انا اطلب الله يزيد محبتي لك يقين ¬ وانت اطلب الله يزيدك في الفراق جهله

[سُلاَفْ القَصِيدْ]

http://download.mrkzy.com/e/2412_md_13326123262.gif
ــــــــ

الليل ما اعتقني من الوجد وانا سجين
رغباتي الماضيه وامالي المقبله

والوجد وش بينه وبين الشعور الدفين
اللي كثر ما تجاهلته تعبت أجهله

نجامل قلوبنا من باب بكره تزين
ونحمل صدورنا شي ما تستحمله

نداري شعورنا مخافة انها تبين
واظهارها مشكله واخفايها مشكله

ماهوب ذنب القلوب اللي خذلها الحنين
ولاهوب ذنب الشعور اللي دفعه الوله

يا نصف عمر الحياة ومبتغى نصف دين
من عاش بك حاضره ما خاف مستقبله

يا دعوة مستجابه من حدا الوالدين
يا فرحة اللي ضحك حظه وطاب عمله

يا موطن اللي خذيته لين عاش بيقين
ان انت نعمة وجود وفقدها معضله

استوطنه بس خاف الله في حاجتين
لا تعيشه هجرة بلاده وغربة هله

اللي يخافون من تلويحة الراحلين
يرضيهم ابسط لقا لو يحصل بعجله

النظره الأوله يمكن تمر السنين
ما يذكر العاشق الا النظره الأوله

لا تنزعج من فضول محبة الصامتين
ما عذب الصامتين الا كثر الأسئله

لو اسألو الناس عنا ما حن بجاحدين
سولف لهم واترك الباقي علي وازهله

إلى انشدو عن محبتنا قل العاشقين
ما وصلو اللي وصلنا له في ذا المرحله

اما الغلا لا سألو عنه قل الله يعين
ابعتذر واسألوه انا عجزت اسئله

لا قلت لي بيت والا قلت لي كلمتين
تداولو الحزن كن بيني وبينه صله

سمعو بصوتي حزن واستنتجوا اني حزين
وانا اسعد انسان حبك في الوجود ودله

ما يكفي العمر لو عشته معك مرتين
والعمر مره ولا يعتاض وانت أجمله

انا اطلب الله يزيد محبتي لك يقين
وانت اطلب الله يزيدك في الفراق جهله

الله يجعل لي بقلبك لا زاد الحنين
مثل الذي لك ورا صدري لا زاد الوله

ــــ

لـ الشاعر II حـمـدان المري ، 2017

[النادر]

انا اطلب الله يزيد محبتي لك يقين
وانت اطلب الله يزيدك في الفراق جهله

الله يجعل لي بقلبك لا زاد الحنين
مثل الذي لك ورا صدري لا زاد الوله

الله قمه في الابداع والتصور
كل بيت يقول الزود عندي
اختيار فخم جدا ولا يستغرب على الراقيه حسن الاختيار
عافاك الله وماقصرتي

[سُلاَفْ القَصِيدْ]

انا اطلب الله يزيد محبتي لك يقين
وانت اطلب الله يزيدك في الفراق جهله

الله يجعل لي بقلبك لا زاد الحنين
مثل الذي لك ورا صدري لا زاد الوله

الله قمه في الابداع والتصور
كل بيت يقول الزود عندي
اختيار فخم جدا ولا يستغرب على الراقيه حسن الاختيار
عافاك الله وماقصرتي


وآلآروع تواجدك واشادتك اخي النادر
كل الشكر لك ع حضورك لاحرمنا الله من هالحضور الجمييل ..