قسم النساء والولادة !!! مهم

[~غريب الاوطان~]

قسم النساء والولاده !!!

بسم الله الرحمن الرحيم
السلام عليكم ورحمة الله وبركاته ...
(( للمعلوميه انا داخله بمعرف اخوي ))

احب اتكلم عن معانااااة بنات وامهات من هالقسم الخايس بصراااحه !!
انتظااااار مبااالغ فيه
نجي من بداية الدوام او قبلها بعد مانستلم الرقم وننطق ننطق ننطق لين يطلع فينا عرق وعرق وحضرة الدكتوره مدري متى يبدا دوامها المشكله انها موجوده من 8 بس ماتدخل احد اصبروا لين يجي رقمكم !!!
من زين عاد الاستراحه والكراسي الحديد تقص الظهر قص
كل وحده تدربي كرشتها واحتري ساعه ساعتين ثلاث لين يجي دورك ...
اليوم عندي موعد الاحد تاريخ 23/3/1473
وصلت المستشفى 8 ونص خذت رقم
ومن 8 الى 10 مادخلت الا وحده !!!! ماادري وش يسوون فيها ومادخلت الا الساعه 12 الا ربع
زحمممه وشغلهم بارد ومصاله لابعد حد
المشكله اذا دخلت احسب كم بجلس ان ان طولت 20 دقيقه كشف وصرف علاج وانتهى الموضوع
ياليت يشوفون لنا حل مع هالقسم
يحطون غرفتين ودكتورتين صبح ودكتورتين ظهر يخففون من زحمة العالم شوي ويتحركون هالدكاتره !
والموووت اذا وحده من المراجعات تعرف لها اخو ولا ابو ولازوج موظف بالمستشفى ويحجز لها رقم وهي مريحه ف البيت وتجي قبل موعدها بخمس دقايق عسا ماشر واحنا ننتظر لنا ساعتين ثلاث !! قمة القهر
استني مثل مااحنا نستنا وانتظري مثل مااحنا ننتظر ...

ومره جيت ورقم اللي مريحه راح عليها راحوا وعادوا الدور عشان تدخل هي !!!
الله حسيبهم
جد اتمنى النظر ف موضوعناااا والله كرهت مواعيدي من كثر الانتظار
كل الاقسام تمشي عليهم الارقام بسرعه الا هالقسم
والمشكله لو تبدا من بداية الدوام ويتحركون كان هانت لكن جااااالسين حول الساعه ماادري وش يسوون
اللي مجربين هالقسم واااجد واكيد الجميع بيأيدني

[القناص45]

صدقتي...
اهلي عانو الكثير من الانتظار وزحمة الناس ولكن لاتلمون الدكتورة لأن عليها ضغط بشكل غير طبيعي وخاصة أغلب نساء تمير وماجاورها يراجعونها.

يستحسن تقديم شكوى فيه تظلم لأغلبية النساء وتقديمة لمدير المستشفى أو من هو أعلى منه منصب.

اتمنى فتح اكثر من عيادة لنساء والولادة وتحسين مواقع الانتظار لكلى الجنسين.

أعمال المستشفى وصيانتها مستمرة ولكن ينقصها الرجال المخلصين الواعين للمشكلة والذين يبادرون في حلها.


لكم اطيب تحية

[NOORA]

وعليكم السلام ورحمة الله وبركاته ..

انا اتفق معاك باللي قلتيه ..

اختي تراجع عندهم اقل شي تجلس ساعتين مستحيل تطلع قبلها حتى لو جت بدري واستلمت رقم

ياليت يوصل كلامنا للمسؤولين ويشوف لنا حل بأسرع وقت
ويغيرون الكراسي جدا متعبه ف الانتظار
اذا مو قادرين عالكنب يحطون فرشه ابرك !!!!

[راعي الجواد]

تعليقي على كلامك
اول شي الدكتوره تغطي ع مين والا مين انتي مفكره انها تجي تقهوى والا تحط رجل ع رجل وتسولف لين الساعه 8 ؟؟!
الدكتوره عندها مرضى غيرك ف التنويم هذا غير حالات الطورى الي تجي ف الطورئ
وغير حالات الولاده الي تجي فجاءه
ان شاءلله هذا كله ماهو شغل ؟؟!!
ايه نعم الدكتوره عليها ضغططط وضغط قوي بعد بدال م الواحد يشكرها ويدعي لها تقولون شغلها ماصل عجباً صراحه
بس فعلا ارضاء الناس غايه لاتدرك

[باترولـ1991ـ]

[الله يعينكم على الانتظار
وانت ياللي تقو ل ضغط على الدكتور
مستشفى تمير فيها ثلاثة اخصائين نساء
ويداوم في الفترة واحد
راح ابوفهد والسويح جزاهم الله خير
لو يعطون الصلاحية الاستاذ وحيد كان الامر الان منتهي
الله يعينكم ويسهل اموركم

[~غريب الاوطان~]

راعي الجواد
^
تعقيبا ع كلامك ..
انا ماتكلمت من راسي انا تكلمت من واقع شايفته وعايشته
اجي بدري الاقي الدكتوره بمكتبها بس الارقام مااااتمشي محد يدخل الا اقل شي نص ساعه الى ساعه تبدى تتحرك الارقام
قبل تتكلم رح شف الوضع بعدها تعال وعقب !
عجبي
...

[~غريب الاوطان~]

والدكتوره والنعم وماقلنا فيها شي وعارفين الضغط اللي عليها
بس انا اقترحت يحطون عيادتين يخف الضغط وتمشي الارقام من بدري
ماطلبت شي صعب !

[النادر]

تمير يستحق ان يكون هناك قسم خاص بالنساء والولاده فمدينة مثل تمير في توسع والناس في ازدياد
ويجب ان يكون هناك اهتمام وحرص من القائمين بالمستشفى على راحة المراجعه والمريضه ولا احد ينكر الجهود المبذوله
من مستشفى تمير وما تقدمه ولكن نحن نطمح للافضل ويجب السعي لايجاد حل دائم لمثل هالمشاكل .

[توأم الجود]

تعودنا من الاخوة في المستشفى الرد و التوضيح ؛ و ننتظرهم باذن الله

مهما كان حجم الضغط ؛ من الصعب قبول الجلوس من 8 الى 12 ؛ ؛ ؛ حسب ما ذكرت الاخت ؛؛ ايضا ؛ من الظلم ان يسمح بتقديم ( مراجعات على من سبقوها )

و ايضا ليش ما يتم تطوير غرف الانتظار ؛؛ كراسي و غيرها ( و اعتقد هذي سهله جدا )

على العموم ؛ لا نزال في انتظار التجاوب المعتاد و المتوقع من الاخوان في المستشفى

تحياتي

[قصائد]

,

كان الله في عون المراجعات وكان الله في عون اخصائين النساء والولاده لانه فيه نسبه كبير للمراجعين لهذا القسم

سوا داخل او خارج مدينة تمير !!

اتمنى من ادارة المستشفى ان يفتح عياده ثانيه لتخفيف الضغط على المراجعين والاخصائيين .

[x C4]

اساساً المستشفى بكبره فاشل، وتنقصه اشياء كثيره .. ميزانيات تُصرف عليه م ندري وين تروح . . والله م حولك احد ف المنتدى