من اولـــــــها لتاليها

::

شامخة

21 / 08 / 2007, 24 : 08 PM

::
يامن يخبرني عن أوضاع لبنان
::

يامن يخبرني عن اوضاع لبنان=اخواننا في ديننا والعروبه
قلوبنا معهم ولو كان ما كان=وكاد والغلطه ماهيب محسوبه
منا وفينا والعرب شانهم شان=متفرقين وعهدهم ماوفوابه
اعراضنا تنهك ومستورنا بان=واطفالنا ذبحوا وراحوا جلوبه
الله ياشي ٍ نشوفه بالاعيان=شمال لبنان العزيز وجنوبه
مباني ٍ تهدم وتقتيل شيبان=وعجز ٍ عليهن الشيال معصوبه
ياالله لاتشمت بنا اليوم عدوان=يبكي وطن يعرب وتبكي شعوبه
بوش الدبليو كلب والمرت خوّان=وبلير مجرم ماجهلنا دروبه
عدوان دين الله ولا هم بصدقان=صدقان ابومرّه علينا عقوبه
وشلون نرجي من هل الذنب غفران=نشكي على راعي المعاصي ذنوبه
ياشعب عبدالله وياشعب سلطان=هبوا وشبوها عليهم شبوبه
في ظل قايدكم سلايل كحيلان=حبيب شعب المملكه ومحبوبه
عبدالله اللي يوم روغات الاذهان=ينخونه الفرّيس ويجون صوبه
للمجد والامجاد والعز عنوان=يسلم ويسلم شيخنا اللي ينوبه
ويسلم لنا نايف واسد نجد سلمان=اعيال ابوتركي سنام العروبه

::

شامخة

21 / 08 / 2007, 24 : 08 PM

::
الديره تمير والعزوه تميمية
::

حنا ذوي مانع آل عبهول وعياله=الديره تمير والعزوه تميمية
لاميرنا نبدي الرحيب باشكاله=ترحيبة العز والتقدير مثنيه
لاميرنا اللي علينا يرهي ظلاله=الله يجيره من العثرات والسيه
حييت ياشيخنا ياكاسب الطاله=يامرحبا مرحبا ياحامي الهيه
ياوارث المجد من عمه ومن خاله=من شجرة في ذراها الظل والفيه
حنا جنود الوطن والحرب حنا له =وفي ظل قايد مسيرتنا فداويه
واللي نوى الشر فال الله ولافاله=ماعندنا الا سيوف الهند محنيه
الله يعز الوطن ويسلم رجاله=انصار الاسلام بايات سماوية
ملوكنا فزعة اللي ضايق باله=حكامنا نصرة المظلوم جبريه
للدار قاده وللتوحيد خياله=وللعز مرجع وللمحتاج جاهيه
والله يطول عمر من ميل عقاله=ابواليتامى وزيزوم الرياديه
اي والله اللي سنام الفخر منزاله=عدوا نجوم السما من تحت كرسيه
قلته واقوله وغيري ياعرب قاله=والله فلا مثل ابومتعب ولا زيه
يشهد كلامه لا والله تشهد افعاله=بالعين شفناه والميه على ميه
يمسح دموع اليتيم ويصلح احواله=عز الله انه رحوم وطيب النيه
وختامها مانع آل عبهول وعياله=يدعون بالعز لملوك السعودية
::

شامخة

21 / 08 / 2007, 25 : 08 PM

::
أنا داري
::

انا داري واداري وانت داري=عن جروحي وظرفي واعتذاري
ولكن التغلي فيك عاده=وانا مليت من طول انتظاري
تسمع قول عدواني وتزعل=حذاري يابعد عمري حذاري
ترى العدوان نيتهم خبيثه=يجيبون الغداري بالقماري
تأكد قبل ماتزعل عليه=تثبت مثل مسلم والبخاري
الا ياطير صيدك لي تردا=علامك وانت صياد الحباري
انا والله خطير ومتولع=وجاري لي من الاحباب جاري
وعيني ماتنوم الليل كله=سهيرة طرف وتهل العباري
وانا اللي مابقى لي الا ثواني=من مجافاك واستدعي الطواري
يشوفون العلاج اللي يناسب=قبل يكشف علي الاستشاري
وانا عارف من اشكي له همومي=الى من صارت الدعوى جباري
اشاكي اللي يعرفون الموده=مثل عزام والا ابومشاري
رجال لانتخيت بهم شفوني=رجال افتخر فيهم واماري
ابشكي عندهم ظبي ظلمني=رماني بالمشوك والسواري
وخلاني طريح في حباله=اصوت مير مالي من مثاري
عليه الله واكبر كلما جا=مع العذال له ذكر وطاري
لعب لي لعبة الكوره وسجل=هدف محسوب في بابي كباري
لعب بي لعب ماجد فـ البطوله=غدى فوز البرازيل انتحاري
حذفني حذفة البايع بضاعه=وهو مغلوب وسط يدين شاري
يتل القلب مني تل طايش=الى من تل له جيب سفاري
مدلل واعذابي من دلاله=على سرقة قلوب الناس ضاري
غزال شايف نفسه علينا=تقول مرشح لمنصب وزاري
وله حق يتدلل ويتكبر=مادامه للجمال اصبح اداري
ولي حق اشتكي مادام قلبي =يحب الزين رغبه واختياري
وختم الشعر صلى الله وسلم=على محمد عدد رمل المذاري
::

شامخة

21 / 08 / 2007, 26 : 08 PM

::
بمناسبة اليوم الوطني للمملكة الانسانيه تفضل الشاعربالقاءها في الأمسية الشعرية التي أقيمت في
مدينة الأمن العام بالرياض يوم الثلاثاء الموافق 26/8/1427هـ
::

الله اكبر شــــوقنــــا غنـــــا حمــــامـه = الله اكبر يااللحـــــــــون السامــــــريه
الوطــــــــن هذا رفــــــع ربي مقامـه = به ربى بيته وبه مسجد نـــــبــــيــــه
الـــنــبـــي عليــه من ربي ســـــلامـه = شع نوره من بـــــــــلاد ٍ يعربيــــــــه
من بـــــلاد ٍ حـــكـــمها يمشي نظامـه = بالشريعه والسيــــــوف الفيصــــــليـه
جعل ابوتركي محرمــــة عــظــــامـه = ماتجيها النـــــــار يارب البـــــــــريـه
اشتكت له نجـــد من لوعــــة غرامـه = وطلبت وصله وبادلـــــــهـــــا الهديـه
امتطى صهــــوة جـــواده في ظلامـه = وصبّح العــــــارض وهنّوه ضحويه
حطوا المركى على اليسـرى وامامـه = صفوا العربـــــــــــــان فرحين بمجيه
جوا يهنونه بحــــكـــمــــه والسلامـه = وغرّد القمري على عـــــــــالي البنيه
وقامت العرضـــــه بفرحه وابتسامـه = والخوي بشر باابوتركـــــي خـــــويه
الامام اللي زهاه اســـــــــــم الامامـه = قوّم التوحيـــــــــــــــد في نجد العذيه
يرحــــــــم الله من بنى دار الشهامـه = ويحفظ الله من حـــــفــظ عز الرعـيه
سلم الله راس عبـــــــــــدالله وادامـه = ابومتـعــــب راعــــي اليمنى السخيه
غيث شعبه من وبــل صادق غمامـه = مغني النفس الفــــقــــيـــــره والغنيه
من تعرّض له يبي يقطـــع حـزامـه = عازم ٍ عــــزام وعــــــــــزومه قويـه
يـوم ريّس لـيـبـيـا زوّد كــــــــلامـه = سكّـــــــته ذخــــــــر الجدود الوايليـه
علمه فن التخــــاطــــب والفــهامـه = واجــــــحـــــــر الليبي ولاله مقـدريه
ماجـــــــــــداه الا يفرّك في بهـامــه = والخطيــــــــه مادواها الا الخطيــــه
هب يامعمــر ابومشـــــــلح علامــه = صار مثل ابليس في عيد الضحيــــه
من تكلم في فــــهــــد حنـــا اكعامـه = وعند ابومتعب ملـــــفـــات القضـيــه
ولولي العهد قـــــدره واحتـــــرامـه = عشت ياسلطـــــــــان يازبـن الونيــه
ياسناد الحـــــــــق ياذروة سنـــامـه = يامقر الجـــــــــــود ياجـزل العطيــه
ماعلى من حب ابوخــــــالد ملامـه = طيب المـــــــــدات وبنفس ٍ رضيــه
ومن نشدني عن رمـوز الاستقامـه = والشجـــــاعــــه والسـياسه والحميــه
قلت له هذاك مشـــهـــود الكـرامــه = سيدي نايـــــــــــف وزير الداخلـيــه
ايه يارجل الأمن واصل الزعامــه = ايه يارمـــــــــــز الوفا والصيرميــه
من شمال الجوف لين اقصى تهامه = ومن ورا الدمام لين اقصى الحويــه
الوطن ءآمـــــن ويحظى باهتمامه = طوّل الله عمر زيـــــــزوم السريــه
وعشت ياسلمان يانـــــــور اليمامه= ماتوفيك الحــــــــــروف الابجـــديه
شيخ نجد وفيك حـزم وبك صرامه = يامعشي الذيب وســـــــــط المهمهيه
والختام وزبدة الهــــــــرج بختامه = الوطن هــــــــــــــــذا ابد مافيه زيه

::

شامخة

21 / 08 / 2007, 27 : 08 PM

::
قل عيدك مبارك ترى الليلة العيد
::

قـــل عيـــدك مبارك ترى الليله العيـد = عيد الفطـــر ماهــوب عيد الضحيه
وش ينبغى بالعيـــد مـــادامـــك بعيــد = وش ينبغى به وانت زعــــل ٍ عليه
حب العرب ينقص وحبــي لك يزيــد = حبك صواب وحــب غيرك خطيه
اسهر الى نامـــت عــيـــون الاجاويد = مير الله اقوى ياالعيــــــــون الشقيه
لاتحسب اني ســـــــالي ٍ يااتلع الجيد = تطـــــري عليه كل صبح وعشيه
وحياة رفاع الســـمـــــــا مروي البيد = اني عـــلـــيـــل وعلتي بـــاطــنيه
ذبحتني ياحـــــــــــول يافاتــن الغيـد = اثرك خــــــوي ٍ مايراعي خـــويه
لولاي اداري الهرج وادرا المــناقيد = من خــــــــوفتي لايكثر الهرج فيه
لانهبك في غفلة عيــــــون الحواسيد = واسكن انا وايـــــاك بارض ٍ خليه
تبي الصراحـــــه ياصدوق المواعيد = الحال من عـقبك تـــــــراها رديه
عز الله انك ظبي من شــــرّد الصيد = واتعبت ســـــــادة قنص وبوارديه
لايامــــهـــددني بـــالابعــــاد تهديــد = يكفي التفاته منك تحســـــب هديه
بالله عـــــايدني ترى الليـــــله العيد = عيد الفطر ماهوب عيـــد الضحيه

::

شامخة

21 / 08 / 2007, 27 : 08 PM

::
أمانة ترى الي في كافيني
::

ياعيني كفاك دموع ياعيني=نثرتي عبايرك وفضحتيني
أمانه ترى اللي في كافيني=ونفسي على الكايد معرّضها
***
وانا لو دموعي تحرق خدودي=حشا مااتعدّا منهج جدودي
وراسي ماينزل دامي سعودي=فريضه ورب البيت فارضها
***
والا ياحبيبي لاتحداني=ترى اللي وصلني منك كفاني
معنّا وحب الترف عناني=وشكواي للمعبود افوضها
***
ترانا من اسباب الهوى مرضى=وبالذل والهجران مانرضى
او انك تحسب ان الهوى فوضى=تعرّض لخلق الله وتمرضها
***
تحسب المحبه لعب ياالغالي=وانا اللي من اسبابك نحل حالي
واذا فيه كلمة حق قلها لي=وانا يمكن اقبلها او ارفضها
***
ويابنت ,, قلبي علته عله=ولاادري وش اللي منك جار ٍ له
غرامك غزى موطنه واحتله=خساير عسى ربي يعوضها
***
وانا اللي ذبحني صدق ياموضي=تغاضيك عن شرحي ومعروضي
والا ياظبي ماقلت مفروضي=واخوض البحور ان قلت لي خضها
***
ولكن امانه لاتضيعها=وداعه وانا عندك مودعها
وملعون شاريها وبايعها=عهود ٍ قليل العرف ينقضها

::

شامخة

21 / 08 / 2007, 28 : 08 PM

::
الله يعز البلد في ظل عبد الله
::

الله يعز الـبـلـد فـي ظــل عبــدالـلــه = سادس ملوك الوطـــن عــز السعوديـه
قــالـوا توفى فـهـدنا قــلـت لاوالـلـه = مـامـات شـيـخ لـه اخــــوان شـقــرديـه
اليوم في عهد ابومتـعـب تحت ظله = يمشي على سيرة اسلافــه بجديـــــــــه
يقول شعبي مثل عينـي وابفطـن له = لـلـه درك مــلـــــك يـا طـيـب الـنـيــه
مجبول فيك التواضع واصبح جبلـه = تحظى بتقـدير مــن شعبـــــك وشعبيـه
زعـيمنـــا يرتـــكي للحــمل ويشلـه = زعيـــمنا لـلـعـدو مـافـيـه مـاويـــــــــه
زعيمنا جعـل رب البـيـت يمهــل له = ريف الـــــرمـل واليـتامى والجلاويـه
ماهو غريب الســياسه فيـك منـدله = من روس حـكـام ورجـــــال سيــاسـيه
اهل المواجيب واهل السيف والدله = واهل الشجاعه الى من كــــبرت الهيه
اهـلــك خـــيــالة الــتوحــيد والمله = حـرابـة الـشـرك بــايـات سـمـاويـــــه
يوم القبـــور اعبدوها والفـتن عله = جـدك عــدلـهــا عــــقـب ماهيب ملويه
وابوك عبدالعـزيز الدين شـــرع له = ماجـــابـــن البـــيـض لامــــثله ولازيه
لاحـل طــاريــه يــرتد الحـــكي كله = ماعـــاد للســــالـــفـه روحـــه ولاجيـه
معــــزي اللي يعقد الحبــل ويحــله = مــعــشــي الـذيــب زيــزوم الريـــاديه
يالله عسى الجــنـة الخضـرا مقرله = آمــــين يـــاربــــنا يـــاغافـــر الســـيـه
ماشفت حـاكم حـكيم مثل عبدالـلـه = ولا شفت شعب مثل شعــب السعوديه

::

شامخة

21 / 08 / 2007, 29 : 08 PM

::

هاج فكري وبعث النور مصباحه

::

هاج فكري وابعث النور مصباحـه = والمحبة هامت افكار هايـمها
ابعدوا عني وفضوا لي الســـــاحه =استدار بساحة العــــز حايمها
والله اني لشعل النار قــــــــــداحه = نار شعر تصطلي من يزايمـها
شاعرٍ غنى ويومـــــــي بمسباحه = رامته زين المعــــاني ورايمها
ليلةٍ بالعود والطيـــــــــب فواحه = ماحلى ريح النفل مع نسايمها
شاعر من نجد يعشق هوا الباحه = قوّم الدنيا على اربـــع قوايمها
ياديار العز ياقــــمــــــة الـــراحه = يابلاد ٍ مجــــدها من قدايمــها
ياهنوفٍ باكمل الزين فـــضـاحه = مرعفٍ سيف الهوى من جرايمها
في ذرى آل سعود للحيل ذبــاحه = أسرةٍ بالخير تمطر غمايمـــها
هم هل العوجا ذرى الشعب وسلاحه = المعارك كاسبينٍ غنايمــها
درعنا الضافي سنا النور وافراحه = الملوك اللي اكبار ٍ عزايمـــــها
شعبهم من خيرهم زادت ارباحــه = والموده بيّـنات ٍ علايمـــــها
علّـم اللي فوق دوشق وطـراحه = المهبل لاتغــــــــــرك عمايمها
ماتخوفنا من الكـــــــلب ونباحه = الكلاب الســـــود تزبن خرايمها
يااهل الارهاب ماانّـاب مـزاحه = دولة الاسلام نحفظ رسايمــــها
دونها دم العرب تنزف اجـراحه = مع بحور ٍ قطّـع الموت عايمها
الله اكبر ياندا الحــق وصياحـــه = الله اكبر يامثبت دعــــايمـــــها
ابوتركي منبع الخـــير مفتاحـــه =اقبلت لــــه نجد تلفــح سمايمها
اضحكت له يوم لوّح بملواحــــه = وارغدت والـعـدل جلا ظلايمها
الحـــــرم لبى الملبي بمصباحه = وارعدت مكــه ولانيب لايمها
والمدينه طيـــرها رف بجناحه = ديرة ٍ قبـــر النبي من وسايمها
ياوطنا دونك الشعـــب بارواحه = ترخص الارواح لاجت لزايمها
ياوطنا لك ثنا الشعر وامداحـــــه = والقــــوافي لك تقـلــط ولايمها
ياوطنا مسرح المجد وابراحـــه = جالبين الروح في سوق سايمها
والملك فـ قلــــوبنا زارع ٍ واحه = واحة ٍ خضرا تغني حمايمــها
ابومتعب عـــزنا باسط الراحـــه = بالعطا والخير سحت دوايمـها
صفحة امجاده بالانوار وضاحــه = السيـــاسه والعفو مــن قسايمها
قايد ٍ تشكر مساعيه واصلاحـــه = مصحفه يقراه والبيض صايمها
حافــــظ ٍ دينه بحله ومرواحــــه = الليالي وقت الاسحـــــار قايمها
كل نفس ٍ في ثرى الدار مرتــاحه = والليالي ماشكى الســـهر نايمها

::

شامخة

21 / 08 / 2007, 29 : 08 PM

::

مضى عام على البيعة

::

مضى عــام ٍ على البـــيـــعه ومــازلــنـا على المعهود = على المعــهـــود من عــهـــد الولا والسمع والطاعه
ألا ياعيــــــــــال ابوتركي ترانا مانسيــــــــــــنا العود = وحنا للذمـــــم وعـــــهـــــــــــــــودنا ماانّـاب بياعه
توارثنا محبتكم من الجــــــــــــــــــــــدان ورث جدود = وحنا مانبي الا انتـم محـــــــبة قلــــــــــــب وولاعه
غلاكم من غلا عبدالــــعــــــــــــزيز ابوالكرم والجود = جمعنا عــــقــــب فرقتـــــــــــــنا وربّـاعنا بمربـاعه
جـــــتــــه بالسيـف الاحدب والتعب والجهد والمجهود = الين اضفى عليها ستـــــرة التــــوحــــيـــد وشراعه
وعقبه واصل المشوار راع المـــــــكـــرمــــات سعود = سعود سعود راع الجود عـــــــــــون العود وذراعه
وجا للحكم فـــــيصلـــنــــا وفــــيــــصل موقفه مشهود = شهـــيــــد الدار يبــــــكـــــونه رجال الدين واتباعه
ومن بعده حكم خــــالد وخـــــالد له بقــــى وخــــــلود = وفي عهده شملنا الخـــــــــــــــير باشكاله وباانواعه
وحكمها بعد ابوبندر فـــــــهــــد والفــــهد نسل فـــهود = عليه الشعب يبــــكــــي من شــــهر سته لذا الساعه
وحنا اليوم في حـــــكـــــــــــــم الامام العادل المحمود = قوي الباس ابومــــتـــعـــب قــــريــن الخير منباعه
حبيب الشعب عبدالله وحنا له ســـــنـــــد وجــــــنود = زعيـــــــم ٍ حـــافـــــظ ٍ دينه وشعبه حسّن اوضاعه
نحب حب مايوصف نحــــبه حـــــب دون حــــــــدود = ونحب اخــــــــوان عبـــــــدالله ليوث الدار وسباعه
الا ياكثر ماقلنا وقـــــلنــــــا نطــــلـــب المـــــعبــــود = الا يــــــــــــــــالله طوّل عمر ابومتعب على الطاعه

::

شامخة

21 / 08 / 2007, 30 : 08 PM

::
سلام الله على البانين
::

سلام الله سلام الله سلام الله على البانيـــــــــــــن = بــــنــــوا مجــــــد ٍ باياديـــهم وكمــــلنـا بايادينا
ابومتعب وابوخـــــالد هل العوجـــــا حماة الدين = مزعـــلـــهم مـــزعـــلـــنــا ومرضيهم مرضينا
لهم فـ ارقابنا بيعه لهم فـ قــــلــوبـــــنــــا تمـكين = عــهــــــود جــــدود وسـط لحـــود نفنا ماتخلينا
غــــلاهم من غــــلا عبدالعــــزيز وكلهم غالين= وحنا تحـــت طاعتــــهـــم من اولنــــا لتـــــالينا
من اللي ناصر الدعــــوه من اللي ورّد الظامين = من اللي وحــــــــــــد الدوله من المينا الى المينا
من اللي حصّن الكعبه وزمزم والحرم تحصين =من اللي حكم الشرع السمــــــاوي فوق اراضينا
من اللي ومّن الحجاج لاجوا للحــــــــرم عانين = من اللي ولّف قلوب القــــبــايل قـــبـــل ياتــــينا
هذاك الفذّ اخو نوره حجا المضيوم والمســكين = هذاك اللي بعيــــــــــن العطف والرحمه يراعينا
هذاك اللي عشق نجد وسنينه في بحر عشـرين = هـــــذاك سنين حاضرنا هـــــذاك امجاد ماضينا
لفى من شرق يرفع بيرق التوحيد عـقـب سنين = من افــــــراق ٍ مـــعــــذبنا وشــــوق له ٍ معنينا
لفانا يضحك حـــجـــاجه وحـــنا له بعد راجين = وأسس دولة الاسلام وطبــــــــــــّق شرع والينا
تزّعم واشرقت شمسه على القاصين والدانيــن = تمنيناه منــــوه ليـــن جــانـــا ماتــمـــنــيــنـــــا
فرحنا ثم عرضنا عرضة ّ صفوا لها الصفيـن = وشـــاركـــنـــا وبـــــاركــــنـــا وهــنونا وهنينا
ونادانا المــــنادي رافـــــع ٍ صوته بعلم ٍ زين = وقال الحـــــــــكم لله ثـــــــــم لابوتركي ونادينا
حكم فينا بشرع الله وحــــــــدّ السيف للجانين= وسمّاها السعــــــــــــــــــوديه وباسماها تسمينا
تحت حكمه بنينا ياعرب بيت الـشعر والطين = وتحت حكــــــــمه تطهـــــــرنا وكبرنا وصلينا
وتحت حكمه توحـــــــــدنا وبينّا الهدى تبيين = وتحت حكــــــــــــــــــمه تعلمن وعلمنا وربينا
وتحت حكمه تجندنا وصرنا للوطن حــامين = وتحت حكمه ترابطـــــــــنا حضرنا مع بوادينا
تهقووها طويلين الشـــــوارب واقفوا مغلّين = يجرون الخــــــــــــــــزي والعار لادنيا ولادينا
هل الارهاب والتفجير والتكفير ملعــــونين =خسوا يخسون جـــــنــــد ابليـــــس لامنا ولافينا
هذولا مــــالــــــهم ذمــــه هذولا والله الغــــــاديـن =هذولا مجنن مجنن واجـــــــــن من المجانيــنا
اجل وشلون في شـهـر رمضان بفعلهم ناويــــــــن= جوار البيت في مـــــكـــه وياربي تعـــافيــــنا
ألا وش ذنب ابو تسعين عام وذنب ابو شهــــــرين =ألا ياكبـــــرها ياعبــــــرها الله لايـــــــــورينا
عسى الله مايوخذنا بفعل الطـــــــغمة الطاغيــــــن= وحوش ومجـــــرمين وظالمــــــين ومستبدينا
ينابح كلب لندن ويتعـــــــــــزوى بــــــارد الخدين = زبن عند اليــــهــــــود وقــــام يشتمنا ويوذينا
عماُ يعمي عيونه مابقى الا هو غـــــــراب البيـــن = اجل هي سايبه يومه على ابن سعود يدعينـــا
شبح وجه وعمى عين ومرض قلب وكسر رجلين =على من سب دولتــــنا وحاكـــمــــنــا واهالينا
انا بدعي وقولوا بعدها ياالســــامعــــين آمـــــيــن= عسى ربي يطــــــوّل عـــمـر ابونا اللي يذّرينا
عسى الله يحفظه ويديم عزّه خـــــادم البيــــتيــــن = ابومتعب تحت حــــكـــــمــــه تظلـــلـــنا وبنينا
ملكنا اللي نمـــــــاري بـــــه ونفخر به وله وافين = معزبنا وقـــــأيـــــدنا وسيـــــــــــــدنا وحامينا
ملـــــكـــــنـــا الوالد القايد ملكنا اللي حمى الثنتين = مجــــندنــــا لديــــــن الله ميــــاميــــن ٍ ميامينا
ملـــــكــــــنــا لاتضايق من فعول الزمره الباغين= تطمّن ياولد عـــبـــدالـــعـــزيـــــز ولاتوصينا
على اليمنى على اليمنى مــعــــك والله يمين يمين = ومايلزمــــك يلـــــزمــــنـــا ومايعــنيك يعنينا
ومايــــزعلك يزعـــــــلنا ومايرضيك به راضين = ومايبــــــعدك يــــبــــعدنا ومــــــايدنيك يدنينا
تأسينا باابوبكر وعمر وايضاُ بـــــــــــذا النورين =ورفعـــــــــــــــنا راية الدين الحنيف ولاتونينا
ولانجحد وفا الوافي ولاننسى خطـــــــا المخطين= وطيبة ٍ فعايلنـــــــــا وموجــــعــــــة ٍ مرامينا
فزعنا للكويت ولانبي لحـــــــــــــــــد ٍ علينا دين = نخانا جــــــابــــــر الاحـــمــــد ووفينا وكفّينا
على صدام ردينا الجـــــــزا والصاع بالصاعين= وخليـــــنـــــاه يلـــــعــــن كل كلب ٍ وهقه فينا
عليهم دارت الدنيا وراحوا في رحاها طحــــين = واخونوره بخيــــــــر وخير اخونوره مغطينا

::

شامخة

21 / 08 / 2007, 31 : 08 PM

::
عشت يا صقر العروبة
::

ياملكـنا ياملكــنا عسى عمـــــرك يطــــول = ياحبيب الشـــعـــب والـمملـكه وديارهـا
تستحي منك القصايد ولاادري ويش اقـول = ماتوفيك القصـــــــــــــــايد ولاشعارهـا
فيك من هدي الصحابه ومن هدي الرسول = عشت ياصقر العروبه ودرع اسوارهـا
ياذرى الشعب السعـــودي وشيال الحمول = مــمــلـــكتنا من جهــودك تشع انوارها
في ضميرك هم الاســـلام والدين محمول = مؤتمر مــكـــــه جمعت الدول وكبــارها
طـفت بالكـــعــــبه وترجي من الله القبول = والعيــون من الطهـــــاره تهل اعبارهـا
والمناطق زرتها كلــــها حسـب الاصول = تمسح دموع اليتامى وتـطــفي نــــارهــا
ومكرمــاتــــك للمواطن اثـــرها مايزول = مكرماتك ياملــــك ماتـــــزول اثــــــارهـا
والله انك غالي ٍ عندنا قـــــدر وميــــول = والقلوب اســــرار والله يعرف اسرارهـا
يانـمـر ياليـث ياذيـب يازحـل الزحـــول = ياسبع ياصــــقــــــــر يابحر يامغـــوارهـا
يابومتعب يابومتعب عسى عمرك يطول = ياحبيب الشـــــعـــب والمملكه وديـارهـا

::

شامخة

21 / 08 / 2007, 32 : 08 PM

::
قيلت في صاحب الأمير سعود بن عبد الله الثنيان آل سعود رئيس الهيئة الملكية
::

الــــســلام ورحــــــمـــــة الله وبــــركـــاته = ابـــتــدي وانــا عــلى الــلـه اعـتـمادي
مــومــن بــالله واســــمـــاه وصـفـــــــــــاته = يالله الــــتـــوفـــيــق يــالله الـــســـدادي
أيـــــه يــــابـــحـــر الشــعر مافــيك هــــاته = اصطفـــق يــــابــحــر واقدح يازنـادي
البــــحـــر خــضــته وجــبت مجوهـــــراته = قــلــت ابــهــديــها على غــاية مـرادي
للامــــيــر الله يـــطــــول فــــي حــــــيــاته = للامير ســــعــــود للـــحــر الـــريـادي
حـــافـــظ ديــــنـــه ولاضــــيع صـــــــلاته = خـــابــــر دنـــيـــاه تـــالـــيهـــا نفــادي
صــاطــي الــضربــه اليا حميت حــــصاته = حــــر ومـــجــرب ومـاض له هــدادي
صــــامــل الـــوقــفــات مشــهـــــــود ثباته = اســـــأل الــعربــان حضران وبـــوادي
عــــــيدنا شــــــوفه وتــــذرينا عــــبـاتــــه = عـــن ســـموم القــــيظ وايـــام البــرادي
اسمــــح لـــنـــا طال عـــمـــرك بالتفــــاتـه = باذكـــــــــر اوصافك واعددها اعــدادي
الــكـــــرم والصيــــرميـــــــه والســــماتـه = والشـــهـــامـــه والـــكــرامه والــودادي
ياقـــــرين الجــــود يااصـــــله يانــبـــــاتـه = ياشبـــــيه اللي نــــواظـــيره حـــــدادي
يارجــــا الـــمنكـــوب يافــرصة نجـــــاتـه = ياسنـــــاد الـــحـــق ياقــــمـع المعـــادي
فـــزعــــة الـــمعـــدوم لاوالله غــــــــنـاتـه = نصرة المظلـــــوم فـــكـــــاك القيـــــادي
ياعــــميل الخـــير يابــــذرة نــــــــــــواتــه = والله انـــك والله انـــك ماانـــت عــــــادي
انتــــم شيــــوخ الوطــــن وانــــتم حمــاتـه = وانــتــم اهـــل الخـيل فـ ايام الطــــرادي
وانتـــــم اللي جــــامعـــيـــنه من شــتـاتـــه = بالـــعزوم وبالـــرهاف وبالــــــهـنـــادي
شرعنا المصحـــف ونقـــــــرا معجزاتــــه = وآل سعـــــود شــــيوخنا درع البـــلادي
الولاة وياهــــــني منــــــــهم ولاتـــــــــــه = الملــــوك مــــلوكـــنا بـــيض الايـــادي
شعــــبهم وافــــي ولايخـــلـــف وصــاتــه = له سلــــوم وله علـــوم وله مبـــــــــادي
دون ديـــــــــــــن الله نعـــشق الاستماتـــه = ودون دولتـــــنا وقادتنـــــا نــــفــــــادي
امـــنــــين وكــــل محــــقــــق مـــنــــاتــه = نحمـــــد الله لاصبـــــاح ولاهـــجـــادي
والوطـــــــن بــــالــــدم مــــــروين فلاتــه = خل قـــــــوم البــــلبــله واهـل الـــدوادي
الرهــــابي كاشفـــــين مخـــطـــــــــطاتــه = خايــــب دجــــال ملــــعـــــون ربـــادي
ناشــــــف ريـــقــــه ويابســـــــــــة لهاتــه = شابــــــــــــح وجهه وغاشيه الســــوادي
هو يحســـــــــب انا نبـــي نســــمع قناتـــه = لا ورفـــــــــاع الســـمــــا بليا عمــــادي
عنــــــــدنا له لعـــــــــنة تلــــعـــن ثواتـــه = وعندنا له حـــــربة بــــــــــين الثنــــادي
والعدل ســــــــاس الحكم يقــــهر اعداتـــه = والطغى ســـــــــاس التفرق والفســــادي
وين صـــــــدام الـــلــــــهــــم لاشــماتـــه = استبد وتاليـــــــتها شـــــــ استـــــفــــادي
قد نصــــحـــنــــاه وتـــــداركــــنا فواتـــه = ميــــــــــر والله لاحيـــــــاة لمن تنـــادي
ذبحوا عيـــــــــاله ولاادري عــــن بناتـــه = وضاع حكمه واصبحت ناره رمـــــادي
ومن يقدم سيــــتــــه قبــــل احســــــناتـــه = مخطي دروب التســــــامح والرشـــادي
كل شخص يحتــــرم شخــــــصه وذاتــــه = يدرك العلـــــيا على حســــب اعتقـــادي
وكل علم مايحـــــــفـــظونــــــــه رواتــــه = راح ذكـــــــــره مع ثمود وقوم عـــادي
وكل حي يـــــنتظر موعـــــــــــد وفاتــــه = والعمر لو طــــال قافـــــــيه الحصــادي
ومن صــــدق في ذمــــــته ومعاملاتـــــه = يسلم من اهــــــل الحـكــي والانـتقــادي
ومن يجامل يتــــقـــي بمجــــــــاملاتـــــه = هرجة اللي لايصـــــيــــد ولايصـــــادي
ومن يصــــاحب طــيــب سوى سواتـــــه = والردي من جاه لابـــــد مــــــــــتــرادي
الردي خـــسران من ياخذ خـــــــواتــــــه = تلحق الــــعـــدوى ويجحـــدها المــعادي
قلتها والشعـــر والله وش طــــــــراتــــــه = كان ما مـــجـــد فـــعـــولــك يااســـنادي
عارف ممشاي والـــدرب وجهــــاتـــــــه = ولاني من اللي يهيــــــــــــم بكــل وادي
والـــسلام ورحـــمــــــة الله وبركاتـــــــه = للامير ســـــعـــــود للحـــــــر الـريـادي

::

شامخة

21 / 08 / 2007, 33 : 08 PM

::
آه واويلاه من هم سرى بي
::

آه واويلاه من همّ ٍ سرى بي=زلّ نصف الليل نومي ماهنيته
غير رب البيت ماحيّ ٍ درى بي=فارج الضيقات لاضاقت نصيته
اتشفّق عبرتي من حرّ مابي=واتجمل بالصبر لو ماقويته
ياكبر همي ويامااعظم مصابي=وآه من جرح ٍ عن العالم كنيته
خايف ٍ من هرجة اللي لاحكابي=علّم الجيران وامه واهل بيته
عن عيون الناس تسترني ثيابي=وكل حيّ ٍ غير ربي مارجيته
ويوم شفت ان الكفن ماله مخابي=كل مايطري على بالي شريته
استعنت بطاعة الله في شبابي=وماتيسّر من كتاب الله قريته
جعل رفّاع السما يجزل ثوابي=ويغفر ذنوبي ليا مني عصيته

::

شامخة

21 / 08 / 2007, 34 : 08 PM

::
تميم ربعي سنام العز وقصوره
::

مع السلامه فمان الله يانوره=أمّـنتك الله على قلبي ووجداني
روحي وابروح والعبرات منثوره=وردت بير الغلا وصدّرت ظمياني
النفس يابنت منهيّـه وماموره= وانا على اللي مضى قفّـلت بيباني
والجرح وان كان ماداواه دكتوره=عساه ماعاد يبرى طول الازماني
ماهمني غيرها لاشك مغروره=وانا على سلم ابوي وسلم جداني
تميم ربعي سنام العز وقصوره=ومن لامني في تميم العز غلطاني
شاعر وودّه يبيّن خافي شعوره=ولابد مامرّ الاول ياصل الثاني
لعبت بي لعبة التمياط بالكوره=لعبه يهز الشبك في ديار الالماني
العين لو تبكي الاحباب معذوره=واللي جرى لي من الغالين كفاني

::

شامخة

21 / 08 / 2007, 34 : 08 PM

::

من دار شمر وحاتم وطي

::

من دار شمر وحاتم طي = سمعت صوت يناديني
يقول جرح الموده ني = وفي ذمتك لاتخليني
بعدك هجيري وقربك في = والى متى وانت ناسيني
لبيه ياشمعة اهل الحي = لبيه لو ماسمعتيني
حنان حني علي شوي = وبعيون الاحباب راعيني
درب الهوى غير درب الغي = الغي درب الشياطيني
مافيه حي بكا له حي = وعليك ياما بكت عيني
جيت الطبيب وكشف علي = وبينت له كل مافيني
قال انت طيب ولابك شي = وعيا عليه يداويني
ان مت من سبتك ياظبي = افداك جرحي وسكيني

::

شامخة

21 / 08 / 2007, 35 : 08 PM

::

إن مت مانيب أول الي يموتون

::

ان مت مانيب اول اللي يموتون=مات النبي قبلي وكل الصحابه
والموت حق وللمخاليق مسنون=ولابد من قبر ٍ يواسى ترابه
ولابد من يوم ٍ عليه يصلون=ويقال ياربي تعظّم ثوابه
واليوم في الدنيا وباكر يقولون=فهدالمفرج مات لاواسفابه
يقوله الغالي ومن لي يحبون=والا الردي ماهمني وش حكابه
والرابح اللي له هل الخير يدعون=والخاسر اللي راح عمره نهابه
ماابي عيالي كان انا مت يبكون=من مات راح وعند ربي حسابه

::

شامخة

21 / 08 / 2007, 36 : 08 PM

::
وانا عــاقـل مع العاقل صخي كف وربــيع ضيوف
::

تجــــمل ياحســـين الــقــد فــــينا واكسب المعروف =ولاتنسى الزمان اللي مضى لو سـافه الســــافي
تــصــد وتــتــقــي عـني تحسب اني عمى مااشوف =وانا اللي كل ماشفـتك تلاقى بشوفـــك اطــــرافي
تراي ادرى عليـــك مـــن الحسود وهرجة الملقوف =نوى الــلــه من نواك بســــــو .....
عشيري فيه حسن اخلاق مع منطق وزين وصوف=عريــب الــجد خــد وقــد ثقــــــيل والعقــل وافي
.......=ستير ويسحب الثوب المشجر زيــــن الاوصافي
مســايـــير الضحـى ماهــمته حـرج وبـاع جــزوف=تركهن واشترى الستر الجمــــيل وقــال ياكـافي
انا ماابــــيك تلـــعب يانــظر عيني على المكشـوف= ابي حب على الفـطره وابي لعـــب على الخـافي
انا مـاابي مراســـيل اتـــصال ومـــحـبره وظــروف=ولاابي غــمــزة عــيـون وكلام مابـــــه انصافي
ابي لــــيــل اجــي لــك فـيــه لاشــايف ولامـشيوف= تحت جنــح الظــلام يضــمنا ستــر الله الضافي
ابي حب على وضح الـــنقـا شمـــسه بدون كسوف = وابي بحــر اجـدف فيـــه بشــراعي ومجـــدافي
ولاابي مايــــدنــس سمـــعتي يــوم الــعـباد وقوف=ترى خوفـــي من الله راس مـالي مكسب صافي
واحب اللي على علوم الوفـا والمرجلـه مــعسوف = واحب اســـلك دروب المرجـله واحقــق اهدافي
وانا ماني على بعض السوالــف والحكـي مكـلوف = اشوف الدرب قدامي واخـــلي مامضى اخــلافي
واخـلي كلمــة الجــاهــل تـــمر بمــسمعي وتطوف = تقـــــل ماكــني سمــعته كــذا طـــبعي وميــقافي
وانا عــاقـل مع العاقل صخي كف وربــيع ضيوف= وانا واصل مع الواصل وانـــا جافي مــع الجافي
وانا اكتب مايجول بخاطري فــوق الورق بحروف= تهــب وتفــزع اشــعاري حشـا ماينظــلم قــــافي
ترى بعض العرب هرج على الـخالي وطق دفـوف=يتيـــه المـــنزله ويعـــد نفــسه شيـــخ وســنافي
تغيب الشمــس ويخـــيم ظلام الليــل يااهل الخوف =وكل ياخـــــذ اللي لــــه مادام الجســـــم متعافـي

::

شامخة

21 / 08 / 2007, 37 : 08 PM

::
علموا ولد الردي لايــســب الــطيـــبين
::

صاحبي لياك تـــسمـــع كلام الحاسدين = كيف تسمع هرج ناس تحد سنونـــها
الليالي ياسعد فرقـــت بـــين الـــثـنـــين = والعيون من العبـــأيـر تحرق نونـــها
آه واويـــلاه مــن جـرحـي الـلي مايبين = خافي والــنـاس مــاشــافته بعيونـــها
اتعبر واتــصبـــر واقـــول الـــلــه يعين = يكذب اللي قال فرقا الخوي ياهونــها
والله اني خابر الخوي مــثل اليـــميـــن = عزوة لوسمعها الذيب يقصر دونــها
علموا ولد الردي لايــســب الــطيـــبين = كيف تشره بنت عامر على مجنونـها
عيني اللي ســــاهـره والخلايق نايمين = منك يالغالي عسى الله يكون بعونــها
افضحتني ياسعـــد بــــين كل المسلمين = واتصدد ماابي الــعــالم يشــوفـونـها
خايف من كلمة تجــــرح القلب الحزين = اثقل من طويق تدمي حشاي طعونها
تكسر الخاطر وتبقى على طول السنين = كلمة من جاهل ماعـــرف مضمونها
ياالله انك تجمع الشمــل والقاسي يلين = وانك تخيب رجا اهل الحسد وظنونها

::

شامخة

21 / 08 / 2007, 37 : 08 PM

::

مر وخلهم

::

عايش في هم والا في خيال= عايش في ظن والا في وهم
شف عيوني دمعها وشلون سال=من سبب فرقاك في قلبي سهم
اسألك من قال لك قتلي حلال=بعض حساد الهوى او كلهم
واجد اللي حاسدينك في الجمال= كان ودك مستعد اعدهم
القمر والورد الاحمر والغزال=والبشر معهم كفى الله شرهم
لايهمونك وغازلهم دلال=او على ماقيل (مر وخلهم)

::

شامخة

21 / 08 / 2007, 38 : 08 PM

::
صدتك مالها داعي
::

ياحبيبي صدتك مالها داعي=وش يفيدك من عنا العين وبكاها
ماترد الصوت وتقدر الداعي=لامتى ياقرة العين ومناها
زلةٍ زلت وتلوي بها ذراعي=ماحدٍ قبلك من الناس سواها
جيت اعدلها وزادت من اوجاعي=مثل من جا يكحل العين واعماها
انت عارفني وتدري عن اطباعي=كلمةٍ تجرح مشاعرك ماارضاها
والله اني من سبايبك منلاعي=لوعة اللي لاعها الطير واغداها
واجب انك ترحم الحال وتراعي=ياعيون ٍ سم حالي مراعاها
انت مشتاي ومصيفي ومرباعي=وانت علاّت المعاليق ودواها
انتظر رّدك ولا جابه الساعي=ولّ ياقلوب المحبين مااقساها
شاب طاروقي وقافي ومصراعي=ياقمر خمسة عشر ويش معناها
يرقدون الناس يااحمد وانا واعي=مااهتنيت النوم من عقب فرقاها
قد تمنتني وانا اطق باصباعي=وايّست مني وصرت اتمنّاها
مابها رحمه ولاهيب مطواعي=كل مااقوله على الله مشكاها
اشتري جمله ولاابيع قطّاعي=ومن يدورها على النّاس يلقاها

::

شامخة

21 / 08 / 2007, 39 : 08 PM

::
من باعنا بعناه باللي يسده
::

ياهيه والفنا الكرى والمخده=خلاص تبنا عن هواك وسلينا
اليوم ودعنا بحور الموده=لاصار ماودك تجي لاتجينا
من باعنا بعناه باللي يسده=مانشتري الا واحد ٍ يشترينا
ومن حدّنا جعل الليالي تحده=نجفاه لو انه عزيز ٍ علينا
ان كان لك خلّ ٍ تبيه وتوده=حنا لنا خلّ ٍ نبيه ويبينا
وان كان خلّك ماخذ ٍ عنك مده=حنا غصين البان يبكي علينا
وان كان خلّك مبعد ٍ عنك جده=حنا لطيف الروح منا وفينا
وان كان حبلك في يدينك تشده= حنا رمينا حبالنا من يدينا
وان كان بابك عن هوانا ترده=حنا قفلنا ابوابنا وانتهينا
ياطير قل له ماشقينا بصده=لايحسب انّا من صدوده بكينا
النفس طابت منه والقلب ضده=ماعاد ابي شوفه يمين ٍ يمينا
ماابيه لو جاب البحر شرق جده=ولو جرّ ضلع طويق مع طور سينا
والله لو يمسح على القاع خده=ولو قلّط الخيرات سمن وسمينا
ولوّه تأسّف لي وكفّه يمده= ويقول راضونا ترانا رضينا
ماارضى عليه ولاعيوني تلده= حنا ليا منا جفينا جفينا
خلّه يبيّح جور الايام سده= ويشكي من طعون الزمن ماشكينا
ياما سكتنا والغلط مانعده=نسكت وكنا ياالغضي مادرينا
وكم واحد ٍ غالي عشانك نهده=نزعل عليه وخابرينه يبينا
مافاد فيك وصبرنا وصل حده=رح فكّنا واسلم ولاتبتلينا
قد قيل هرج ٍ تستحي منه بده=بنقول لك هرج ٍ ولو مااستحينا
الكحل كبّه والشعر لاتكده=حنا خذينا اللي نبي وانتهينا

::