قضيه تشاركني فيها كل بنات تمير

[لآتبكين يآعين]

بسم الله الرحمن الرحيم ..
السلام عليكم ورحمة الله وبركاته ,
كيف حالكم جميعا ؟

انا راح اكتب لكم معاناتي ي اهل تمير يآ أهلي و آخوآنيَ
انا متخرجة تربيه لي حول الست سنين
قدمت ع وظيفه و الى اليوم ماشفت رد انا بحاجه الى هالوظيفه
حالي مايعلم به الا رب العالمين ,
التوظيف لازم بوآسطة و المدآرس المدرسآت فيها مكدسآت من سنةة 1400
جد مشكلة نعاني منها اغلب بنات تمير ,
المدرسآت ف مدآرس الآبتدآئي و المتوسط آعمآرهم وصلت لمستوى التقآعد
ولآزآلو يجآهدون معليش يفتحون المجآل لغيرهم ..
عطآئهم و فضلهم مآرآح ننسآه ,
مشكلةة ثآنية بنت الديره اولى ب الوظيفه من غيرها يجيبون بنات من الرياض
تدرس و اغلب بنات تمير عاطلات ماليات البيوت
انا وش ذنبي ادرس 16 سنهةة و اتعب و اتخرج ب تفوق و الاخير اجلس ب البيت و آحط يدي ع خدي
مو ظلم لي ولآختي ولبنت عمي ولصديقتي و لبنات تمير جميعا ,
الموضوع هذا يؤيدني فيه كثير من البنات مو لوحدي ,

الموضوع لنقاش مشكلة :
(التوظيف ب المدآرس و مشكلة المدرسآت اللي ماعندهم نية يتقآعدون )
معليش بعض العقليات قد تشوف موضوعي فيه مضايقه لآحد
لانه ممكن يكون احد هالمدرسات اخواته او آحد من آهله
بس ما اظن اني اسئت لآحد ب اسمه او لمدرسة او جهه حكومية معينةة

آتمنى اشوف ردودكم جميعا مابين مؤيد و معارضَ ..؟؟

[ضوء]

وعليكم السلام هلا اختي والله حاسين بمعاناتك
انا الحين متزوجه وعندي عيال بنتي اللي بالابتدائيه يدروسنها نفس المعلمات اللي درسوني
يالله حسن الخاتمه اتمني احد يشوف حل
وش ذنب اللي درسو وتخرجو وماحصلو وظائف زي ماقلتي يجيبون بنات من برا تمير
وبناتنا وش كثرهم لاشغل ولاوظيفه
حتي دفعتي صار لي تقريبا اكثر من 10 سنين متخرجه
ووظفو صديقاتي 2 وبرا تمير اما الباقي لاحصلو وظيفه ولا شي
مع انهم مقدمين وصايرين ياخذون دورات حاسب وانجليزي
بس الشكوى لله مافادهم بشي
ياليت احد يشوف وضعنا ولايظلمونا
صح ماقصرو المدرسات وخاصه مدرسات الابتدائي ماشاء الله عمرو فيها
حتي بالثانويه اذكر اللي درسوني فيها للحين فيها
بالله كم صار لهم يدرسون .؟؟؟
اكثر من 20 هذا اذا مو اكثر
مو حرام انا وانتي وغيرنا ندرس واخرها نجلس بالبيت
وش فائدة اني درست كل هالسنين
يالله المستعان

[T_N_T]

الله يعينكم ويوفكقم ..وان شاء الله تتوظفون وتعينون خير

لكن قولت خل المدرسات يتقاعدون هذي صعبة .. الحرمة اذا مسكت الدراهم مستحيل تتركها ما يفكوها ولا ابو جلمبوا..!!!

[توليب2]

الله يعين غيرك اكثر من ست سنين والله يرزقكم ويرزقهم

[Cleopatra]

وعليكم السلام ورحمه الله وبركاته

أتفق معكِ أختي وهذه القضيه تخص الجميع

لكن الأهم ( من سيحل هذه المشكله ! )

[صمتــي ذبحنــي]

اتفق معك اختي
ومن زمان واحنا نقول ليت يفتحون المجال لغيرهم من المدرسات ..
والله يعين ويوفق الجميييع ..

[هلالي عشيره]

انا اضم صوتي لصوتك اختي يجب تخفيض سن التقاعد للمعلمات واعطاء الفرصه للبنات

[ابوعبدالرحمن11]

حالـتك مؤثره ومحزنه إلا أن مشاركة الكثير من الخريجات لما تشكين منه يجعل الأمـر قضيه تحتاج لدراسه وخاصه من قبل وزارة الماليه ووزارة التربيه والتعليم على الرغم أن المشكله شائكه بين الوزارتين ، أما التقاعد فهذا لايحل المشكله وإن حصل عين كالعاده من خارج المنطقه او من لها
عند اهل الحل إبن عــم ، نصيحتي أكثري من سؤال الرزاق الكريم وخاصه في جوف الليل هو سبحانه فارج الكروبات .أسأل الله لكي ولبنياتي القريبات
ومن بعدهن عاجل التوفيق والفرج .

[حلقوم]

صادقه ومستعده اشهد معك وبعدين معلمات الرياض يجون يوم ويغيبون. يومين وش ذنب البنات وانا متخرجه من عام 1426 وتعاقدومعي كم سنه وبعدين مسكوني الباب.

[دمعه على خد القمر]

هههههههههههه
خخخخخخخخخخخخ
كككككككككككك
^^ آضحكك على حآالي آقوول اذآ تخرجت بريح سنة آو سنتين بعديين ب آتوظف هع هعععي
وآالله صآاروا عجآيز وهمم يدرسوون
ىآالله يكوون بعوؤونكك

[مكرس]

الله يعينكم
صدق الواحد لا ذاق حلات الراتب مايبي يفكها ب راتب التقاعد

[كلاش تمير]

الله يكون بعونكم

[جبل الثلج]

كلامكم صحيح بس من يسمع انا عندي بنتين متخرجات الله يعين

[البارونات]

الخطاب هّذا المفروض يوجه لادارة التعليم مو للمدرسات

[الواصله]

صادقه لمتى ننتظرهم يتكرمون ويتقاعدون ..خافوا الله فينا سنين تعبنا وشقينا فيها ندرس ونطق مشوار لجامعات برا تمير
كله عشان نتخرج ونتوظف بالنهايه اصف مثلي مثل المزهريه لاشغل ولا مشغله ...
لا ويقولون نبي التعليم يتطور وين معه يتطور وطاقم التدريس من عام الف وحطبه
الزبده ( ياليت تعطون غيركم فرصه )
:)

[رقي]

تطورت المناهج والعقول متبرمجه ع عهد خالد كيف تبون المدرسات تطلب تقاعد؟

انا مشا لي حافز سنه ألفين ناقصه حسسني مغتنيه شلون المدرسات لا قضبت الراتب؟

انا اقول من فرج ع مسلم كربه فرج الله له كربه يوم القيامه قري دارك وعيالك وعطي هالشابات

إنجاز جديد يطور من حال التعليم ..

[ام عبدالرحمن]

والله ياوخيتي عيالي صارو كبري وللحين فيه معلمات مدرسيني من اول ابتدائي
وزي ماذكرتو المفروض تعطون فرصه لغيركم ، فيه ناس جالسه بالبيوت
متمرمطه من برامج التقديم حقت الوزاره وفيهه ناس معمره ومعرعر ظهرها في مكاتب التدريس
الحين هالمراهقين اهملو بدراستهم والسبب مافيه وظايف ناهيك عن الي جلسو بالبيوت واختصرو نهايه مشوارهم
حرام والله عجايز كبر امي يتحملون طالبات صغار عطو الشباااااب فرصه !!!!

[ألوان الطيف]

:t24:م فروض يكون هناك تقاعد مبكر لان الوحده إذا كبرت ماتعطي كثر ماهي صغيره .........وشكرآ

[جنون عذراء]

حسبي الله وكفى ع هـ الوزآرة الفاشله
آلحين جد بعض المدرسآت صآمآت الكتب صم
ويجن يهذنه ع ذا البنآت بدون آي تأسيس ولا هم يحزنون و الله مآتلآم آجل 20 سنه تدرس نفس المنهج :/

[بنت سلطان]

شيء يققهر من جد اللحين كثثير من المعلمات درسسوا جيل صصار امهات اللحين وبناتهم يدرسسونهم نفس المعلمات
المفروض يببكرون بالتققاعد أو من نفسسهم الوزارة يقللون السسنوات


وحتى كثثير نششتكي من الحوادث وبعد مكان الوظيفه
فالأفضل يبدون بتوظيف بنات المنطقه نفسسها
وإذا ماحصصلوا أحد بنفسس التخصص يبدون يوظفون اللي برا


منها نقلل هالحوادث ونوظف بنناتننا الا متتى وهم كذا
16سنه من الدراسه ويين راحت يعني اخرتها مققابببل جدران

[الامبراطورة]

خليها على الله الحين معك واسطه ياهلا ومرحبا
شهاده ماتسوي شي اعرف كثير توظفو مامعهم شهاده ثانوي
والسبب واسطه

[قاصر عنوه]

السلام عليكم

اخواتي الكريمات .. احمدوا الله كثيرا واشكروه على نعمة يزدكم

من منكم سئلت ربها اخر اليل اثناء السجود

من منكم طلبت ربها اخر اليل اثناء السجود

من منكم شكرت ربها اخر اليل اثناء السجود

قال تعالى (((لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ ) (http://www.google.com.sa/url?sa=t&rct=j&q=%D9%88%D8%A7%D9%86+%D8%B4%D9%83%D8%B1%D8%AA%D9%8 5&source=web&cd=1&cad=rja&ved=0CCsQFjAA&url=http%3A%2F%2Fwww.thegulfbiz.com%2Fvb%2Farchive %2Findex.php%2Ft-188287.html&ei=hLudUdu4NeaL4ATfnYFA&usg=AFQjCNEL7ns-SKcOmu40QVtK4w9EUidxmA)

نعم قيام الليل وخصوصا وقت السحر

وقت السحر هو الثلث الاخير من الليل بمعنى قبل الفجر بساعتين

وفى هذا الوقت يتنزل الله عزل وجل فى السماء الدنيا ويقول

(يا عبادي هل من داعي فأستجيب له ، هل من مستغفر لأغفر له ، هل من سائل فأعطيه)
يااا هل تفتكر اننا نفوت الفرص هذي

رب الكون يتودد الى عباده ليغفر لهم ويلبى احتياجاتهم واحنا العباد نكون نامين او سهرانين مع الواتساب او مع السكايبي
هل يصح هذا الكلام ؟؟؟؟

الواسطه هوالله سبحانه تعالى ونحن البشر نفعل السبب ..

ونصيحتي للاخوات من باب الخبر في تقديم الرغبات

لا تحطون رغباتكم على تمير او الحوطه او الروضه او المجمعه

خلوا رغباتكم على الارطاوية وقراها ... لان الرغبات شاغره جدا وبكثرة

تمير وقراها لايوجد عليها ارقام شاغره وانما لنقل الداخلي او الخارجي

والله يوفقكم ويرزقكم ..