هل تتزوجون وبراتب 2000 ريال؟؟!!

[ابو مشعل]

السلام عليكم ورحمة الله و بركاته


كثر في الاونه الاخيره ان اكثر الوظائف الموجوده تكون براتب 2000 ريال الى 3000 الف ريال فهل هذا الراتب قادر على تزويج هذا الشاب وتكوين عائله وترتيب منزل وغيرها من الامور اللازمه لامور الزواج شي يحير لذلك سوف اطرح هذا الموضوع للنقاش لكي يستفيد
منه الاشخاص الذين يمرون بهذا الشي..

وهل الزوجه سوف تقبل بالزواج والراتب قليل خاصه بالوقت الراهن وما تحتاجه لقضاء متطلباتها ....

نرجوا المشاركه من الجميع
سواء رجال او نساء لكي نقرب وجهات النظر وتعم الفائده
للجميع...

تقبلوا تحياتي
ابواثير

[نديم الشوق]

مشكوور ابو اثر على الموضوع

والصراحه الفين ريال ما توكلك عيش لحالك كيف لو معاك عيال

ايام اول كان الفين كثيره بس اهم يرفعون رواتب ناس وناس .. وياكلها ابو راتب الفين وخمس
ارتفت الرواتب فرحنا كثير فجأه الاسعار بتاع الاكل وغيره ارتفعت مع الرواتب يعني وجود الراتب الاول او الثاني ما في فرق
نزل سعر البانزين ارتفع الزيت يعني فيك فيك
طاحت اسعار الاسهم ارتفع العقار .. وين تستأجر بيت بسعر مناسب
الفين في الزمن هذا ما تسوي شي .. ثلاثه الاف فيها كلام .. إذا انت برا الرياض

تحياتي

[ابو مشعل]

مشكور على مرورك وتعليقك وانا بانتظار الجميع
يعطيك الف عافيه يا نديم الشوق

[عاشق ديرتي]

اخوي الغالي ابو اثير حياك الله وبوركت في طرح هذا الموضوع
الحساس والفعال في نفس الوقت.......... وهاذي بعض الملاحظات على الموضوع الشيق:
1. في الوقت الحالي كثير من يطلب منزل خاص للزوجه وايضا في نفس الوقت ليس لديهم مانع
في ان تسكن مع اهلك هذا إن كانت نفس الزوجه تعرف الحال المادية...
2. بالنسبة للراتب فالوقت هذا بصراحه قليل جداً لكن يرزقك الله إذا كان نيتك الستر والعفاف
3. تخبر المرأة قبل الزواج بحالة الرجل المتقدم قبل بداية كل شي ...
4. البعض من أولياء امور الفتيات يدور الستر ولايفكر إلا في مصلحة البنت والزوج حتى لو راتبه
1200 ريال
5. سمعت قصة لأحد الأخوان يقول إن الشيخ / محمد بن صالح العثيمين رحمه الله - قد عقد قران
بريال واحد وهذا هو المهر!!!!!!!!!!!!!! لماذا لان ولي امرها الزوجه رأى فيه الصلح والخير ونسى
امور الدنيا ......... لكن الأن العكس صحيح الله يرحم ماضي اول
6. إذا احد توظف سواء براتب 2500 أو 5000 أو غيره فليحمد ربه على النعمه كما قال تعالى
(( لإن شكرتم لأزيدنكم ولئن كفرتم إن عذابي لشديد)) فالواحد يحمد ربه على كل حال
وبصراحه فيه ناس متزوجين وعندهم الحمدلله عيال والله موسع عليهم واسئله كم راتبك يقول
2800 او حولها ويكفيني اخر الشهر وناس العكس راتبهم حول 6000 وتطير بسرعه واخر
الشهر يتسلف
7. تعليقاً على موضوعك حول قبول الزوجه على الزوج بهذا الراتب فالزوجه الوقت هذا
تدور الرجال اللي يسند الظهر عليه واقولها مره ثانيه إذا صار الواحد ماخذ من عائله هم
انفسهم يعرفون حالته ومايقولون شي....................... بالتوفيق لك اخوي الغالي
على موضوعك المميز واتمنى من اخواننا الاعضاء التعليق على موضوع اخونا ابو اثير

تقبل مروري وتقديري لك والسلام،،،،،،،،،

[ابو مشعل]

يعطيك الف عافيه على الكلمات التي سطرتها يديك
كلام رائع من رجل رائع
تعليق في قمه الروعه
مشكور على مرورك وما قصرررررررت

[الشمالي]

الشكر لبواثير واللة ييييييييييييييييييععععععععيييييييييين

[ابو مشعل]

مشكور اخوي الشمالي على مرورك
وياليت لو علقت على الموضوع لتعم الفائده

[عاشق ديرتي]

حياك الله اخوي ابو أثير بصراحه
الموضوع فعال وياليت الجميع يطرح وجهة
نظره من كل النواحي الموجوده في هذا الموضوع
بالتوفيق للجميع في كل ماهو مصلحه لهم

[ابو مشعل]

وين الشباب وين الناس
نبي تفاعل مع الموضوع واقتراحات
مو تقرا وتطلع حط لك بصمه في المنتدى
انتظر الجميع

[بحر الحنان]

اتوقع 2000 ريال يادوب

مصاريف الاولاد بس وخصوصا في هذا الوقت
ارتفاع الاسعار

[ابو مشعل]

اهلا بطلتك اختي بحر الحنان
وتفاعلك وبالنسبه لبعض الناس تلقى راتبه 2000 ريال
وما شاء الله عليه مدبر عمره هو وعياله واحسن من اللي معه 4000 ريال
تلقى البنك يطلبه وديون والاول مظبط امورره
مشكوره على الطله وما قصرتي

[ALJAWAL]

الراتب مهوب مشكله واجد ولا شوي اذا الله طرح البركه فيه
يسلموووووووو يالغالي

[عبدالرحمن]

مشكوور ابو اثر على الموضوع


الفين ريال في الوقت الحالي ما تسوي شي وخصوصا في هذا الوقت
ارتفاع الاسعار


البعض من أولياء امور الفتيات يدور الستر ولايفكر إلا في مصلحة البنت والزوج ولا يهمه الراتب

[عاشق ديرتي]

اخوي الغالي الجوال وعبدالرحمن حياكم الله
كلام في محله ومتزن ورائع

إذا الراتب شوي والله اراد فيه البركه قسم
بالله أنه يوفر ويبقى اخر الشهر غير الراتب
اللي جاي

وغيره العكس سلف وبلاوي

الشكر موصول لاخوي الغالي ابو اثير على
الموضوع الحساس

[ابو مشعل]

مشكورين جميعا على طلتكم
الجوال
عبدالرحمن
ما قصرتم وصح كلامكم البركه لها دور

عاشق ديرتي
يعطيك الف عافيه على النشاط والمشاركه الدائمه بالموضوع
وما قصررررت يالغالي

[مصدر غير مسؤول]

اخوي ابو اثير // صرح مصدري الغير مسؤول ان صاحب 2000 او 3000ريال يسلف ويدين اللي راتبه 10000وهذاواضح في مجتمعنا .وممكن يتزوج كما حال اللي بالي بالك الله يوفقه ويتمم عليه بالعافية

[ابو مشعل]

مشكور اخوي الغالي على المرور والتعليق
وكلامك صح اخوي مصدر غير مسؤول
والله يوفق الجميع

[مخاوي الذيب]

انا لي رأي آخر ياابواثير ويختلف عن كل الآرآء اللي قالوها الاخوان
بصراحه الموضوع يعتمد على حسن الدبره والتصرف والله فيه ناس رواتبهم 15000 والديون عليهم طولهم وناس رواتبهم 3000 ماعليهم أي ديون
وعايشين ومستورين وبعض الناس يخلي زوجته تدبره والحرمه لو راتبك مليون ماكفاها في شهر الله يرحم زمان اول يوم الرجال رجال

[ابواسامه السلوم]

كل ذلك يعتمد على توفيق الله للعبد فمن اتقى الله يسر الله كل صعب ومن اعتمد على غيره ضاع وخسر

[الدنيا عجايب]

بقول الي عندي والله يستر علي وعلي المسلمين
بسم الله الرحمن الرحيم
اخوي الموضوع حساس شوي لكن المضمون فعلاً قوي جداً
لنبـــــــــــــــــــــــــــــــــــــــــــــــ ــــــــــــــــــــــــــــــــداء

اولاً تقول الراتب ؟؟
الصراحه بقولها لك اذا انت عندنا بالرياض انس انك بتعيش بـ2000او 3000 الف ريال
اضف اذاكنت من خارج الرياض وجاي لرياض ايجار ومصروف سياره ومصروفك الشخصي ياخي بتقول زادو الراتب بقول ايه لكن للاسف الزياده صارت نكبه لنا كل شي غلوه الايجارات المواد الغذئيه قطع الغيار الزيوت واضف الصيدليات بدت تغلي
يذكر لي احد الزملاء انه راح يشتري حليب لولده كان اول بـ46ريال وراح كذاء صيدليه تتوقع لقاه بكم بـ55 ريال ماهوب حرام
الصراحه ماعندنا وزاره تجاره تتعقب مثل هالاشكال
والشي الثاني انس فكرت انك تعمر لك بيت خلك عند اهلك تاكل وتشرب احسن لك وكرر قول ((اللهم لاعيش الاعيش الاخره)) وان شاء الله يرزقك الله
ومن ناحيه الزواج خلك علي بنت عمك او من جماعتك يكونون عارفين الوضع
( البير وغطاااه)
طبعا هذاء الي بيصير

تصدق الان العوانس عندنا بالرياض اكثر من 500.000 عانس وكل ذلك منقل الرواتب
المسكين وين بيحط المره فيه وين بيوكلها منه بيسرق بيبيع مخدرات هذاء الي بيصير
ارجو المعذره اذا كنت خرجت عن حدودي لكن غصب علي من الي اشاهده يومياً في
حياتي

[ابو مشعل]

يعطيكم العافيه على التعليق على الموضوع والنشاط الكلمات الحلووووووووه
واتمنى ان الله يوفقكم جميعا وتتزوجون والله يسهل عليكم