يا شباب أين موقع شعيب محارق ؟؟

[المولع]

السلام عليكم و رحمة الله و بركاته

يا شباب بغيت فزعتكم ابي وصف لشعيب محارق ، ويكون الوصف دقيق جداَ طبعاَ ابتداءَ من الرياض الى الشعيب .... شاكر لكم و مقدر ... و أبشرو بالصور الي تسر الخاطر ...


تقبلوا تحياتي ،،،،
المولــع

[دافنشي]

انا ما ادري الا انه بين رويغب والحفنه ولكن الاخوان ما راح يقصرون معك بيعطونك تفصيل دقيق

والله انا خدموني في سؤالي عن الشوكي وربيعه

وربنا يوفقك

انت المولع اللي في مكشات ؟؟


ليونارد دافنشي

[المولع]

مشكور أخوي دافنشي على مشاركتك ..
أما بالنسبه لسؤاك انت المولع اللي في مكشات ؟؟
لا . يمكن تشابه اسماء ...

[هليل]

اخوي المولع

شعيب محارق قبل دوار التنهات وانت قادم من الرياض بيجيك مفرق على يسارك لهجرة الطيري تدخل معه وتستمر على الطريق
اذا دخلت الهجره اقطع شعيبها ( الطيري) واستمر على دروب ترابيه حتى تطب في شعيب محارق
وهذا احداثي للشعيب اذا لك حاجه فيه
N 25.51.800
E046.31.851

[هادي]

هلا اخوي المولع

اظن اخوي هليل عطاك وصف تمام من طريق الرياض

واذا تبي وصف عن طريق تمير ولو هو بعيد شوي بس بيكون اسهل فمستعدين

واخلي اخوي اتيكا ينزل لك خارطة للموقع

ننتظر الرد


سلام

[المولع]

أخوي هليل : مشكور و بيض الله وجهك على هالوصف ..

أخوي هادي : والله ما فيه مانع اذا عطيتني الوصف من عند تمير ، ومشكور على تجاوبك ..

[اتيكا]

أخوي المولع بالنيابه عن أخوي هادي أبتلقف وأرد على طلبك

هناك عدة طرق تؤدي بك إلى شعيب محارق وهي كالأتي

تطلع من تميرمتجه إلى الرياض مع الخط السريع ألين يجيك مخرج شعيب دقله راح باتجاه الشرق الين يجيك مفرق ( الثمامة ) رح يساروامش قرابة عشرة كيلو يجيك مفرق على اليسار مكتوب عليه (الصمان - حفر العتش - الحفنه). تاخذ المفرق متجه لدوارالصمان باتجاه الشمال الين يجيك مفرق على ايدك اليسار مكتوب عليه ( هجرة الطيري) إفرق متجه لهجرة الطيري (إتجاهها غرب). اول ما يخلص الاسفلت باالهجره بتشوف طرق بريه تتيامن شوي عن الهجره . خلك مع ها لطرق اللي تقطع بك شعيب الطيري و إستمر رايح (غرب غرب شمال) لين يجيك شعيب محارق بعد حوالي 4 كم.

الطريق الثاني هو إنك ما تفرق لهجرة الطيري و لكن تستمر بطريقك لين يجيك دوار التنهاة تاخذ ثلاثة ارباع الدوار وتتجه غرب كانك رايح لحفر العتش قبل أن تاصل حفر العتش بيجيك مفرق على يسارك يؤدي إلى الحفيره. مع منزل الحفيره إستمر جنوب وإنت بشعيب محارق.

الطريق الثالث وهو انك تخرج من تمير متجه إلى بلدة رويغب أما عن طريق روضه نورة أو مع خط القصيم الرياض السريع وبعد أن تصل إلى رويغب أستمر مع الطرق البريه المتجهه إلى بلدة الحفنه وقبل أن تصل إلى الحفنه يجب أن تأخذ الطرق البريه المتجه يسار التي توصلك إلى أول بدايه شعيب محارق

الطريق الرابع وهو أنك تطلع من تمير متجه إلى روضه نورة ومنها تتجه شرق مع وادي العتش حتى تصل بالقرب من شعيب ابوركبه أنظر يمينك سوف تجد طرق بريه تقودك إلى شعيب محارق ولكنها وعرة

الطريق الخامس وهو أنك تستمر في طريقك إلى حفر العتش وماتفرق من عند ابوركبه وأنما تستمر في طريقك حتى يقطع عليك طريق الزفلت وتستمر معه حتى تصل إلى تقاطعه مع طريق دوار التنهاة حفر العتش وتاخذ الطريق المؤدي إلى الحفير وتقطع شعيب الطيري وتأخذ الطرق القويه المتجهه جنوب حتى تصل إلى الشعيب

وهناك طرق أخري

ولكن ألخص لك الطرق في ثلاث نقاط

1- إذا كنت تريد أعلى الشعيب أو أوله فلتذهب عن طرق بلدة الحفنه
2- إذا كنت تريد وسط الشعيب أو منتصفه فلذهب عن طريق هجرة الطيرى
3- إذا كنت تريد أسفل الشعيب أو أخرة فلتذهب عن طريق بلدة الحفيرة

الاحداثيه :
N 25.50.200
E 46.29.800
و
N 25.50.500
E 46.31.800

والله يسهل دروبك وين ما رحت

وتقبل التحيه

[المولع]

مشكور يا اتيكا و الله يخليك ذخر للمنتدى ..

والله وصفك واضح و سهل يا جعلك سالم ... و لا يهونون الشباب الي شاركو ...


تقبل سلامي ...